კარტოზია-ბალავაძის ტურნირი: 4 ოქროს მოლოდინში - ქართველები ირანელების და აზერბაიჯანელების წინააღმდეგ 

გუშინ თბილისის ოლიმპიურ სასახლეში „გივი კარტოზია-ვახტანგ ბალავაძის“ მემორიალი დაიწყო თავისუფალსა და ბერძნულ-რომაულ ჭიდაობებში, რომელშიც საქართველოს ჩათვლით, 15 ქვეყანა მონაწილეობს:

აზერბაიჯანი, სომხეთი, ირანი, საფრანგეთი, ინდოეთი, სერბეთი, უკრაინა, სლოვაკეთი, შვედეთი, აშშ, ყაზახეთი, მაკედონია, უზბეკეთი და ყირგიზეთი. 

გუშინ ასპარეზობაში ჩაებნენ თავისუფალ ჭიდაობაში 61, 70, 79 და 92 კილოგრამების წარმომადგენლები, ხოლო ბერძენ-რომაელთაგან - 55, 63 და 72 კილოგრამებისა. გაიმართა წინასწარი ეტაპის შეხვედრები და გამოვლინდნენ როგორც ფინალისტები, ასევე დამამშვიდებელი წრის მონაწილენი შვიდივე წონაში.

მოლოდინისამებრ, ჩვენები უფრო მეტი წარმატებით თავისუფალ ჭიდაობაში გამოდიან, სადაც ლიდერთა უმეტესობა ასპარეზობს, ბერძენ-რომაელთაგან წამყვანი ფალავნები კი ისვენებენ. მათ ძირითადად უკვე გაარკვიეს საკადრო კონკურენცია ყველა წონაში, „თავისუფალთათვის“ კი ეს შეჯიბრება მსოფლიოსთვის მთავარი შესარჩევი ეტაპია. 

ტურნირში გაცილებით უფრო დიდი წარმატებითაც თავისუფალი სტილით მოჭიდავეები გამოდიან - მათ ოთხივე წონაში ჰყავთ ფინალისტი, ბერძენ-რომაელებს კი - არც ერთში. მათგანაც დამამშვიდებლის ფინალში მხოლოდ ერთია გადასული - გიორგი ხუჭუა (72) ანუ ბრინჯაოსთვის ჭიდაობა გარანტირებული მხოლოდ მას აქვს, რამდენიმე მოჭიდავე კი დამამშვიდებელ წრეშია გადასული. 

თავისუფალ ჭიდაობაში ოთხივე წონაში გვყავს ფინალისტი, ამ ოთხიდან კი ორში ქართულ-ირანული, ხოლო ორშიც ქართულ-აზერბაიჯანული ფინალი გაიმართება. 61 კილოგრამში ევროპისა და მსოფლიოს ვიცე-ჩემპიონი ბექა ლომთაძე ფინალში აზერბაიჯანელთა მსოფლიოს მესამე პრიზიორ აჰმედნაბი გვარზატილოვს დაეჭიდება, 70-ში კი ევროპის მესამე პრიზიორი კოტე ხაბალაშვილი ირანელ ემამიჩოგაეი იონესს შეხვდება. ფინალში ზურაბ ერბოწონაშვილიც (79) ირანელის დამარცხებას ეცდება - ბაჰმან ტეიმოურის, ევროპის მესამე პრიზიორ ირაკლი მწითურს (92) კი მეტოქედ აზერბაიჯანელი შამილ ზუბაიროვი ეყოლება.

პირველმა დღემ ბევრი სიურპრიზიც შემოგვთავაზა, თუმცა მთავარი მაინც 70 კილოგრამში მსოფლიოს ჩემპიონ ზურაბ იაკობიშვილის მარცხი გვგონია - პირველივე წრეში დამარცხდა ლევან ქელეხსაშვილთან. ქელეხსაშვილმა მერე გია ავალიანსა და ვლადიმერ გამყრელიძესაც მოუგო და ნახევარფინალში გავიდა, თუმცა იქ ირანელ იონესთან დამარცხდა და თავად გადავიდა დამამშვიდებელში, იაკობიშვილმა კი მედლისთვის ბრძოლის ყველანაირი შანსი დაკარგა. ტურნირში საერთოდ არ გამოსულან ნიკოლოზ კენჭაძე (79) და დავით მარსაგიშვილი (92). 

