იური ლომაძე: ჯერ კიდევ ვერ ვაანალიზებ...

ოზურგეთელი იური ლომაძე 72 კილოგრამში გახდა საქართველოს ჩემპიონი და თან ერთ-ერთი ულამაზესი ფინალური პაექრობა შემოგვთავაზა, რომელშიც 4:1 დაამარცხა აჭარის ნაკრების წევრი რამაზ ზოიძე. შედეგი ცოტათი მოულოდნელია, თუმცა არა იმიტომ, რომ ლომაძის არ სჯეროდათ სპეციალისტებს.

ის უკვე შედიოდა ეროვნული ნაკრების გაფართოებულ შემადგენლობაში, მაგრამ მის წინააღმდეგ ხომ ერთ-ერთი უნიჭიერესი ახალგაზრდა - ზოიძე იდგა. თავიდან ლომაძესაც ეტყობოდა რაღაც რიდი და ცოტა შებოჭილად ჭიდაობდა, თუმცა ბოლოსკენ ორი გდება გაუკეთა და მართლაც დამსახურებულად გაიმარჯვა.

მეორე ფანდზე ფეხიც იტკინა და კვარცხლბეკზე კოჭლობითაც ავიდა. დაჯილდოების შემდეგ მას რამდენიმე კითხვით მივმართეთ.

- ხართ კმაყოფილი საკუთარი ჭიდაობით, რამდენად კარგად შეასრულეთ მწვრთნელთა დავალებები?

- ეს ჩემთვის პირველი დიდი წარმატებაა, პირველად გავხდი საქართველოს ჩემპიონი და აქედან გამომდინარე, შედეგით კმაყოფილი და გახარებული ნამდვილად ვარ. ბუნებრივია, ამ შეჯიბრებას დიდი მოლოდინით ვხვდებოდი, რადგან როცა ჭიდაობა, გინდა-არ გინდა, შედეგზეც ფიქრობ.

მწვრთნელთა დავალებებზე როგორ გითხრათ: როცა საჭიდაოდ გავდივარ ლეიბზე, იქ ჭიდაობიდან გამომდინარე როგორც გამოვა, ისე ვჭიდაობ ანუ შექმნილი ვითარებიდან გამომდინარე ვმოქმედებ.

- ფინალში ძალიან ძლიერი მეტოქე გყავდათ, თუმცა გუშინაც ძლიერები დაამარცხეთ წინასწარ შეხვედრებში...

- და აქედან გამომდინარეც მქონდა იმედი და იქიდან გამომდინარეც, რომ როცა საჭიდაოდ გავდივარ, ყოველთვის საჩემპიონოდ ვემზადები.

- თუმცა თავიდან შებოჭილიც იყავით...

- ჯერჯერობით კიდევ ვერ ვაანალიზებ ამ შეხვედრას და ამ გამარჯვებას. ამაზე, ალბათ, მოგვიანებით უფრო დაზუსტებით გიპასუხებთ.

1020
მკითხველის კომენტარები / 0 /
მსგავსი ამბები
რუბრიკის სხვა სიახლეები