კალათბურთელთა ახალგაზრდული ნაკრები. ლატვიის გავლით ბულგარეთში...

საქართველოს 20-წლამდელთა ნაკრები ევროპის ჩემპიონატის A დივიზიონში გადასასვლელად ემზადება.

ამ მიზნის მისაღწევად საკმაოდ დიდი ბრძოლის გადატანაა საჭირო კარსმომდგარ B დივიზიონში, თუმცა იმ შემადგენლობის გათვალისწინებით, რომელმაც თავი ამ ასაკობრივ ნაკრებში მოიყარა, სწორედ ელიტაში გადასვლის ამბიციაა წინა პლანზე გამოსატანი.

საქართველოს ასაკობრივი ნაკრებები არ არიან ელიტაში თამაშით განებივრებულნი. შარშან ზაფხულში 16-წლამდელებმა გაგვახარეს, რომლებმაც ევროპის ჩემპიონატის B დივიზიონიდან ევროპის ჩემპიონატზე აინაცვლეს და ასეთი შემთხვევა ყველა ასაკობრივი (16, 18, 20) ნაკრების ჭრილში დამოუკიდებელი საქართველოს ისტორიაში რამდენჯერმე დაფიქსირებულა.

2018 წლის საქართველოს 20-წლამდელთა ნაკრებში საკმაოდ გამოცდილმა ბიჭებმა მოიყარეს თავი. მთავარი მწვრთნელის, ნიკოლოზ ჩერქეზიშვილის მიერ შერჩეული ისედაც კონკურენტუნარიანი შემადგენლობა კიდევ უფრო გააძლიერა სანდრო მამუკელაშვილმა, რომელსაც აქამდე არც ერთ ასაკობრივ ნაკრებში არ უთამაშია ამერიკის მოქალაქეობის გამო. ახლახან, საქართველოს კალათბურთის ფედერაციის ძალისხმევით, სანდრომ საქართველოს მოქალაქეობა მიიღო და ნაკრებებისკენ გზა გაეხსნა.

მამუკელაშვილთან ერთად ეროვნული გუნდიდან 20-წლამდელთა ნაკრების შემადგენლობაში არიან უკანახაზელი ლუკა ბულაშვილი და ცენტრი - გოგა ბითაძე, რომლებიც წლებია, საზღვარგარეთ თამაშობენ და ნაკრების ლიდერებად ითვლებიან.

ბულაშვილმა გასულ აპრილს 20-წლამდელთა ნაკრებში ითამაშა და გუნდს ევროპის ახალგაზრდული ლიგის მოგებაში დიდად დაეხმარა. ბითაძეს რაც შეეხება, ის ევროპის ერთ-ერთი ყველაზე პერსპექტიული მოთამაშეა თავის ტოლებში და მომავალი წლის NBA-ის დრაფტზე, სავარაუდოდ პირველ წრეში აირჩევენ.

ლეგიონერთა თემა რომ ამოვუწროთ, დავასახელებთ იტალიაში 3 წლის წინ გადაბარგებულ ლევან ბაბილოძეს და ამერიკის სტუდენტურ და სასკოლო ლიგებში მოასპარეზე ნიკა ჩეჩელაშვილსა და ლადო ფურცხვანიძეს.

ზემოთ ნახსენებ ლეგიონერებს დავამატოთ "თსუ-ჰიუნდაის" ბირთვი - გიორგი კორსანტია, დავით აფხაზავა, ალექსანდრე ფევაძე, გიორგი ცირიკიძე, ლევან ლოლიშვილი და გიორგი ჯაფარიძე, რომლებიც აღნიშნული კლუბის გარდა ევროპის ლიგაში საქართველოს ნაკრების სახელით მთელი სეზონი თამაშობდნენ და მოედანზე ერთმანეთს თვალდახუჭულები უგებენ.

იგივე ითქმის "ზაზას აკადემიის" ოთხ წარმომადგენელზე - ლადო ალავიძეზე, ნიკა მეცხვარიშვილზე, ვახტანგ გაფრინდაშვილსა და ლუკა კალატოზიშვილზე. ეს ბიჭები საქართველოს 19-წლამდელთა ჩემპიონატის დომინანტ "ზაზა 1"-ში ასპარეზობდნენ და ამ გუნდის ლიდერებად ითვლებიან. 20-წლამდელთა ნაკრების საკვანძო მოთამაშე იქნება ეროვნული ნაკრების წევრი კლუბ "ოლიმპიდან" - ნიკოლოზ დარბაიძე, რომელიც ამ თაობას ბავშვობიდან მოჰყვება და ყველა ასაკობრივ ნაკრებში აქვს სოლიდურ დონეზე ნათამაშები.

