კალათბურთი. საქართველოს თასის 1/4 ფინალი. ფრე რუსთავში

საქართველოს თასის გათამაშების მეოთხედფინალები თბილისსა და რუსთავში დაიწყო. დავიწყოთ ქვემოქართლური შეხვედრით, სადაც ფრე დაფიქსირდა და იმ ქომაგებისთვის, რომლებიც კალათბურთში კარგად არ არიან ჩახედულნი, მცირე განმარტებაა საჭირო.

კალათბურთში ფრე ზოგადად არ ფიქსირდება, მაგრამ არსებობს სატურნირო ფორმატი, რომელიც ამის საშუალებას იძლევა. ესაა 2-მატჩიანი საპლეიოფო სერია, რომელშიც გამარჯვებული 2 შეხვედრის ჯამში ვლინდება. საქართველოს თასის გათამაშებაში საპლეიოფო სერიები სწორედ ასეთი ფორმატისაა და შესაბამისად, პირველი მატჩის შემდეგ თუ გამარჯვებული არ გამოვლინდა, შეხვედრა სრულდება და მომდევნო ეტაპზე გამსვლელი მეორე დაპირისპირების შედეგით ირკვევა.

ასეთი იშვიათი შეხვედრა ქვემო ქართლში გაიმართა, სადაც 4 დღის წინ ზურაბ საკანდელიძე-მიხეილ ქორქიას მემორიალის მომგები "რუსთავი" თსუ-ს მასპინძლობდა. უნივერსიტეტელები გვარიანი დანაკლისით შეხვდნენ თასის მეოდხედფინალურ სერიას. თსუ-ს აკლდა მთავარი მწვრთნელი ლექსო ლაფანაშვილი, რომელსაც მემორიალის მატჩში მიღებული დისკვალიფიკაციის გამო 8-მატჩიანი უქმობა მოუწევს. გუნდს მისი ასისტენტი, ირაკლი ძიძიგური უძღვებოდა, რომელსაც განკარგულებაში 2 ლეგიონერი – კრისტოფერ ანდერსონი და რიკი მედისონი არ ჰყავდა. ამერიკელებმა მიზეზთა გამო გუნდი დატოვეს და სუპერლიგის ლიდერი გუნდი გვარიანად შეთხელდა.

რაც შეეხებათ რუსთაველებს, რაც მთავარი მწვრთნელის პოსტი ანატოლი ბოისამ ჩაიბარა, სუპერლიგისა და მემორიალის ბოლო 7 მატჩი მოგებული ჰქონდათ. ქვემოქართლელები თსუ-სთან შეხვედრაშიც ახლოს იყვნენ გამარჯვებასთან, მესამე პერიოდში 16 ქულით (67:51) იგებდნენ, თუმცა უნივერსიტეტელებმა ბოლომდე იბრძოლეს და გიორგი კორსანტიას საფინალო სირენის თანხლებით ჩაგდებული ბურთის წყალობით ფრეს მიაღწიეს – 80:80.

მატჩს ესწრებოდა საქართველოს ეროვნული გუნდის მთავარი მწვრთნელი, ილიას ზუროსი, რომელიც ნაკრების კანდიდატებს აკვირდება და მათგან საკმაოდ შედეგიანი თამაში იხილა. თსუ-ს ულიდერეს გიორგი კორსანტიამ (17 ქულა, 8 მოხსნა), გიორგი ტურძილაძემ (19 ქულა) და ჯორჯე მილოსავლიევიჩმა (19 ქულა, 8 მოხსნა, 7 პასი). რუსთაველთაგან 6-მა კალათბურთელმა მიაღწია 10-ქულიან ზღვარს, რომელთაგან 17 ქულით, 9 მოხსნით, 5 ჩაჭრით და 4 პასით საუკეთესო იყო დენზელ ლივინგსტონი. 15 ქულა და 9 მოხსნა აკაკი დვალიშვილმა მოაგროვა, ნიკოლა ტადიჩმა და გიორგი ცეკვავამ 10-10 ქულა მიითვალეს.

ამ მეოთხედფინალური წყვილის გამარჯვებული 26 იანვარს დანიშნული სერიის მეორე მატჩის შემდეგ გამოვლინდება.

თბილისში გამართული 2 მატჩიდან ერთი ახლოს იყო ფრესთან. "დინამოსა" და "მგზავრების" დაპირისპირება ამ უკანასკნელის ერთქულიანი გამარჯვებით - 68:67 დასრულდა. ანგარიში ამართლებს იმ დაძაბულობას, რომელიც ამ თამაშს ახლდა. პირველივე წუთიდან ბოლომდე თანაბარი ბრძოლა მიდიოდა და ვერც ერთი გუნდი ვერ ახერხებდა ხელჩასაჭიდი უპირატესობის მოპოვებას. საბოლოოდ "მგზავრებმა" ქულით იმარჯვეს და სერიის მეორე მატჩის წინ მინიმალური უპირატესობა მოიპოვეს. 


გამარჯვებულთაგან 20 ქულით საუკეთესო იყო ლოველ ქაბილი, 13 ქულა და 7 პასი დარელ ქომბსის ანგარიშზე დაგროვდა. "დინამოში" კი 14 ქულითა და ამდენივე მოხსნით საუკეთესო იყო ტაილერ უილიამსი. 12 ქულა მოაგროვა სედრიკ ქაუნსილმა. ამ გუნდებს შორის მოთხედფინალური სერიის მეორე მატჩი 26 იანვარს, 12:00 საათზე გაიმართება.

***

მე-3 მატჩი 16-ქულიანი სხვაობით დასრულდა - 78:61. ლაშა გამყრელიძის გაწვრთნილმა "ტიტებმა" 2-მატჩიან სერიაში სოლიდური უპირატესობა მოიპოვა "ვერასთან". 

გამარჯვებულებს გამოკვეთილი ლიდერი არ ჰყოლიათ - "ტიტებმა" გუნდურად და რაც მთავარია, გააზრებულად ითამაშა. მესამე პერიოდში, როცა ვერელებმა 22-ქულიანი ჩამორჩენა 11-მდე შეამცირეს, გუნდის კაპიტანმა და ყველაზე გამოცდილმა წევრმა ბესიკ ლეჟავამ 2 სამქულიანი ჩააგდო და თავის გუნდს დამაჯერებელი ლიდერობა აღუდგინა.

შეხვედრა ისე ჩამთავრდა, მოედანზე ვითარება არ დაძაბულა. გამარჯვებულებს 14 ქულითა და ამდენივე მოხსნით ტრისტინ უოლემ ულიდერა. 11 ქულა დააგროვა თემურ ბაბუნაშვილმა, ხოლო კაპიტან ლეჟავას ანგარიშზე 10 ქულა დაგროვდა.

24 იანვარს თასის გათამაშების მეოთხედფინალის მეოთხე წყვილი ითამაშებს - ოლიმპიურ სასახლეში, 13:00 საათზე, "ოლიმპი" "ბათუმს" უმასპინძლებს.

191
მკითხველის კომენტარები / 0 /
მსგავსი ამბები
რუბრიკის სხვა სიახლეები
;