იცოდით? დევიდ ბექჰემმა ვიქტორია ადამსი პირველად თბილისში ნახა

"დევიდ ბექჰემმა ვიქტორია ადამსი პირველად თბილისში ნახა" - ეს სათაური ყურადღების მიზიდვის მიზნით არ დაგვირქმევია. მართლა ასე იყო. თუ არ გჯერათ წაიკითხეთ დევიდ ბექჰემის ავტობიოგრაფიული წიგნი "ჩემი მხრიდან" და თავად დარწმუნდებით.

აი, რას წერს ინგლისის ნაკრების ყოფილი ვარსკვლავი მეხუთე თავში: 

"ჩემმა მეუღლემ საფეხბურთო სტიკერების ამბომში აღმომაჩინა, მე ის ტელევიზორში ვნახე...

1996 წლის ნოემბერია. თბილისში, სასტუმროს ნომერში ვზივარ. მეორე დღეს საქართველოს ნაკრებთან უნდა ვითამაშოთ მსოფლიო ჩემპიონატის შესარჩევი მატჩი. გარი ნევილი მეორე საწოლზე წევს. თუ თამაშებს არ ჩავთვლით, მოგზაურობა და გასვლები ძალიან არ მიყვარს. რეალურად ვერაფერს ათვალიერებ და მოსაწყენი ერთფეროვნებით ცხოვრობ - ჭამ, გძინავს და ვარჯიშობ. მთელ დროს ატარებ ოთახებში, რომლებიც ერთმანეთს ძალიან ჰგავს. 

სასტუმრო, სადაც ინგლისის ნაკრები ცხოვრობდა, საბჭოთა კავშირის დაშლის შემდეგ გახსნილი, საერთაშორისო სტანდარტების ერთადერთი სასტუმრო იყო საქართველოში. შიდა აინვები ერთგვარ წრეს ქმნიდა და ფოიეს, ბარებსა და რესტორნებს გადაჰყურებდა. 

ოთახიდან გამოსული მოპირდაპირე ოთახის კარს ხედავდი. ყველაფერი ლითონისა და მინისგან იყო დამზადებული, რაც კიდევ უფრო ამსგავსებდა ციხეს. ჩემი ფანჯრიდან სანახევროდ დასრულებული მაგისტრალი ჩანდა, რომლის გასწვრივაც ნაცრისფერი მდინარე მიიზლაზნებოდა. ეს ნამდვილად არ იყო პეიზაჟი, რომელიც საღამოს გარეთ გასვლას მოგანდომებდა.

მოკლედ, ვსხედვართ მე და გარი ნევილი ოთახში და ვლაპარაკობთ. კუთხეში მუსიკალურ არხზე ჩართული ტელევიზორია მიდგმული. Spice Girls-ის ახალი კლიპი იწყება, Say You'll be there. ისინი უდაბნოში ცეკვავენ, პოშს (ვიქტორია ადამსი) შავი კატის კოსტუმი აცვია, ვუყურებ და ვხვდები, რომ ასეთი არაჩვეულებრივი ქალისთვის თვალი აქამდე არასოდეს მომიკრავს.

მაგრამ იმ საღამოს, სასტუმროს ჩახუთულ ოთახში პირველად გამინათდა გონება. ვიქტორია ფანტასტიკური იყო და მივხვდი, რომ როგორმე მისკენ მიმავალი გზა უნდა მომეძებნა. აშკარად ლოურენს არაბის სამოსი მჭირდებოდა. როგორმე აქლემიც უნდა მეშოვა.

- ისეთი ლამაზი... მიყვარს. გარი, ამ გოგოს უნდა შევხვდე.

ალბათ, ნევილმა იფიქრა, რომ გავგიჟდი. მიუხედავად იმისა, რომ ერთად ძალიან ბევრ დროს ვატარებდით, ასეთი რამ გარის არასოდეს ენახა - შემიყვარდა პოპ-ვარსკვლავი, რომელსაც მხოლოდ ეკრანიდან ვიცნობდი. ახლა კი სწორედ ეს მოხდა - ჩემი გული ვიქტორიამ დაიპყრო."

დევიდ ბექჰემის ავტობიოგრაფიული წიგნი "ჩემი მხრიდან"

4504
მკითხველის კომენტარები / 0 /
მსგავსი ამბები
რუბრიკის სხვა სიახლეები