კატასტროფული სხვაობა რუსეთისა და საქართველოს ლიგებს შორის

რუსულ პრემიერლიგაში დიდი ფული რომ დააბანდეს, ეს ამბავი არახალია. თუმცა გულშემატრკივარს ყოველთვის აინტერესებს არა ზოგადი, არამედ კონკრეტული ციფრები - რა შემოსავლები აქვთ ფეხბურთელებს?

ევროპულზე მეტი

რუსეთში ყველაზე დიდ ანაზღაურებას ლეანდრო პარედესი იღებს. 23 წლის არგენტინელმა თავის გამოჩენა სერია A-ში, კერძოდ, "რომაში" თამაშით მოახერხა და რუსეთში გადავიდა. ცხადია, ეს შემთხვევით არ გაუკეთებია - არგენტინელი ნახევარმცველი იტალიაში 8-ჯერ ნაკლებ ხელფასს იღებდა.

რუსული გამოცემა sports.ru იქაური პრემიერლიგის ყველაზე მაღალანაზღაურებადი (წლიური შემოსავლის მიხედვით) მოთამაშეების სიას 2015 წლიდან ყოველ სეზონში აქვეყნებს. 2018 წელს ათეული, რომელშიც ქართველები არ არიან, ასე გამოიყურება:

ფეხბურთელი კლუბი ხელფასი

ლეანდრო პარედესი ზენიტი 5.0
ვედრან ჩორლუკა ლოკომოტივი 4,5
ბრანისლავ ივანოვიჩი ზენიტი 4,1
მანუელ ფერნანდეში ლოკომოტივი 3.8
კუინსი პრომესი სპარტაკი 3.8
არტიომ ძიუბა არსენალი 3.6
ლუიშ ადრიანო სპარტაკი 3.5
ალექსანდრ კოკორინი ზენიტი 3.3
დომენიკო კრიშიტო ზენიტი 3.0
ფიოდორ სმოლოვი კრასნოდარი 2.9
* თანხები მოცემულია ევროში

მათ შორის, ქართველებიც...

როგორც ვთქვით, ეს მონაცემები 2015 წლიდან ქვეყნდება და სარეკორდო ციფრები სწორედ იმ წელს და 2016-ში დაფიქსირდა: 7 მილიონ ევროს "ზენიტში" ბრაზილიის ნაკრების თავდამსხმელი ჰალკი იღებდა, ხოლო მოსკოვის "დინამო" გერმანიის ეროვნული გუნდის ყოფილ ფორვარდ კევინ კურანის 5,7 მილიონს უხდიდა.

ნაკლები მაქსიმუმი მხოლოდ 2017 წელს დაფიქსირდა, როცა "ზენიტში" ხავი გარსია, ხოლო "ლოკომოტივში" ვედრან ჩორლუკა 4,5-4,5 მილიონს იღებდნენ. ამ ოდენობის ჯამაგირს ფეხბურთელებს მხოლოდ ევროპის რამდენიმე ლიგასა (ინგლისი, ესპანეთი, გერმანია, საფრანგეთი, იტალია) და ჩინეთში თუ უხდიან.

საშუალოდ კი რუსები თავიანთ ლიგაში უფრო მეტ ფულს იხდიან, ვიდრე იტალიისა და ესპანური კლუბების დიდი ნაწილი - გაზი და ნავთობი ამის საშუალებას ნამდვილად იძლევა.

გამოცემამ არა მხოლოდ რუსული პრემიერლიგის ყველაზე მაღალანაზღაურებადი მოთამაშის ათეული, არამედ 68-კაციანი სიაც გამოაქვეყნა. ტოპებში ქართველებიდან მხოლოდ გიორგი ჯიქია და საბა კვირკველია მოხვდნენ: ორივე მათგანი 1,7-1,7 მილიონ ევროს იღებს და რეიტინგში 58-59-ე ადგილებს ინაწილებენ. სხვათა შორის, 2015 წლის შემდეგ ეს პირველი შემთხვევაა, როცა ქართველები რუსული ლიგის ყველაზე მაღალანაზღაურებად ფეხბურთელებში მოხვდნენ.

საიდან ეს ინფორმაცია?

პირველი კითხვა, რაც ამასთან დაკავშირებით იბადება - რამდენად ზუსტია ეს ციფრები? სპორტს.რუ-ს ცნობით, მონაცემები მიიღეს საფეხბურთო კლუბების ხელმძღვანელებისგან, სპორტული დირექტორებისგან, მწვრთნელებისგან, აგენტებისა და თავად მოთამაშეებისგან.

რეიტინგის მაჩვენებლები მოთამაშეთა გარანტირებული წლიური შემოსავალია, მათ შორის, ხელფასი და საკონტრაქტო თანხაც, რაც ხელშეკრულების ვადის მიხედვით რამდენიმე წელიწადზეა გათვლილი.

