კალათბურთი, ლეგიონი. ბითაძის დაფარებამ ცრვენა ზვეზდა გააცხარა

ადრიატიკის ლიგის მე-13 ტურში გოგა ბითაძის "მეგა ბიმაქსმა" შეჯიბრების ფავორიტ "ცრვენა ზვეზდას" უმასპინძლა.

გოგას გუნდი მეტოქეს თავიდან 15 ქულით ჩამორჩა, მაგრამ მესამე პერიოდის ბოლოდან თამაში გამოასწორა და გამარჯვების შანსიც გაუჩნდა. თუმცა გადამწყვეტ მომენტში "ზვეზდას" კალათბურთელებმა მეტი სიზუსტე გამოიჩინეს და 90:85 გაიმარჯვეს.

მატჩის დასრულებას 5 წუთი რომ უკლდა, გოგა ბითაძემ და მისმა ამერიკელმა მეტოქე მათიას ლესორტმა ხუთ-ხუთი ჯარიმის გამო დატოვეს მოედანი.

საქმე ის არის, რომ ამერიკელი ჩასატენად წავიდა, იმდენად უფრთხოდა გოგასთან შეჯახებას, რომ ვერც ბურთი ჩააგდო და იატაკზეც, უხეშად დაეცა.

მსაჯებმა ჯარიმა კი დასტვინეს, მაგრამ დაახლოებით ორი წუთი იხილავდნენ ამ მომენტს ვიდეოგამეორების დახმარებით. შეიძლება ინანეს კიდეც ქართველს ფოლი რომ მისცეს, მაგრამ წესი წესია - ჯარიმა ვიდეოგამეორების შემდეგ არ უქმდება.

ლესორტმა კი ტექნიკური შენიშვნა ბითაძის ხელისკვრისთვის მიიღო. ...მანამდე ჩვენიანთან საქმის გასარჩევად მაკედონიელი პერო ანტიჩი მივიდა.

ცხადია, ახალგაზრდა თანაგუნდელს "მეგას" კალათბურთელებიც გამოექომაგნენ და მასპინძელთა ფარქვეშ დიდი ჩოჩქოლი ატყდა. თუმცა ჩხუბში არ გადაზრდილა.

ვიდრე ხუთი ფოლის გამო მოედანს დატოვებდა, ბითაძეს 19 წუთში 7 ქულა, 3 მოხსნა და 1 ჩაჭრა ჰქონდა. 24 ქულით მატჩის ბომბარდირი "ცრვენაზვეზდელი" ჯეიმს ფელდეინი გახდა.

"მეგა ბიმაქსს" 13 ტურის შემდეგ 4 მოგება აქვს და სატურნირო ცხრილში მე-11 ადგილზეა.

ყოველდღიური სპორტული გაზეთი "ლელო"
516
მკითხველის კომენტარები / 0 /
მსგავსი ამბები
რუბრიკის სხვა სიახლეები