იუვენტუსი: სამი ტრანსფერი რონალდოსთვის!

იანვრის სატრანსფერო ბაზარი დაიხურა, მაგრამ კლუბებში უკვე იჭერენ თადარიგს მომავალი ზაფხულისთვის. "იუვენტუსში" ფიქრობენ, რომ გუნდი არ არის ჯერ მზად ჩემპიონთა ლიგის მოგებისთვის, რომ მხოლოდ კრიშტიანო რონალდო არ არის საკმარისი ამისთვის და მას შესაფერისი პარტნიორები სჭირდება, პარტნიორები - გამარჯვებულის მენტალიტეტით. ანუ მიზანია, ისეთი შეტევის ხაზის ფორმირება, რომელიც რონალდოს კიდევ უფრო პროდუქტიულს გახდის.

პრობლემები ნათლად აჩვენა ბოლო თამაშებმა, როცა "იუვენტუსი" ჯერ იტალიის თასზე დამარცხდა (0:3) "ატალანტასთან", მერე კი შინ ორბურთიანი სხვაობა გაანიავა "პარმასთან" - 3:3. ზედიზედ ორ თამაშში 3-3 გოლის გაშვება გუნდისთვის, რომელიც ოდითგანვე განთქმული იყო საიმედო დაცვით, განგაშის ტოლფასი გამოდგა.

თუმცა ტრანსფერები, რომელზეც ტურინში გამომავალი "ტუტოსპორტი" წერს, ვერ ვიტყვით, რომ მაინცდამაინც დაცვის ხაზის გამაგრებას უწყობს ხელს. ერთ-ერთი სამიზნე მარსელოა და ეს გასაგებია - ასეთი რანგის მარცხენა მცველი, როგორიც "რეალის" ბრაზილიელი ფლანგელია, სანთლითაა საძებარი. თან მარსელო ის ფეხბურთელია, შეტევაშიც რომ შეუძლია სარგებლის მოტანა.

სიაში შემდეგია ისკო, რომელსაც დიდად არ სწყალობს სანტიაგო სოლარი და რომელსაც რონალდოს გვერდით თამაშის დიდი გამოცდილება აქვს. ასევე ხამეს როდრიგესი - კოლუმბიელმა შემტევმა, რომელიც დღემდე "რეალის" საკუთრებაა და "ბაიერნში" იჯარით თამაშობს, განუცხადა "რეკორდმაისტერის" ხელმძღვანელობას, რომ გუნდში დარჩენას არ აპირებს.

ასე რომ, "იუვენტუსს" სამივე შემთხვევაში საქმე ექნება "რეალთან" და ვნახოთ, როგორ მოახერხებს ამ სამეულის გადაბირებას.

653
მკითხველის კომენტარები / 0 /
მსგავსი ამბები
რუბრიკის სხვა სიახლეები
;