კარგი ამბავია იტალიიდან: მჭედლიძე მომსახურების ზონას დაუბრუნდა

ძალიან კარგი ამბავია: ლევან მჭედლიძე მოედანზე პირველად გამოჩნდა - 28 წლის თავდამსხმელმა "ემპოლის" ფორმით მოსამზადებელ ეტაპზე დაბალი ლიგის "მონტელუპოსთან" ხანგრძლივი იძულებითი პაუზის შემდეგ ითამაშა.

"ემპოლიმ" 5:0 მოიგო. საქართველოს ნაკრების თავდამსხმელი კი მოედანზე მეორე ტაიმის დაწყებისთანავე გამოჩნდა. მართალია, გოლი არ გაუტანია, მაგრამ მთავარია, ითამაშა და ამით თავადაც ძალიან გახარებული დარჩა.

"დიდი ხნის უთამაშებლობის შემდეგ თამაში დიდი სიხარულია. მადლობა ჩვენი გუნდის სამედიცინო პერსონალს, სამწვრთნელო შტაბსა და თანაგუნდელებს, რომლებიც ჩემთვის ამ მძიმე პერიოდში გვერდით მედგნენ და მამხნევებდნენ", - ამბობს მჭედლიძე.

მან ბოლოს "მილანის" წინააღმდეგ "სან სიროზე", 2017 წლის 23 აპრილს ითამაშა, მე-40 წუთზე იტალიურ გრანდს გოლიც გაუტანა, მაგრამ 53-ე წუთზე ჯვარედინი იოგების უმძიმესი ტრავმის გამო მოედნის დატოვება და ხანგრძლივი მკურნალობა, ოპერაცია და რეაბილიტაცია დასჭირდა. შეგახსენებთ, რომ "ემპოლი" სერია A-ში დაბრუნდა, ლევან მჭედლიძეს კი კლუბმა ზაფხულში კონტრაქტი ერთი წლით გაუხანგრძლივა.

მოკლედ, ზაფხული დამაიმედებლად დაიწყო - მჭედლიძის გარდა, ეროვნული ნაკრების მომსახურების ზონას თითქმის ყველა ტრავმირებული მოთამაშე დაუბრუნდა - ჯანო ანანიძე, თორნიკე ოქრიაშვილი, ვაკო გვილია, ტრავმირებული გიორგი ქვილითაია კი ისეთი ტრანსფერის გმირი გახდა, ჯანმრთელიც რომ ვერ იოცნებებდა. ასე რომ, სექტემბერსა და ერთა ლიგის დასაწყისს იმედიანად ველოდებით.

ყოველდღიური სპორტული გაზეთი "ლელო"
820
მკითხველის კომენტარები / 0 /
მსგავსი ამბები
რუბრიკის სხვა სიახლეები