კალათბურთი. U18. დღეს საქართველოს კადეტთა ნაკრების ევროსტარტია

საქართველოს 16-წლამდელთა ნაკრებმა ევროპის ჩემპიონატის A დივიზიონში საასპარეზოდ სერბეთს მიაშურა, სადაც ქალაქ ნოვი სადში, 10-დან 18 აგვისტოს ჩათვლით, ფინალურ ეტაპზე ითამაშებს...

16-წლამდელთა ეს გუნდი ერთადერთია ასაკობრივ ნაკრებთა შორის, რომელიც ევროპის ჩემპიონატის A (ელიტურ) დივიზიონში ასპარეზობს. შესაბამისად, გია კაზანჯიანისა და გელა წულაძის გაწვრთნილი გუნდი 10 აგვისტოდან ევროპის საუკეთესო ნაკრებებთან ბრძოლაში ჩაებმება, ხოლო მიზნად კონტინენტის საუკეთესო 16 გუნდში ადგილის შენარჩუნება ექნება. საამისოდ, საქართველოს ნაკრები ტურნირის პირველ 13 გუნდს შორის უნდა მოხვდეს, რადგან ბოლო სამ (XIV-XVI) ადგილზე გასული გუნდი მომავალ წელს B დივიზიონში იასპარეზებს.

შეგახსენებთ, რომ ელიტაში ასპარეზობის უფლება საქართველოს 16-წლამდელთა ნაკრებმა შარშან, ბულგარეთში გამართულ ევროპის ჩემპიონატის B დივიზიონში მე-3 ადგილის დაკავებით მოიპოვა. იმ შემადგენლობის უმეტესობა, მწვრთნელებიანად, წლეულს 18-წლამდელთა ნაკრებშია.

ბუბა ბერიშვილისა და თემურ კანკიას გაწვრთნილმა ნაკრებმა შარშან ბულგარეთში იყოჩაღა და ქართული კალათბურთის ქომაგები დიდად გაახარა, თუმცა ელიტაში ადგილის შენარჩუნება გაცილებით რთული იქნება და ეს მისია ნოვი სადში კაზანჯიანი-წულაძის ტანდემს ეკისრება.

ჩვენმა ნაკრებმა საკმაოდ კარგი მოსამზადებელი პერიოდი გაიარა. იყო თურქეთში, ლატვიაში, უკრაინასა და ბელარუსში, სადაც მთლიანობაში 9 სპარინგმატჩი გამართა. მწვრთნელებმა ევროპის ჩემპიონატზე წამსვლელი შემადგენლობა დიდი დაკვირვებისა და გამოცდის შემდეგ შეარჩიეს. სამწვრთნელო შტაბმა 12-კაციანი სია 8 აგვისტოს, სერბეთში გამგზავრების დღეს დაასახელა.

ფორმატი
ევროპის ჩემპიონატის გათამაშების ფორმატი B დივიზიონისგან განსხვავებულია. 16 გუნდი 4 ჯგუფშია განაწილებული და ჯგუფური ეტაპის დასრულების შემდეგ პლეი ოფში ყველა მათგანი გადადის. ჯგუფის თამაშები იმისთვისაა საჭირო, რომ გუნდებმა ადგილები გაინაწილონ და ამის მიხედვით პლეი ოფში ჯვარედინი სისტემით დაწყვილდნენ. A ჯგუფის გუნდები B-სთან დაწყვილდებიან, ხოლო ჩ ჯგუფისა - D-სთან.

A ჯგუფი: ლიეტუვა, ისრაელი, სლოვენია, ჩერნოგორია
B ჯგუფი: ესპანეთი, ლატვია, ჰოლანდია, სერბეთი
C ჯგუფი: თურქეთი, გერმანია, საბერძნეთი, ხორვატია
D ჯგუფი: საფრანგეთი, ესტონეთი, საქართველო, იტალია

საქართველოს ნაკრები D ჯგუფში ესტონეთით იწყებს. ამ გუნდს ქართველები თურქეთის საერთაშორისო ტურნირზე ეთამაშნენ და ბოლო პერიოდში, დაძაბულ ბრძოლაში დამარცხდნენ. როგორც გითხარით, ჯგუფური ეტაპის შემდეგ ყველა გუნდი მერვედფინალში გადავა და გაგრძელდება ბრძოლა ევროპის ჩემპიონობისთვის.

მერვედფინალში დამარცხებული 8 გუნდი ბრძოლას IX-XVI ადგილების გასანაწილებლად გააგრძელებს, რათა მომავალი წლისთვის ელიტაში დამრჩენთა და B დივიზიონში დაქვეითებულთა ვინაობა გაარკვიოს.

საქართველოს ნაკრების კალენდარი

10 აგვისტო
ესტონეთი-საქართველო 15:45

11 აგვისტო
საქართველო-საფრანგეთი 20:15

12 აგვისტო
საქართველო-იტალია 20:15

ყოველდღიური სპორტული გაზეთი "ლელო"
102
მკითხველის კომენტარები / 0 /
რუბრიკის სხვა სიახლეები