ლომთაძე საკვალიფიკაციო ეტაპზე ისვენებდა, მეოთხედფინალში კი ირანელი იაკჰკეში მოჰამადბაგეი დაამარცხა, ხოლო ნახევარფინალში აზერბაიჯანელ ფარვიზ იბრაგიმოვს წმინდად, 13:0 მოუგო. თუმცა პირველ პერიოდში მხოლოდ ერთი ქულა აართვა; სამაგიეროდ, მეორეში დაატეხა თავს ქარიშხალი: 20-ოდე წამში ფეხიდან აყვანილი ჩოქბჯენში ვერ ჩაიყვანა, მაგრამ უარესი დამართა: წრის გარეთ 4-ქულიანზე გადააგდო.

ეპიზოდის განახლებისთანავე ისევ აიყვანა ფეხიდან და ამჯერად დაბლაც ჩააგდო და თან დაატრიალა კიდეც: 9:0. ლომთაძემ ჩვეულებას არც ახლა უღალატა და დიდი ანგარიშით დაწინაურების მიუხედავად, მაინც აგრძელებდა შეტევებს. შეხვედრის დასასრულმაც ასე შეტევაში მოუსწრო და ბოლო წამებზე ულამაზესი ილეთიც შეასრულა: იბრაგიმოვი ორივე ფეხი აიტაცა ჰაერში და წინ გდებით, მოწყვეტით დაახეთქა ლეიბს: 13:0. როგორც გითხარით, ფინალში ლომთაძე მეორე და უფრო ძლიერ აზერბაიჯანელს, მსოფლიოს მედალოსან გვარზატილოვს დაეჭიდება. გვარზატილოვმა წინასწარ შეხვედრებში მიხეილ ბერძნიშვილი დაგვიმარცხა, ვინც დღეს სანუგეშო წრეში გააგრძელებს გამოსვლას. 

70 კილოგრამის ნახევარფინალში სამი ქართველი ჭიდაობდა: ხაბალაშვილმა მირზა სხულუხიას მოუგო, ხოლო ქელეხსაშვილი რომ ირანელთან დამარცხდა, უკვე გითხარით. 

ქართულ ნახევარფინალში პირველი ქულა სხულუხიამ მოიპოვა, როცა მეტოქე წრიდან გაიყვანა. პირველი პერიოდიც ასე დასრულდა, მეორეში კი სხულუხიას პასიურობისთვის 30-წამიანი საჯარიმო ჩაურთეს. თუმცა მის ნაცვლად ხაბალაშვილი გააქტიურდა, ვინც მეტოქე ფეხიდან აყვანით წრიდან გადააგდო და 2:1 დაწინაურდა. მან ამის შემდეგაც გააგრძელა შეტევა, თუმცა უხეშობისთვის ქულა-გაფრთხილებით დაისაჯა და ანგარიში გათანაბრდა, ოღონდ ფრე მაინც მას აძლევდა ხელს. ცოტა ხანში, ხაბალაშვილმა მოახერხა სხულუხიას ჩოქბჯენში ჩაყვანა და 4:2 დაწინაურდა, ოღონდ ვერ დაატრიალა.

სამაგიეროდ, ბოლო წუთზე ორმხრივ შეტევაში უფრო კარგი კოორდინაცია ისევ ხაბალაშვილმა გამოავლინა და კვლავ ჩაიყვანა დაბლა, თუმცა ვერც ამჯერად დაატრიალა. ის 6:2-ით კი დაწინაურდა, მაგრამ ბოლო ნახევარ წუთში ბეწვზე გადაურჩა წაგებას: ისევ ფეხში შედიოდა, როცა სხულუხიამ კარგი ბლოკი დაუყენა და ჯვარედინი მოვლებით „ვერტუშკაზე“ დაიქნია.

