კაცი, რომელიც დიდი ხანია ქართულ ფეხბურთში ფულს დებს: ...თუ ამას შევძლებთ, კრიზისიდან უფრო ძლიერები გამოვალთ, ამბობს გაგრას დამფუძნებელი ბესიკ ჩიხრაძე

რა გავლენას მოხდენს კორონავირუსის პანდემია ქართულ ფეხბურთსა და კლუბებზე? ამის შესახებ "ლელო” ბესიკ ჩიხრაძეს ელაპარაკა. "გაგრას" დამფუძნებელსა და პრეზიდენტს, ფეხბურთის ფედერაციის აღმასკომის წევრს ჩვენი გამოცემა უკრაინაში დაუკავშირდა...

- როგორ შეფასებდით ფეხბურთისთვის ახლანდელ ვითარებას?

- ახლა იმდენად გაურკვეველი ვითარებაა, ზუსტად მე კი არა, ვერავინ შეაფასებს და ვერ იტყვის, ხვალ რა იქნება. გარკვეული მხოლოდ ერთია - კორონავირუსი ქართულ და მსოფლიო ფეხბურთს ძალიან აზარალებს. ახლა ბიზნესი იმდენად ცუდ მდგომარეობაშია, ფეხბურთისთვის არ სცხელა.

ევროპაშია უდიდესი პრობლემები და, აბა, ჩვენთან რა იქნება?! ეკონომიკური კოლაფსის წინა პერიოდში ვართ და არ ვიცით, ხვალ რა გველის. ახლა ისეთი კრიზისია, პრობლემა აბსოლუტურად ყველა კლუბს შეეხება. ვისაც კერძო მეპატრონე ჰყავს, მას შემოსავლები უკიდურესად შეუმცირდა და არ ვიცით, სახსრებს საიდან მოიზიდავენ. მეორე მხრივ, ასეთ დროს კიდევ უფრო ძნელი წარმოსადგენია, როგორ შესავსებენ ბიუჯეტს ის კლუბები, რომლებიც მხოლოდ სახელმწიფოს დაფინანსების იმედად არიან.

- ვითარების გამოსწორებას მალე იმედოვნებთ?

- ამის პროგნოზირება შეუძლებელია. კორონავირუსის პანდემია პიკს უახლოვდება და არავინ უწყის, რა შეიძლება მოხდეს.

- ასეთ პირობებში სახელმწიფო შეძლებს, რომ ქართული ფეხბურთი და, მათ შორის, კლუბები ისევ დააფინანსოს?

- არ არის გამორიცხული, რომ სახელმწიფომ ეს ვეღარ შეძლოს. მთავარია, როდის გამოვალთ კრიზისიდან. მაგრამ ეს ჯერ არავინ იცის, რადგან რეალურად, ახლა კრიზისის დასაწყისში ვართ. ბევრი ცუდი ამბავი მახსენდება - 2008 წელს რუსეთმა ჩვენთან ომი რომ დაიწყო, იმავე წელს მსოფლიო ეკონომიკური კრიზისმაც მაგრად დაგვარტყა.

უკრაინაში ვცხოვრობ და კარგად მახსოვს 2014 წელიც, რამხელა პრობლემები შეიქმნა რუსეთის აგრესიის შემდეგ - უკრაინული გრივნა უცებ დაეცა. მე ბევრჯერ მომიხდა ბიზნესის ხელახლა წამოწყება, მაგრამ ყველაზე სამწუხარო და დასაფიქრებელი ის არის, რომ მსგავსი კრიზისი ჩვენთან არასოდეს ყოფილა - ასე მოხდა მხოლოდ შავი ჭირის გავრცელებისას და მეორე მსოფლიო ომის დროს.

ერთმა პატარა ვირუსმა უზარმაზარი სამყარო შეარყია. ამიტომ, ვერავინ იტყვის, ქართულ და მსოფლიო ფეხბურთში რა იქნება. ვიმეორებ, მხოლოდ ის ვიცი, რომ დიდი პრობლემები გველის. რუსეთთან 2008 წლის ომის შემდეგ ამერიკა დაგვეხმარა. ახლა ასე ვეღარ იქნება! ვინ დაგვეხმარება? ყველას პრობლემები აქვს. ამიტომ მეშინია, კურსი უცებ რომ დავარდა.

ახლა მთავრობამ უნდა ივაჟკაცოს. თუმცა, ადრე თუ გვიან, მჯერა, ვითარება დალაგდება. ფეხბურთი კი მანამ იქნება, სანამ კაცობრიობა იქნება. ზოგადად, ასე მგონია, რომ ღმერთმა წარღვნის ნაცვლად ახლა ეს პრობლემა გამოგვიგზავნა, რათა დავფიქრდეთ. თუ ამას შევძლებთ, ამ პროცესიდან უფრო ძლიერები გამოვალთ. ეს ჩვენზეა დამოკიდებული.

2449
მკითხველის კომენტარები / 0 /
მსგავსი ამბები
რუბრიკის სხვა სიახლეები
;