წლების წინ კატალონიაში ტარდებოდა ტურნირი, რომელსაც სახელად “კატალონიის თასი” ერქვა. რა თქმა უნდა, თავად სახელწოდება გვეუბნება, რომ ამ შეჯიბრებაში მონაწილეობდნენ ის საფეხბურთო კლუბები, რომლებიც სწორედ კატალონიას წარმოადგენდნენ...

ამ ტურნირში, სხვა კლუბებთან ერთად, “ბარსელონაც” მონაწილეობდა. რა თქმა უნდა, “ბარსა” არ თამაშობდა ოპტიმალური შემადგენლობით. მწვრთნელები ხშირად აძლევდნენ თამაშის საშუალებას ახალგაზრდა ფეხბურთელებს და ისეთ მოთამაშეებს, რომლებიც იშვიათად ხვდებოდნენ განაცხადში...

სხვათა შორის, ასეთ პრაქტიკას ნამდვილად მოჰქონდა შედეგი. “კატალონიის თასზე” რამდენიმე ახალგაზრდა ფეხბურთელი წარმოჩნდა. წლების შემდეგ ისინი წარმატებით იცავდნენ კატალონიური გრანდის ღირსებას...

მოკლედ, 1998 წლის 24 მარტს “ბარსელონა” ლეიდაში გაემგზავრა “კატალონიის თასის” ნახევარფინალური მატჩის ჩასატარებლად. ლუის ვან გაალმა, მატჩის მნიშვნელობიდან გამომდინარე, ერთი შეხედვით, არაორდინარული გადაწყვეტილება მიიღო - გუნდის გაძღოლა 35 წლის ჟოზე მოურინიოს ანდო. ჟოზე მაშინ ვან გაალის თანაშემწე იყო...

მოურინიომ ამ შეხვედრისთვის “ბარსელონას” ძირითადი შემადგენლობის წევრებთან ერთად, ახალგაზრდული გუნდიდანაც შეარჩია საინტერესო ბიჭები. მათ შორის იყვნენ 19 წლის კარლეს პუიოლი, ვისაც უკვე გაეფორმებინა პროფესიული კონტრაქტი “ბარსელონასთან”, და 18 წლის ჩავი ერნანდესი.

ჩავიმ სულ რამდენიმე ვარჯიშის ჩატარება მოასწრო ძირითად შემადგენლობასთან ერთად. ეს მაშინ, როცა პუიოლს ტიტულარებთან ვარჯიშის მეტი გამოცდილება ჰქონდა. მოურინიომ ორივე მათგანი ძირითად შემადგენლობაში დააყენა. “ბარსელონამ” 2:1 მოიგო.

ჩავიმ იმ შეხვედრაში 4-ნომრიანი მაისურით ითამაშა. სწორედ ამ ნომრით ირჯებოდა “ბარსასთვის” გაცილებით სერიოზულ შეხვედრებში კატალონიელ ქომაგთა კერპი პეპ გვარდიოლა.

“ბარსას” შემადგენლობაში ორივე გოლი ჟოფრეი მატეუმ შეაგდო. საინტერესოა, რომ “ლეიდამ” შეხვედრის ბოლო წუთებზე გარდასახა გოლად თავისუფალი დარტყმა და გოლი... ტიტო ვილიანოვას ანგარიშზე ჩაიწერა. გავა დრო და ტიტო, რომელიც რამდენიმე წლის წინ სიმსივნით გარდაიცვალა, “ბარსას” მთავარი მწვრთნელის რანგში მოგვევლინება...

საკითხს სხვანაირად თუ შევხედავთ, ვნახავთ, რომ მოურინიომ სამწვრთნელო კარიერაში პირველი გოლი... ვილიანოვასგან გაუშვა. სხვათა შორის, უშუალოდ თამაშის მსვლელობის დროს არავის შეუმჩნევია, რომ “ბარსელონას” მოურინიო მოძღვრავდა, რადგან ვან გაალიც სათადარიგოთა სკამზე იჯდა. პრესკონფერენციაზე თავად მოურინიომ გაამხილა, რომ ვან გაალის ნებართვით გუნდს სწორედ ის ხელმძღვანელობდა.

“დღეს მინდორზე გამოვიდნენ ის ფეხბურთელები, რომლებიც შედარებით იშვიათად თამაშობენ. ამის მიუხედავად, მათ ისე ითამაშეს, როგორც ნამდვილ პროფესიონალებს შეჰფერით და ჩვენ გავიმარჯვეთ. მას შემდეგ, რაც კლუბში მოვიდა ვან გაალი, ახალგაზრდა ფეხბურთელებს განსაკუთრებული ყურადღება ექცევათ. მათთვის შანსის მიცემა ლოგიკური იყო და მიხარია, რომ მათ ბოლომდე გაამართლეს”, - თქვა ჟოზემ მატჩისშემდგომ პრესკონფერენციაზე.

“კატალონიის თასის” იმ გათამაშების ფინალი “ბარსელონასთვის” წარმატებული ვერ გამოდგა - ვან გაალის გუნდი 11-მეტრიანების სერიაში ყველასთვის უცნობ “ეუროპასთან” დამარცხდა. პუიოლს იმ შეხვედრაში არ უთამაშია. რაც შეეხება ჩავის, ის მინდორზე 66-ე წუთზე გამოჩნდა და პენალტების სერიაში გადამწყვეტი დარტყმა ვერ გამოიყენა.

ჩავის ამან წინსვლაში ხელი ვერ შეუშალა. სულ მალე მან “ბარსელონას” ძირითად შემადგენლობაში ითამაშა. კატალონიურმა კლუბმა “მალიორკასთან” 1:2 წააგო, ჩავიმ კი ერთადერთი გოლი მიითვალა “ბლაუგრანას” შემადგენლობაში.

პროგრესი გააგრძელა პუიოლმაც და მალე გუნდისთვის შეუცვლელ ფეხბურთელად იქცა. წლების მერე მართლაც საინტერესო წასაკითხია, რომ ამ ორ დიდებულ ფეხბურთელზე კარიერის დასაწყისში დიდი როლი ჟოზე მოურინიომ ითამაშა...