დაბოლოს, რაც ყველაზე მთავარია, მთავარი მწვრთნელი ნიკოლოზ ჩერქეზიშვილი ამ ბიჭებს ბავშვობიდან იცნობს და მოედანსა თუ მის გარეთ მათი შესაძლებლობების გამოყენება მაქსიმალურად შეუძლია. ჩერქეზიშვილის შტაბში დიდ სამუშაოს ასრულებენ ხორვატი სპეციალისტი, საქართველოს ეროვნული ნაკრების მთავარი მწვრთნელის ასისტენტი ტიჰომირ ბუიანი და ახალგაზრდა, თუმცა საკმაოდ გამოცდილი სპეციალისტი დიმიტრი ჯაკობოვი.

საქართველოს 20-წლამდელთა ნაკრები 4 ივლისს ლატვიაში გაემგზავრა, სადაც ამ ქვეყნის ნაკრებთან 2, ხოლო ესტონეთთან - 1 სპარინგ-მატჩს გამართავს და პირდაპირ ბულგარეთში გადავა, სადაც ევროპის ჩემპიონატის B დივიზიონის მატჩები გაიმართება.

ჯგუფში ჩვენი მეტოქეები იქნებიან ფინეთი, პოლონეთი, კოსოვო და პორტუგალია. პლეი ოფში ჯგუფის 2 საუკეთესო ნაკრები გავა და გააგრძელებს A დივიზიონში გადასასვლელ სამეულში მოსახვედრად ბრძოლას.


საქართველოს 20-წლამდელთა ნაკრები
გაფრთოებული შემადგენლობა

მოთამაშე პოზიცია სიმაღლე გუნდი (2017-18)

დავით აფხაზავა უკანახაზელი 183 თსუ-ჰიუნდაი
ლუკა ბულაშვილი უკანახაზელი 192 გრან კანარია (ესპანეთი)
ლევან ბაბილიძე უკანახაზელი 198 სან სევერო (იტალია)
ვლადიმერ ალავიძე უკანახაზელი 192 ზაზას აკადემია
გიორგი ჯაფარიძე უკანახაზელი 186 თსუ-ჰიუნდაი
ნიკა ჩეჩელაშვილი უკანახაზელი 195 სეინთს ანტონი (აშშ)
ლევან ლოლიშვილი ფორვარდი 198 თსუ-ჰიუნდაი
გიორგი ცირიკიძე ფორვარდი 198 თსუ-ჰიუნდაი
ალექსანდრე ფევაძე ფორვარდი 202 თსუ-ჰიუნდაი
ნიკა მეცხვარიშვილი ფორვარდი 203 ზაზას აკადემია
ვახტანგ გაფრინდაშვილი ფორვარდი 195 ზაზას აკადემია
ნიკა დარბაიძე ფორვარდი 201 ოლიმპი
სანდრო მამუკელაშვილი ფორვარდი 208 სეტონ ჰოლი (აშშ)
გოგა ბითაძე ცენტრი 211 მეგა ბიმაქსი (სერბეთი)
ლადო ფურცხვანიძე ცენტრი 205 ვსტ ოუკსი (აშშ)
გიორგი კორსანტია ცენტრი 202 თსუ-ჰიუნდაი
ლუკა კალატოზიშვილი ცენტრი 206 ზაზას აკადემია

მთავარი მწვრთნელი: ნიკო ჩერქეზიშვილი
მწვრთნელები: ტიხომირ ბუიანი, დიმიტრი ჟაკობოვი

B დივიზიონი

D ჯგუფის კალენდარი

13 ივლისი
ფინეთი-პორტუგალია
საქართველო-პოლონეთი

14 ივლისი
კოსოვო-საქართველო
პოლონეთი-ფინეთი

15 ივლისი
პორტუგალია-პოლონეთი
ფინეთი-კოსოვო

17 ივლისი
საქართველო-ფინეთი
კოსოვო-პორტუგალია

18 ივლისი
პოლონეთი-კოსოვო
პორტუგალია-საქართველო

ყოველდღიური სპორტული გაზეთი "ლელო"
878
მკითხველის კომენტარები / 0 /
მსგავსი ამბები
რუბრიკის სხვა სიახლეები
;