იტალიის ნაკრები: კრახი, 85 000 ხმა ანჩელოტის!

იტალია მუნდიალზე ვერგასვლით მიღებული შოკის შემდეგ ნელ-ნელა გონზე მოდის. სოციალური ქსელები "აფეთქებულია", საფეხბურთო ფიასკო პოლიტიკური გამოცემების მთავარ თემადაც იქცა. იმიტომ, რომ თავად იტალიური ფეხბურთიც პოლიტიკაა. იქ, ისევე როგორც ჩვენში, ფეხბურთსა და პოლიტიკაში ყველა "ერკვევა"...

აპენინურ ფეხბურთში, ალბათ, ბევრი რამ შეიცვლება - ეროვნულ გუნდშიც, ფეხბურთის ფედერაციაშიც, ზოგადად ფეხბურთისადმი მიდგომაშიც. ეს მომავლის თემაა. ჯერჯერობით კი მიმდინარე ამბებზე გავაკეთოთ აქცენტი...

- მუნდიალი 2018. პლეი ოფი. საპასუხო მატჩი: კა­ტას­ტ­რო­ფა იტა­ლი­უ­რად [VIDEO]

ჯიჯის ცრემლები

ლეგენდარულმა მეკარე ჯანლუიჯი ბუფონმა სანაკრებო კარიერა დაასრულა. 1997 წლიდან 39 წლის მეკარემ "სკუადრა აძურას" შემადგენლობაში 175 შეხვედრა ჩაატარა. ჯიჯიმ ემოციები ვერ დამალა და პირდაპირ ტელეინტერვიუს დროს ცხარე ცრემლით იტირა...

"დღეს ვიხდი ბოდიშს არა მხოლოდ ჩემ გამო, არამედ მთელი იტალიური ფეხბურთის გამო. ჩვენ ვერ გადავჭერით ამოცანა, რომელიც იტალიელი ხალხისთვის უმნიშვნელოვანესი იყო. ძალიან ვწუხვარ, რომ ასე დავასრულეთ მსოფლიოს ჩემპიონატის შესარჩევი ციკლი, ვერ ვაჩვენეთ ჩვენი საუკეთესო თამაში... ეს იყო მატჩი, რომელშიც ბევრი რამ გადაწყვიტა ცალკეულმა ეპიზოდებმა. ჩვენ არ გაგვიმართლა შვედებთან დაპირისპირებაში...

მივდივარ იტალიის ნაკრებიდან. ვეხუტები ჩემს ხალხს, ჩემს ქვეყანას, განსაკუთრებით მათ, ვისთან ერთადაც ნაკრებში დაუვიწყარი წლები გავატარე".

ასევე ცნობილი ხდება, რომ იტალიის ნაკრებში კარიერას ამთავრებენ დანიელე დე როსი, ანდრეა ბარძალი და ჯორჯო კიელინი.

ვენტურას ამბავი

იტალიური მედიის ცნობით, ჯან პიერო ვენტურა თანამდებობიდან გადადგა. თუმცა ოფიციალურია დასტური ჯერ არ არსებობს.

ცხადია, დღეს თუ ხვალ ეს მაინც მოხდება. 69 წლის სპეციალისტმა "სკუადრა აძურას" დამრიგებლის პოსტზე ანტონიო კონტე შეცვალა. ვენტურას 31-წლიან სამწვრთნელო კარიერაში ერთადერთი ტიტული იყო 1996 წელს "ლეჩესთან" ერთად სერია C-ს მოგება.

თავად ვენტურამ გადადგომის თაობაზე ინფორმაცია უარყო და შემდეგი თქვა:

"მე არ გადავმდგარვარ, რადგან ფეხბურთის ფედერაციის პრეზიდენტთან ჯერ არ მისაუბრია. ბოდიშს ვიხდი მხოლოდ შედეგის გამო, მაგრამ ამაყი ვარ ცალკეული ფეხბურთელებით, რომლებმაც მაქსიმუმი გააკეთეს გამარჯვებისთვის. ჩვენ მეტისთვის უნდა მიგვეღწია პირველ შეხვედრაში და ეს არის ჩემი შეცდომა.

