შევანგრიოთ ექვსი ერის კარიბჭე ფლორენციაში... იტალია-საქართველოს წინათქმა

ხვალ ფლორენციაში საქართველოს ნაკრები ნოემბრის ტესტების პირველ მატჩში იტალიის ეროვნულ გუნდს დაუპირისპირდება. "ბორჯღალოსნები" ამ მატჩისთვის საფრანგეთში ემზადებოდნენ და ამჟამად უკვე ფლორენციაში არიან.

საქართველოს ნაკრების ახალზელანდიელმა მთავარმა მწვრთნელმა მილტონ ჰეიგმა საბრძოლო რაზმი დაასახელა. ძირითად შემადგენლობაში რამდენიმე სიახლეა - ფულბეკად თამაშს სოსო მათიაშვილი დაიწყებს.  შუამარბის პოზიციაზე ტრავმირებულ დავით კაჭარავას თამაზ მჭედლიძე შეცვლის.

გუნდის კაპიტანი კი, მეორე შუამარბი მერაბ შარიქაძე იქნება, რომელიც ტრავმით გამოწვეული რვათვიანი პაუზის შემდეგ, მოედანზე პირველად გავა. ფრთებზე გიორგი კოშაძე და ზურაბ ძნელაძე დადგებიან. ძნელაძე თამამად შეიძლება დებიუტანტად გამოვაცხადოთ, რადგან "ბორჯღალოსნების" კვართით მას ტესტ-მატჩებში მონაწილეობა არ მიუღია. ძნელაძეს ნაკრებში მხოლოდ ერთხელ მოუწია თამაშმა, 2013 წლის "თბილისის თასზე" სამხრეთ აფრიკის A ნაკრების წინააღმდეგ. A ნაკრებთან თამაში კი ტესტად არ ითვლება. ტრავმის გამო ბევრი გაუცდა კოშაძესაც. თუმცა, ახლა ის კარგ ფორმაშია. უცვლელია 9 ნომრისა და მგეზავის წყვილი - ვასილ ლობჟანიძე და ლაშა ხმალაძე. მათ ჯამში 102 კეპი დაუგროვდათ.

შერკინების პირველ ხაზში ორწლიანი იძულებითი შესვენების შემდეგ მარჯვენა ბურჯად დავით ქუბრიაშვილი დადგება. მარცხენა ბურჯი მიხეილ ნარიაშვილი, ხოლო კვაჭი ჯაბა ბრეგვაძე იქნება. სამივე გამოცდილი, ბევრის მნახველი მოთამაშეა.

მეორე ხაზში, სადაც ტრავმის გამო კონსტანტინე მიქაუტაძე და გიორგი ნემსაძე დაგვაკლდებიან, ნოდარ ჭეიშვილი და ლაშა ლომიძე ითამაშებენ. მესამე ხაზში სამი 22 წლის მორაგბე გვყავს - ოთარ გიორგაძე, გიორგი ცუცქირიძე და ბექა გორგაძე, რომლებიც ბოლო დროს თავიანთ კლუბებში საუკეთესოები არიან. მათ ერთად საქართველოს 20-წლამდელთა ნაკრებში მსოფლიოს ახალგაზრდულ ჩემპიონატზე უთამაშიათ.

პირველ ხაზს სათადარიგოთა სკამიდან გამოცდილი შალვა მამუკაშვილი, ზურაბ ჟვანია და ლევან ჩილაჩავა გააძლიერებენ, მეორე ხაზში არანაკლებ გამოცდილ შალვა სუთიაშვილს ვიხილავთ, რომელიც 23-კაციან რაზმში ყველაზე ასაკოვანია. ის 34 წლისაა და იტალიასთან 70-ე კეპს მოიხვეჭს. მესამე ხაზში ბექა ბიწაძე გამოჩნდება, რომელსაც შარშან ნოემბრის შემდეგ ნაკრებში აღარ უთამაშია.

უკანა ხაზის სათადარიგოები არიან უნივერსალი ლაშა მალაღურაძე, რომელსაც 23-კაციან განაცხადში ყველაზე მეტი, 87 კეპი აქვს მოხვეჭილი. ასევე ცხრა ნომერი გელა აფრასიძე და შუამარბი გიორგი კვესელაძე.

თითქმის უძლიერესი შემადგენლობა დაასახელა იტალიის ნაკრების ირლანდიელმა მწვრთნელმა კონორ ო"შიმ. ერთადერთი დანაკლისი "სკუადრა აძურას" წარმოშობით არგენტინელი მესამეხაზელი სერჯო პარისეა, რომელიც 23-კაციან განაცხადში არ არის.

შეგახსენებთ, რომ საქართველოსა და იტალიის ნაკრებების მატჩი თბილისის დროით 18 საათზე დაიწყება.

მერაბ შარიქაძე La Gazzetta dello Sport-თან: შეგისწავლეთ და მზად ვართ, გამარჯვებისთვის! [VIDEO]

იტალია-საქართველო

იტალია: 15. ლუკა სპერანდიო, 14. ტომაზო ბენვენუტი, 13. მიკელე კამპანარო, 12. ტომასო კასტელო, 11. მატია ბელინი, 10. ტომაზო ალანი, 9. ტიტო ტებალდი; 1. ანდრეა ლოვოტი, 2. ლეონარდო ჯილარდინი, 3. სიმონე ფერარი, 4. ალესანდრო ძანი, 5. დინ ბადი, 6. სებასტიან ნეგრი, 7. ჯეკ პოლედრი, 8. აბრაამ სტეინი
სათადარიგოები: 16. ლუკა ბიჯი, 17. კერიფ ტრაორე, 18. ტიციანო პასკუალი, 19. მარკოს ფუზერი, 20. იოჰან მაიერი, 21. გუგლიემო პალაცანი, 22. კარლო კანა, 23. ლუკა მორისი

საქართველო: 15. სოსო მათიაშვილი, 14. გიორგი კოშაძე, 13. მერაბ შარიქაძე, 12. თამაზ მჭედლიძე, 11. ზურაბ ძნელაძე, 10. ლაშა ხმალაძე, 9. ვასილ ლობჟანიძე ; 1. მიხეილ ნარიაშვილი, 2. ჯაბა ბრეგვაძე, 3. დავით ქუბრიაშვილი, 4. ნოდარ ჭეიშვილი, 5. ლაშა ლომიძე, 6. ოთარ გიორგაძე, 7. გიორგი ცუცქირიძე, 8. ბექა გორგაძე.
სათადარიგოები: 16. შალვა მამუკაშვილი, 17. ზურაბ ჟვანია, 18. ლევან ჩილაჩავა, 19. შალვა სუთიაშვილი, 20. ბექა ბიწაძე, 21. გელა აფრასიძე, 22. ლაშა მალაღურაძე, 23. გიორგი კვესელაძე

ტესტები

10 ნოემბერი
იტალია-საქართველო

17 ნოემბერი
საქართველო-სამოა

24 ნოემბერი
საქართველო-ტონგა

ყოველდღიური სპორტული გაზეთი "ლელო"
1459
მკითხველის კომენტარები / 0 /
მსგავსი ამბები
რუბრიკის სხვა სიახლეები