'იქ აღარ დავრჩები'... ლევან მაჭარაშვილის სანაკრებო ემოციები

გია ცეცაძემ უელსის ახალგაზრდულ ნაკრებთან ამხანაგურ მატჩში ლევან მაჭარაშვილი ათამაშა - ლიეტუვას უმაღლესი დივიზიონის ბინადარ "შტუმბრასის" მოძრავი და ტექნიკური ნახევარმცველი.

მიუხედავად იმისა, რომ 21 წლის მაჭარაშვილი უელსელებს ათლეტურად ჩამორჩებოდა, რამდენჯერმე შეტევა გაამწვავა და საერთოდაც, თამამად უტევდა.

"ძალიან კარგი თამაში გამოგვივიდა. თავადაც ნახავდით, რომ "ჩელსის", "მანჩესტერის" და პრემიერლიგის სხვა კლუბების ფეხბურთელებით დაკომპლექტებულ მეტოქეს ყველაფრით ვაჯობეთ.

მაგრამ პატარა შეცდომებისა და უყურადღებობის ბრალი იყო, გოლებით რომ დავისაჯეთ. საწყენია, რომ ვერ მოვუგეთ. თუმცა წინ მეორე თამაშია და დიდი იმედი მაქვს, 6 ივნისის შეხვედრაში ყველაფერს გამოვასწორებთ", - ამბობს მაჭარაშვილი.

ის ნაკრებში გამოძახებაზეც გველაპარაკა: "სანამ უელსთან თამაში დაიწყებოდა, უკვე ძალიან ემოციურად და შემართებით ვიყავი განწყობილი. საკუთარი მაყურებლის წინაშე საქართველოს ჰიმნს რომ უსმენ, მღერი და შენი ქვეყნის სახელისთვის თამაშობ, საოცარი განცდაა.

ბევრი ქომაგი არ მოსულა, მაგრამ ნაკრების მაისურის მორგება ყოველთვის იყო და იქნება ყველაზე დიდი მოტივაცია. ყველა ფეხბურთელს ვუსურვებ, რომ ეს ემოცია გამოსცადოს.

ნდობისთვის გია ცეცაძეს დიდი მადლობას ვუხდი. საკუთარი თამაშით 100 პროცენტით კმაყოფილი არ ვარ. ალბათ, საკუთარ თავს ბევრს ვთხოვ, მაგრამ მაქსიმალისტი გახლავართ და მინდა, ყველა შეხვედრა საუკეთესოდ ჩავატარო და გუნდისთვის სასარგებლო ვიყო.

თუმცა, ვიცი, რომ ჩემი თამაში დადებითად შეაფასეს. მამაჩემი მწვრთნელია და ჩემს პლუს-მინუსებს ვერ გამოვაპარებ. მან თავისი აზრი მითხრა, შეცდომებზეც მიმითითა, მაგრამ, ალბათ, ესეც გამოუცდელობისა და მღელვარების ბრალი იყო. მთავარია ვარჯიში და თავდადება და ყველაფერი გამოვა".

მაჭარაშვილი საკლუბო ამბებით უკმაყოფილოა და "შტუმბრასის" დატოვებას აპირებს: "შარშან ყველაფერი კარგად ამეწყო, ძირითადში ადგილის დამკვიდრება მოვახერხე, გოლებიც გამქონდა და სიმბოლურ ნაკრებშიც ვხვდებოდი.

ლიეტუვაში თამაში კარგი იმითაცაა, რომ ფიზიკურად კარგად ამზადებენ. ამიტომაც მოვუმატე გამძლეობასა და მოძრაობაში... თუმცა 2018 წელი ჩემთვის ძალიან ცუდად დაიწყო. ჩემპიონატის სტარტზევე დავშავდი. სწრაფად კი მოვმჯობინდი, მაგრამ ამის მერე მწვრთნელმა ჩემზე რატომღაც გული აიცრუა. ბოლო სამი თამაში წამივიდა. მაგრამ საკუთარი თავისგან ბევრად მეტს ვითხოვ. საერთოდ, არ მგონია, "შტუმბრასში" დავრჩე".

თუ რომელ ქვეყანაში აპირებს კარიერის გაგრძელებას, მაჭარაშვილმა ამის დაკონკრეტება არ ისურვა: "ზაფხულის მერე, დიდი ალბათობით, გუნდს შევიცვლი. არის კონკრეტული მოლაპარაკებები და შემოთავაზებები. მთავარია, დაინტერესებული კლუბი ლიეტუველებს შეუთანხმდეს.

ჩემი ახალი გუნდი? არა, ეს ქართული გუნდი არ არის. მოვლენებს გავუსწრებ და ვიტყვი, რომ სხვა ევროპულ ქვეყანაში წავალ. ახალი გუნდის ვინაობა 100 პროცენტით ვიცი, თუმცა, ჯერ ვერ გავამხელ. ვნახოთ, კლუბთან მოლაპარაკება როგორ დასრულდება. იმედი მაქვს, გამიშვებენ. ზუსტად მხოლოდ ერთი რამის თქმა შემიძლია, რომ ლიეტუვაში დარჩენა აღარ მსურს".

ყოველდღიური სპორტული გაზეთი "ლელო"
920
მკითხველის კომენტარები / 0 /
მსგავსი ამბები
რუბრიკის სხვა სიახლეები
;