რა თქმა უნდა, შედეგი იყო ძალიან მძიმე, მაგრამ ახლა არ არის მთავარი თემა ჩემი შესაძლო გადადგომა. პრეზიდენტთან შეხვედრისას ყველაფერს განვიხილავთ, მოვუსმენ მას და დავეთანხმები მის ნებისმიერ გადაწყვეტილებას", - აღნიშნა ვენტურამ.

ეს იყო დილით, უკვე საღამოს კი ვენტურამ ადევნებულ ჟურნალისტს ტელეკამერის წინ დაუდასტურა, რომ გადადგა: "გადადექით თუ არა?" - "ჰო, გადავდექი!" - იყო პასუხი.

თუმცა სააგენტო "ანსასთან" კომენტარში მან თქვა - არავისთვის მითქვამს, რომ გადავდექიო. ბოლო ინფორმაციით, ის ფეხბურთის ფედერაციისგან 700 ათასი ევროს კომპენსაციას ელოდება კონტრაქტის გაწყვეტის სანაცვლოდ და სწორედ ამ კომპენსაციის მიღების შემდეგ დატოვებს პოსტს.

ვაგებთ, შეუშვით ინსინიე!..

იტალიისა და შვედეთის ნაკრებთა საპასუხო მატჩის მეორე ტაიმში საინტერესო ფაქტი მოხდა, რომელიც, თამამად შეგვიძლია, სკანდალად შევრაცხოთ. ჯან პიერო ვენტურამ გადაწყვიტა, მოედანზე დანიელე დე როსი შეეყვანა. დე როსი კი გაცხარდა და პირდაპირ მიახალა მწვრთნელს: "რა დროს ჩემი შესვლაა?! ვაგებთ! შეუშვით ინსინიე".

მოგვიანებით, დე როსიმ მომხდარზე ასეთი კომენტარი გააკეთა:

"მე მხოლოდ ის ვთქვი, რომ კრახთან ახლოს ვართ და, უმჯობესი იქნებოდა, თავდამსხმელი შესულიყო მოედანზე. ჩემი საქმე არ არის ტაქტიკის გარჩევა. ვენტურა დიდებული ადამიანია და თუ ვინმეს შეურაცხყოფა მივაყენე, ბოდიშს ვიხდი. იმ წამს მე ვიფიქრე, რომ საერთო საქმისთვის უკეთესი იქნებოდა, თუ მინდორზე ინსინიე შევიდოდა".

ცოტა რამ კანდიდატებზე

იტალიის ნაკრების ახალ მწვრთნელთან დაკავშირებით იქაურ მედიაში უკვე ერთი ამბავია ატეხილი. მიდის მსჯელობა, თუ ვინ დაიკავებს ვაკანტურ პოსტს.

ერთ-ერთი მთავარი კანდიდატი კარლო ანჩელოტია. ის ამჟამად უმუშევარია. მისი დაქირავება ხორვატიის ფეხბურთის ფედერაციასაც სურს, მაგრამ, დიდი ალბათობით, "პაპა კარლო" უპირატესობას მშობლიური ქვეყნის ეროვნულ გუნდს მიანიჭებს. სხვა ავტორიტეტულ ფიგურებთან ერთად, მას მხარს ფაბიო კაპელოც უჭერს:

"მე იტალიის ნაკრებში? არა, ნაკრებში არ ვიმუშავებ. ანჩელოტის დანიშვნა ყველაზე სწორი გადაწყვეტილება იქნება", - უთხრა კაპელომ "გაძეტა დელო სპორტს", რომელმაც გუშინ ამ თემაზე გამოკითხვა დაიწყო. საღამოსთვის, საიტზე ყველაზე მეტი - 85 000 ხმა ანჩელოტის ჰქონდა.

მიმზიდველი კანდიდატია "ჩელსიდან" წასასვლელად გამზადებული ანტონიო კონტე. მისი მუშაობა ნაკრებში ყველას ახსოვს. ასევე ასახელებენ ჯან პიერო გასპერინის, მაურიციო სარის, მასიმილიანო ალეგრის, ლუიჯი დი ბიაჯოსა და რობერტო მანჩინის.

ყოველდღიური სპორტული გაზეთი "ლელო"
1812
მკითხველის კომენტარები / 0 /
მსგავსი ამბები
რუბრიკის სხვა სიახლეები
;