კარლო ანჩელოტის მომავალს 'არსენალსა' და იტალიის ნაკრებს უკავშირებენ

ორიოდ დღის წინ "კორიერე დელო სპორტმა" გაავრცელა ინფორმაცია, თითქოს, იტალიის ფეხბურთის ფედერაციის მაღალჩინოსნები 58 წლის სპეციალისტს არსებით საკითხებზე უკვე შეუთანხმდნენ და ახლა მხოლოდ ფინანსური დეტალებია გასარკვევი.

ანჩელოტის ყოფილმა შეგირდმა, ალესანდრო კოსტაკურტამ, ვინც ახლა იტალიის ოლიმპიური კომიტეტის სპეციალური წარმომადგენელია ფეხბურთის მმართველ ორგანოში, დაადასტურა, რომ ანჩელოტისთან შეხვედრა შედგა რომში (ლონდონურ სერობაზე არაფერს ამბობს), ოღონდ, იქვე დასძინა, რომ მხარეებს იტალიის ნაკრების თაობაზე არ უსაუბრიათ, რაც, ცოტა არ იყოს, უცნაური და არადამაჯერებელია.

როგორც ჩანს, კოსტაკურტა და ფედერაციის სხვა მაღალჩინოსნები უხერხულ მდგომარეობაში ჩავარდნენ სხვა კანდიდატებთან (რობერტო მანჩინი, კლაუდიო რანიერი) მას შემდეგ, რაც "კორიერე დელო სპორტის" ინფორმაცია გავრცელდა. აი, კოსტაკურტას კომენტარიც:

"ანჩელოტი რომში პირადი მიზეზის გამო ჩამოვიდა. ის გაჩერდა იმავე სასტუმროში, რომელშიც მე ვჩერდები ხოლმე. აქედან გამომდინარე, შედგა ჩვენი საუბარი.

იტალიის ნაკრებზე არ გვილაპარაკია. 20 მაისს დავასახელებთ "სკუადრა აძურას" მთავარ მწვრთნელს და ყველა ვნახავთ, როგორი იქნება ჩვენი არჩევანი", - თქვა "ბილიმ".

ყოველდღიური სპორტული გაზეთი "ლელო"
750
მკითხველის კომენტარები / 0 /
მსგავსი ამბები
რუბრიკის სხვა სიახლეები
;