მაგალითად, "ზენიტში" ბრანისლავ ივანოვიჩის წლიური ანაზღაურება 3,3 მილიონი ევროა. ამას ემატება საკონტრაქტო თანხა - სერბმა ორწლინახევრიან ხელშეკრულებაში 2 მილიონი ევრო მიიღო: ანუ მისი წლიური შემოსავალი ასე ითვლება: ხელფასი (3,3 მილიონი)+საკონტრაქტო თანხის წლიური ნაწილი (0,8 მილიონი). გამოვიდა 4,1 მილიონი ევრო.

აღსანიშნავია, რომ ამ თანხებში არ შედის პრემიალურები, რაც ასევე სოლიდურ ციფრებს აღწევს. და კიდევ: სპორტს.რუ-ს ცნობით, ეს სუფთა შემოსავლებია, ანუ გადასახადების შედეგად დარჩენილი თანხები.

ყაზაიშვილი ამერიკაში დაფასდა

სხვა მაღალანაზღაურებადი ქართველი ფეხბურთელებიდან ინფორმაცია მხოლოდ ვაკო ყაზაიშვილზეა ცნობილი, რაზეც "ლელო" უკვე წერდა ამერიკულმა საიტმა Centertinesoccer.com-მა MLS-ის ფეხბურთელთა ასოციაციის 2017 წლის მონაცემები გამოაქვეყნა, საიდანაც ვიგებთ, რომ ყაზაიშვილი "სან ხოსეს" ყველაზე მაღალანაზღაურებადი ფეხბურთელია - სეზონში 1,4 მილიონ დოლარს იღებს. ამ მაჩვენებლით ის 23-ე ადგილზეა.

სიას "ტორონტოს" შემტევი ნახევარმცველი, იტალიის ნაკრებში ნათამაშები სებასტიან ჯოვინკო ლიდერობს, რომელიც წელიწადში 5,6 მილიონ დოლარს გამოიმუშავებს. ანუ ამერიკასა და რუსეთში ყველაზე მაღალანაზღაურებადი მოთამაშეები დაახლოებით ერთსა და იმავე თანხას იღებენ.

თუმცა, რუსულ ფეხბურთში ყველაფერი რთულად არის და უცნობია ამ თანხებიდან, ოფიციალურად თუ არაოფიციალურად, რამდენი რჩებათ მენეჯერებს, კლუბის ხელმძღვანელებს, რაც რუსეთში (და არა მარტო) დამკვიდრებული პრაქტიკაა.

ამ დროს, საქართველოში...

ცხადია, ჩვენთან ამხელა შემოსავლებზე გაფიქრებაც სასაცილოა. იყო დრო, თბილისის "დინამო" რამდენიმე წამყვან მოთამაშეს თვეში 20 ათას დოლარს, ანუ წელიწადში თითქმის ნახევარ მილიონ დოლარს უხდიდა, მაგრამ ეს დრო წარსულს ჩაბარდა.

ახლა ლიდერ გუნდებში მაქსიმალური ანაზღაურება 10 ათასი ლარიც არ არის. წამყვანი მოთამაშეების უმრავლესობა 3,5 ათასიდან 6 ათას ლარამდე თუ იღებს. ცხადია, ეს საქართველოში დიდი ციფრია, მაგრამ სრულიად არასაკმარისია, გუნდები თუნდაც საშუალოევროპული დონის მოთამაშეებით რომ გაძლიერდნენ.

ყაზახეთ-აზერბაიჯანში დიდი ფული აქვთ და იქ ეს მოახერხეს - ლეგიონერებს 5 ათასიდან 20 ათასამდე დოლარს უხდიან, გამორჩეულებს - 50-60 ათასსაც კი.

ყოველდღიური სპორტული გაზეთი "ლელო"
4188
მკითხველის კომენტარები / 1 /
DAVE
0
მესმის, რომ ეს "საიტი" არის სპორტული და მთელი აქაური მკითხველის ინტერესიც შესაბამისად სპორტული სახეობებია, მაგრამ მე ვფიქრობ, დღეისთვის ქვეყანა არაა მზად, რომ მოიზიდოს მაღალანაზღაურებადი უცხოელი ფეხბურთელები, საწუხაროდ კერძო სექტორიც არ დებს ამ მიმართულებით ფულს. იგივე სხვაობა იქნება ხელფასებში, ექიმებში, ფინანსიტებში, იურისტებში, მშენებლებში და ა.შ. პროფესიონალებში და არ იქნება ურიგო, ამ ეტაპზე მაღალი დონის მსგავსი ხალხის მოზიდვაში ჩაიდოს თანხებიდ ა ქვეყნის განვითარებში და სპორტიც თავისთავად მიჰყვება ქვეყნის განვიტარებას. ამჟამად კი სპორტული სახეობების შენარჩუნებაზე ვართ.
DAVE-S
0
ნაციონალიხარ ხომ? ვაშაძემ დაგიწერა ტექსტი ალბათ,,
09:47 2019.07.15
მსგავსი ამბები
რუბრიკის სხვა სიახლეები
;