იტალიის ნაკრები: არც ბალოტელი, არც ბელოტი...
"სკუადრა აძურას" მწვრთნელმა რობერტო მანჩინიმ დაასახელა შემადგენლობა, რომელსაც პორტუგალიასა (ერთა ლიგა) და აშშ-სთან (ამხანაგური) მატჩებისთვის მოამზადებს.
საგულისხმოა, რომ იტალიის ნაკრების სიაში ვერ ვხედავთ შემტევებს - მარიო ბალოტელისა და ანდრეა ბელოტის. ბალოტელი კიდევ გასაგებია - "ნიცას" ფორვარდს მიმდინარე სეზონში ჯერ გოლი არ აქვს გატანილი და ძირითადად ყვითელი ბარათების მოგროვებით არის დაკავებული, მაგრამ რაც შეეხება ბელოტის, სერია A-ში ამ დროისთვის მას 4 გოლი აქვს გატანილი, მათ შორის, 2 - ბოლო უქმეებზე "სამპდორიასთან" საგარეო მატჩში.
სამაგიეროდ, მანჩინიმ პირველად მიიწვია გუნდში სერია B-ს ბინადარ "ბრეშას" ნახევარმცველი, 18 წლის სანდრო ტონალი, ასევე, "სასუოლოდან" სტეფანო სენსი (23 წლის) და "ჰოფენჰაიმის" შემტევი ვინჩენცო გრიფო (25 წლის). მთლიანობაში, იტალიის ნაკრების შემადგენლობა ასე გამოიყურება:
მეკარეები - ალესიო კრანიო (კალიარი), ჯანლუიჯი დონარუმა (მილანი), სალვატორე სირიგუ (ტორინო);
მცველები - კრისტიან ბირაგი (ფიორენტინა), ლეონარდო ბონუჩი, ჯორჯო კიელინი, მატია დე შილიო, დანიელე რუგანი (ყველა - იუვენტუსი), ემერსონ პალმიერი (ჩელსი), ალესანდრო ფლორენცი (რომა), ალესიო რომანიოლი (მილანი);
ნახევარმცველები - ნიკოლო ბარელა (კალიარი), რობერტო გალიარდინი (ინტერი), ჟორჟინიო (ჩელსი, ინგლისი), ლორენცო პელეგრინი (რომა), სტეფანო სენსი (სასუოლო), სანდრო ტონალი (ბრეშა), მარკო ვერატი (პსჟ, საფრანგეთი);
თავდამსხმელები - დომენიკო ბერარდი (სასუოლო), ფედერიკო ბერნარდესკი (იუვენტუსი), ფედერიკო კიეზა (ფიორენტინა), ვინჩენცო გრიფო (ჰოფენჰაიმი, გერმანია), ჩირო იმობილე (ლაციო), ლორენცო ინსინიე (ნაპოლი), კევინ ლასანია (უდინეზე), ლეონარდო პავოლეტი (კალიარი), მატეო პოლიტანო (ინტერი).
174
მკითხველის კომენტარები / 0 /
მსგავსი ამბები
რუბრიკის სხვა სიახლეები