მსაჯებმა 2 ქულა მისცეს და ანგარიში 4:6-მდე შეამცირა, თუმცა ცოტა დააკლდა, ბეჭებზე არ დააწვინა, თანაც, თავისუფლად შეიძლებოდა, იმ ეპიზოდში 4-ქულიანი გდებაც გაეკეთებინა, რითაც ანგარიშს გაათანაბრებდა, მაგრამ იმ 4-ქულიანით მოგება მისი იქნებოდა. მისმა მწვრთნელებმა ეპიზოდი გააპროტესტეს, რაც მსაჯებმა არ დააკმაყოფილეს. შედეგად, ხაბალაშვილს ქულა დაემატა, ბოლო წამებზე კი მან ისევ ჩაიყვანა ჩოქბჯენში და საბოლოოდ 9:4 მოიგო. 

ამ წონაში სხულუხია და ქელეხსაშვილი დღეს პირდაპირ ბრინჯაოსთვის იჭიდავებენ, რამაზან მალაკოევი და დანიელ მარქარაშვილი კი სანუგეშოში გააგრძელებენ გამოსვლას ბრინჯაოს მედლისთვის. 

ნიკა კენჭაძის არყოფნაში იქნებ მთავარ ფავორიტად ბოლო პერიოდში მისი მუდმივი მოცილე ტარიელ გაფრინდაშვილი მიიჩნეოდა, მაგრამ ასე არ ფიქრობდა ერბოწონაშვილი - მან ნახევარფინალში 2:1 მოუგო გაფრინდაშვილს. ერბოწონაშვილი თავიდანვე უფრო აქტიური იყო, პირველი ქულაც მან მიიღო აქტიურობისთვის და პირველი პერიოდიც ასე დასრულდა.

მეორეში გაფრინდაშვილმა ფეხში შესვლის მცდელობისას მოძრაობაზე დაიჭირა მეტოქე და ჯვარედინი მკვლებიდან ცდილობდა გადაგდებას, მაგრამ საბოლოოდ მხოლოდ წრიდან გაგდება გამოუვიდა და ერთი ქულა მიიღო: 1:1. ამ შემთხვევაში მაინც ის იგებდა, მაგრამ მოგვიანებით პასიურობისთვის 30-წამიანი საჯარიმო ჩაურთეს. ამ დროში მან ქულა ვერ მოიპოვა და ქულა ერბოწონაშვილმა მიიღო, რაც საბოლოოდ გამარჯვების მომტანი გამოდგა. გაფრინდაშვილი დამამშვიდებლის ფინალშია და დღეს ბრინჯაოსთვის იასპარეზებს, დამამშვიდებელ წრეში ასპარეზობას კი ილია დენტოშვილი და ევსემი შველიძე აგრძელებენ. 

92 კილოგრამში მწითურმა გაამართლა ფავორიტის იმიჯი და ფინალში გამსვლელ შეხვედრაში დამაჯერებლად დაამარცხა ბექა ნადაშვილი: ჯერ აქტიურობისთვის მიიღო ქულა, მერე ფეხიდან აყვანილი 4-ქულიანზე გადააგდო, შემდეგ წრიდანაც გაიყვანა, კონტრილეთზე დაჭერილი ჩოქბჯენშიც ჩაიყვანა, დაატრიალა კიდეც და საბოლოოდ 10:0 მოუგო. ნადაშვილი და მეკი სიმონია დღეს ბრინჯაოსთვის იჭიდავებენ. 

დღესვე მემორიალში მორიგი წონითი კატეგორიების ფალავნები ჩაებმებიან: „თავისუფალთაგან“ 57, 65 და 74-ის, ბერძენ-რომელთაგან კი 60, 67, 77 და 87 კილოგრამების წარმომადგენლები.

ყოველდღიური სპორტული გაზეთი "ლელო"
437
მკითხველის კომენტარები / 0 /
მსგავსი ამბები
რუბრიკის სხვა სიახლეები
;