კარგი თუ ცუდი? როგორი იყო რეგულარული ზაზა ფაჩულიასთვის?

NBA-ში დასრულდა რეგულარული ეტაპი და გუნდები საპლეიოფოდ დაწყვილდნენ. ზაზა ფაჩულიას "გოლდენ სტეიტს" "სან ანტონიო სპურსი" შეხვდა, გუნდი, რომელიც განსაკუთრებით საშიში პლეი ოფშია.

სერიის პირველი მატჩი ოკლენდში 14 აპრილს, თბილისის დროით 23 საათზე დაიწყება...

მანამდე გადავხედოთ განვლილ რეგულარულს და შევაფასოთ ზაზა ფაჩულიას გამოსვლა.



ზაზა ფაჩულია
/
2017-18 სეზონი
მატჩი: 69
წუთი: 972 (საშუალოდ 14.1)
ქულა: 373 (5.4)
მოხსნა: 321 (4.7)
პასი: 109 (1.6)
ჩაჭრა: 38 (0.6)
დაფარება: 17 (0.2)
დუბლი: 2

კარგი თუ ცუდი?

შეფასება იოლი საქმე სულაც არ იქნება. მაგალითად, 2006-07 წლებში ქართველ ცენტრს საშუალოდ 12.2 ქულა და 7.9 მოხსნა ჰქონდა - ეს კარგი იყო. 2009-10 წლებში 4.3 ქულა და 3.8 მოხსნა - ეს ცოტაა.

თუმცა პირველ შემთხვევაში 28.1 წუთს თამაშობდა, მეორეში - 14-ს.

სხვათა შორის, ზაზა მიმდინარე სეზონშიც 14 წუთს ატარებს მოედანზე და შედარებით უკეთესი სტატისტიკა აქვს: 5.4 ქულა, 7.4 მოხსნა.

თუკი წუთების სიმცირეს გავითვალისწინებთ, ვერ ვიტყვით, რომ ქულა-მოხსნებში ცუდი მაჩვენებელი აქვს, მით უმეტეს, რომ წლეულს მსოფლიოს დონის ვარსკვლავებში უწევს სასროლი სიტუაციების გამონახვა და ქულების მოგროვება.

- როდესაც სტეფ კარის, კლეი ტომპსონისა და კევინ დურანტის გვერდით თამაშობ, შესაძლოა, სატყორცნ სიტუაციაშიც აღმოჩნდე, მაგრამ ნამდვილად არაა საწყენი, როდესაც პასის ნაცვლად ისვრიან. ისინი ხომ უმეტეს შემთხვევაში ბურთს აგდებენ, - ეს ზაზა ფაჩულიას სიტყვებია.

ათი წლის წინათ, 14 წუთში 4.3 ქულა ცუდი რატომ იყო, იცით? "ატლანტაში" თამაში ჯო ჯონსონსა და ჯოშ სმიტზე ეწყობოდა, არც ერთია კარი და არც მეორე - დურანტი... მწვრთნელისგან სრული კარტ-ბლანში ჰქონდათ, არადა ფაჩულიაზე ბურთი მეტად რომ წასულიყო, როგორც შემდეგ "მილუოკისა" და "დალასში" გამოჩნდა, გუნდი მეტს ისარგებლებდა.

ამ სეზონში საშუალოდ 14 წუთი... წინა წელს ზაზა 18.1 წუთს თამაშობდა. არც მწვრთნელი შეცვლილა და შემადგენლობაშიც არ მომხდარა ძირეული ცლილებები, მაშ რამ გამოიწვია დროის შემცირება?

ობიექტური თუ სუბიექტური?

დროის შემცირებას თავისი ობიექტური თუ სუბიექტური მიზეზები აქვს. ობიექტურით დავიწყოთ.

6 დეკემბერს ზაზამ "შარლოტის" წინააღმდეგ 5 წუთი ითამაშა. მიზეზი ობიექტური იყო: მხრის ტრავმა.

28 თებერვალსაც 5 წუთი ითამაშა, ოღონდ "ვაშინგტონის" წინააღმდეგ. მიზეზი სუბიექტური იყო - ასე გადაწყვიტა მთავარმა მწვრთნელმა სტივენ კერმა. ცხადია, მის კომპეტენციაში ეჭვის შეტანა არ შეიძლება. რადგან მან გადაწყვიტა, ე.ი. ობიექტურიც იყო მისი შეხედულებით, რაც გარედან თავისუფლად შეიძლება გამოჩნდეს სუბიექტურად. ამ შემთხვევაში სიტყვა "სუბიექტური" არ ნიშნავს მიკერძოებულს.

თუ ტრავმა ხელს არ უშლის, რატომ თამაშობს ზაზა 10 წუთზე ნაკლებს (ასეთი შეხვედრა 9 იყო)?

სათადარიგოები თუ სასტარტოები?

მწვრთნელის გონებაში ჩამახედაო - ცოტა არ იყოს უხეში გამონათქვამია. თუმცა, საინტერესოა, რას ფიქრობს სტივ კერი, როდესაც ზაზას ცოტას ათამაშებს, ან მის ადგილას სასტარტო ხუთეულში ჯავალ მაკგის აყენებს.

