[კალათბურთი] ანდრონიკაშვილი საქართველოში 8 ჩაჭრით დაბრუნდა

თბილისის ოლიმპიურ სასახლეში 2020 საკალათბურთო წელი გაიხსნა - ჩატარდა ოლიმპიური ჩემპიონების, ზურაბ საკანდელიძისა და მიხეილ ქორქიას მემორიალის რამდენიმე მატჩი.

წლევანდელ გათამაშებაში მონაწილეობას 12 გუნდი იღებს - სუპერლიგის ყველა (11 გუნდი) და ერთიც „ა“ ლიგის წარმომადგენელი, „კავკასია“. მონაწილეები 4 ჯგუფში, სუპერლიგის მიმდინარე შედეგებით გადანაწილდნენ. თითოეული ჯგუფის გამარჯვებული ნახევარფინალში გავა, ფინალი კი ქუთაისში შედგება.

პირველ დღეს ოთხი მატჩი გაიმართა. „კავკასიამ“ დაგვანახა, რომ მშვენიერი გუნდია და ძალიან ცოტა დააკლდა სუპერლიგის წარმომადგენლის „კაკტუსის“ დამარცხებამდე. საბოლოოდ 88:86 არჩილ ჟღენტის გუნდის სასარგებლოდ. 30 ქულა ჩააგდო (11 მოხსნა) და კაკტუსელთა გამარჯვებაში დიდი წვლილი შეიტანა ჯასტინ ევერეტმა. კავკასიელებს კი 24 ქულით ბრენდონ უილისი გაუძღვათ.

„რუსთავმა“ 87:70 მოუგო „მგზავრებს“ და ნახევარფინალის საგზურისთვის გადამწყვეტი ბრძოლა 16 იანვარს „დინამოსთან“ ელის. ქვემოქართლურ გუნდში კიდევ ერთი სიახლეა. მოგეხსენებათ, მთავარი მწვრთნელის პოსტზე გიორგიოს კეცელიდისი ანატოლი ბოისამ შეცვალა. მემორიალზე კი, მისი გუნდის რიგებში საქართველოს ნაკრების ახალგაზრდა წევრი რატი ანდრონიკაშვილი ვიხილეთ. მან 9 ქულა, 6 პასი, 8 ჩაჭრა და 4 მოხსნა მოაგროვა. „რუსთავის“ ბომბარდირები აკაკი დვალიშვილი და ნიკოლა ტადიჩი გახდნენ - 17-17 ქულა.

ყველაზე იოლად „ქუთაისმა“ გაიმარჯვა. კოტე ტუღუშის შეგირდებმა „ცხუმ-აფხაზეთს“ 94:66 აჯობეს. მატჩის ბომბარდირობა გიორგი ბარბაქაძემ და ჯეიმს მილიკენმა გაიყვეს. შეხვედრა ორივემ 15-15 ქულით დაასრულა.

მემორიალის პრველი დღე ისევე დაძაბული მატჩით დასრულდა, როგორითაც დაიწყო. ირაკლი ხოშტარიას გაწვრთნილმა „ვერამ“ ბოლო წამებზე მოახერხა „ტიტების“ დამარცხება - 88:83.

შეუჩერებელი იყო „ვერელი“ ბრენდონ სლაი. მის ანგარიშზე 29 ქულა და 5 პასი დაფიქსირდა. „ტიტებში“ კი ნიკა მეტრეველი გამოირჩა - 18 ქულა, 7 მოხსნა.

610
მკითხველის კომენტარები / 0 /
მსგავსი ამბები
რუბრიკის სხვა სიახლეები
;