დავიწყოთ იმით, რომ რეგულარულ ეტაპზე "გოლდენ სტეიტმა" თავიდანვე საკმარისად აკრიფა მოგებები და მწვრთნელიც პლეი ოფზე დაფიქრდა. დიდ გუნდში ასეც უნდა ხდებოდეს: ყველამ იცის, რომ საპლეიოფო ბრძოლებში ხუთი კაცით ფონს ვერ გახვალ, ხოლო თუ სათადარიგოები რეგულარულ ეტაპზე არ აათამაშე, გადამწყვეტ მატჩებში მათგან ბევრს არაფერს უნდა ელოდო.

კერიც ყოველ მატჩში ცდილობდა, შემადგენლობა ბოლომდე გამოეყენებინა. იყო შემთხვევები, ეს წაგების ფასადაც დაუჯდა. არ უნდა დაგვავიწყდეს ტრავმები, რამაც მეტი პასუხისმგებლობა სათადარიგოებზე გადაიტანა - როდესაც არ გყავს კარი, დურანტი, ტომპსონი, გრინი, მაშინ კუკმა, ლუნიმ და ბელმა უნდა მოიგონ თამაში.

ჰოდა, სასტარტო ხუთეულის წევრების გამოკლება სულაც არ ნიშნავდა იმას, რომ ზაზას სათამაშო დრო გაეზრდებოდა - მწვრთნელს სათადარიგოების გამოცდის მშვენიერი შანსი მიეცა.

სეზონის
/
რეკორდები
/
ქულა: 16
(მინესოტა-გ. სტეიტი 109:103)
მოხსნა: 13
(საკრამენტო-გ. სტეიტი 104:119)
პასი: 6
(ორჯერ)

 სპურსი თუ უორიორსი?

ფაჩულიას კი გამოცდა არ სჭირდება, კერმა მას ხელახალი კონტრაქტი რომ გაუფორმა, კარგად მოეხსენებოდა, რა ძალაა ქართველი გადამწყვეტ მატჩებში. გავიხსენოთ თუნდაც შარშანდელი "ყბადაღებული" შეხვედრა "სან ანტონიოსთან", რომელშიც კავაი ლეონარდი ზაზასთან შეჯახების შემდეგ დაიმტვრა. ამერიკული გამოცემებიც წერდნენ - ის მატჩი ზაზამ მოიგოო.

არა იმიტომ, რომ "სპურსს" კავაი გამოაკლო, იმიტომ, რომ ფაჩულიამ გარინდული თანაგუნდელები გამოაფხიზლა: "სან ანტონიო" 24 ქულით რომ დაწინაურდა (45:21), სწორედ მაშინ შემოიყვანა მწვრთნელმა ფაჩულია მოედანზე და ჩვენიანი იქცა თამაშის შემოტრიალების მთავარ ფაქტორად - 26 წუთში 11 ქულა, 9 მოხსნა და 3 პასი მოაგროვა. ქულებზე მნიშვნელოვანი ის იყო რომ "სპურსის" კალათბურთელებს "გოლდენ სტეიტის" კალათისკენ გზა "ჩაეხერგათ".

26 წუთი ზაზას შარშანდელი საპლეიოფო რეკორდი იყო. სხვა მატჩებში მწვრთნელს მისი გამოცდილება, დაცვა და ბრძოლისუნარიანობა მხოლოდ 13-14 წუთით დასჭირდა. "უორიორსმა" "სპურსთან" ის მატჩი 113:111 მოიგო და, ფაქტობრივად, ამ შედეგმა გადაწყვიტა NBA-ს ფინალში გამსვლელის ბედი.

- პლეი ოფში ექსპერიმენტები არ ხდება, თამაშის რიტმი მატულობს, ყოველი შეცდომის ფასი ათმაგდება. ნამდვილი კალათბურთი სწორედ პლეი ოფიდან იწყება, - ესეც ზაზა ფაჩულიას სიტყვებია.

მწვრთნელმა სტივენ კერმაც დაახლოებით იგივე თქვა მას მერე, რაც შეიტყო, რომ პლეი ოფის პირველ ეტაპზე "სან ანტონიოს" ეთამაშებოდა:

- ბოლო ერთი თვის განმავლობაში არ გვქონია მნიშვნელოვანი მატჩი. პირველი ასეთი 14 აპრილს გველის.

დალაგებული, ორგანიზებული კალათბურთის სათამაშოდ მას უთუოდ დასჭირდება ზაზა ფაჩულია, თუმცა ისევე როგორც შარშან, ამჯერადაც არათანაბრად ექნება სათამაშო დრო. ეს დამოკიდებული იქნება შეხვედრის ხასიათსა და მეტოქე გუნდის ცენტრებზე...

მთავარი კი ის არის, რომ "სან ანტონიოსთან" მატჩებში ზაზას სასტარტო ხუთეულში უნდა ველოდოთ. ამასვე წერს "ამერიკული გამოცემა "ქრონიკლი":
"უორიორსისა" და "სპურსის" დაპირისპირებას ბევრი შეკითხვა ახლავს. მათ შორის ერთ ასეთია: ვინ ითამაშებს "გოლდენ სტეიტის" სასტარტო ცენტრად?

რეგულარულ ეტაპზე სტივ კერმა უამრავი ექსპერიმენტი ჩაატარა, მოსინჯა მაკგი, ბელი, ლუნი, ვესტი... თუმცა, ნაკლებად მოსალოდნელია, ისინი ზაზა ფაჩულიაზე წინ დააყენოს: პლეი ოფში მთავარი ცენტრი ქართველი იქნება."

1505
მკითხველის კომენტარები / 0 /
მსგავსი ამბები
რუბრიკის სხვა სიახლეები