კაცი, რომელმაც ბრაზილიას მარაკანაზე მოუგო - რევაზ ჩელებაძე დეტალებს იხსენებს: უზრდელ ჟუნიორს მამაპაპურადაც მივაგინე [VIDEO]

იყო ასეთი დროც: საბჭოთა კავშირის ნაკრებმა 1980 წლის ზაფხულში "მარაკანაზე" ამხანაგურ მატჩში 2:1 მოუგო ბრაზილიას. საბჭოთა ფეხბურთის ერთ-ერთ ყველაზე ხმაურიან გამარჯვებაში სამი ქართველი, თბილისის "დინამოს" სამი ვარსკვლავი მონაწილეობდა - ალექსანდრე ჩივაძე, თენგიზ სულაქველიძე და რევაზ ჩელებაძე. 

ბრაზილია
1
სსრკ
2
15.06.80. რიო დე ჟანეირო. 61526 მაყურებელი.
გოლები: 1:0 ნუნიეში (23), 1:1 ჩერენკოვი (32), 1:2 ანდრეევი (38)
ბრაზილია: რაული, პრესტი ზე სერჟიო, ნუნიეში, ზიკო, სერეზო, სოკრატესი, ბატისტა, ნელინიო, ჟუნიორი, ედინიო, ამარალი
შეცვლაზე შევიდნენ: ედერი, მაურო პასტორი, რენატო
საბჭოთა კავშირი: დასაევი, ბესონოვი, ჩივაძე, ხიდიატულინი, სულაქველიძე, ანდრეევი, გავრილოვი, ჩელებაძე, ჩერენკოვი, რომანცევი, შავლო
შეცვლაზე შევიდნენ: ოგანესიანი, ევტუშენკო
გაფრთხილება: სულაქველიძე
არბიტრი: არნალდო კოელიო (ბრაზილია)

28 წლის წინანდელი ბატალიების გახსენება რევაზ ჩელებაძეს ვთხოვეთ - ქართულ ფეხბურთში ერთ-ერთ ყველაზე გამორჩეულ შემტევს, ვის თვითმყოფად თამაშსაც ვერასოდეს დაივიწყებენ ქართველი გულშემატკივრები.

დიდი მატჩები. ვლადიმერ ბარქაია: არ დამავიწყდება პელეს შეძახილი, საყვირივით ხმა ჰქონდა [VIDEO]

"ეს თამაში არასოდეს დამავიწყდება. მისი ყველა დეტალი მახსოვს და ყველანაირად ვეცდები, არაფერი გამომრჩეს. ეს თამაში მიეძღვნა "მარაკანას" გახსნის 30 წლისთავს. ამ შეხვედრის შემდეგ ეს ლეგენდარული სტადიონი დაიხურა და, როგორც იტყვიან, "რემონტზე" გავიდა.

მატჩს ყველა ბრაზილიელი ვარსკვლავი დაესწრო პელეს გარდა. გარინჩა, დიდი... თამაშში პირველად ბურთი სწორედ დიდიმ შეიყვანა. მე და ანდრეევი ვდგავართ ცენტრში, დიდიმ ერთ-ერთს უნდა დაუგოროს ბურთი. გავწიე გვერდზე ანდრეევი (იცინის)... დიდი ვარსკვლავთცვენა იყო. 1950 წელს ბრაზილიამ რომ ფინალი წააგო ურუგვაისთან, ის გუნდი მთლიანად სტადიონზე გახლდათ.

ბედი არ გინდა? თამაშის წინა დღეს კისერი გამიშეშდა. იმ ზომამდე მივედი, რომ შევედი ნაკრების მთავარ მწვრთნელთან, კონსტანტინ ბესკოვთან და ვუთხარი, თუ შეიძლება, ხვალ რომ ვერ ვითამაშო - მეთქი. არაო, ძალიან მჭირდებიო. მეც რაღა დამრჩენოდა, "მარაკანაზე" ყოველდღე თამაშის ბედნიერება ვის აქვს? სასწაული იყო: მორჩა თამაში თუ არა, ეგრევე გამიარა კისრის ტკივილმა.

...მატჩის წინ ბესკოვმა გვითხრა, თუ ბოლომდე გამოვავლენთ ჩვენს შესაძლებლობებს, მოვიგებთო. სიმართლე გითხრათ, არ გვჯეროდა ამის. როგორია, ბრაზილიას ეთამაშები მარაკანაზე. ეს იყო ერთადერთი მატჩი, რომლის დაწყების წინაც პრაქტიკულად არ გამიკეთებია მოთელვა. ვიდექი და ძირითადად იმას ვუყურებდი, როგორ ვარჯიშობდნენ ბრაზილიელები.

იმ ბრაზილიის ნაკრებში, გვარებს რომ გადავხედოთ, უდიდესი ვარსკვლავები თამაშობდნენ. მაგრადაც შემოგვიტიეს და ანგარიშიც გახსნეს. მერე თერთმეტმეტრიანი გააფუჭეს. თანდათან მოვიდა შეგრძნება, რომ იმ კონკრეტულ თამაშში მაინც არაფრით ვიყავით მათზე უარესები. ჩვენ გამორჩეული ვარსკვლავები გვყავდა.

ბესკოვი ძალიან ლამაზ ფეხბურთს ათამაშებდა ნაკრებს. ერთი შეხება, პასი, თავისუფალი სივრცეების ათვისება. ეს იყო მისი ფეხბურთი. ჩერენკოვმა და ანდრეევმა შეაგდეს გოლები. ჩერენკოვი თავისი გაქანებით უდიდესი ფეხბურთელი იყო...

თუ იმ შეხვედრაში საბჭოთა კავშირის ნაკრებში საუკეთესო უნდა დავასახელო, საშა ჩივაძეს დავასახელებდი. ისე წყნარად, ისე მაგრად ითამაშა, რომ მისი სიმშვიდე ყველა ჩვენგანს გადმოგვედო.

გავიხსენებ ერთ სახალისო ისტორიას, რომელიც ამ თამაშს უკავშირდება. ერთ ეპიზოდში ბრაზილიელ ჟუნიორს კორპუსი ჩავუდგი და ის ძირს დავარდა. რომელი უცხო ენა მე ვიცოდი და წამოსაყენებლად ხელი რომ გავუწოდე, პარდონ - მეთქი, ვუთხარი. ხელი ხელზე ამიკრა. არ მესიამოვნა. ზედ სახესთან გავუჩერე ფეხი და მამაპაპურ - ქართულადაც მივაგინე.

თენგიზ სულაქველიძე იხსენებს როგორ დაამარცხა არგენტინა მარადონითურთ [VIDEO]

ამ დროს ქობულეთში თურმე ჩემი ბიძაშვილი უყურებს ამ თამაშს და ძალიან ბრაზობს - ქობულეთიდან ჩასული მარაკანაზე თამაშობს და მაინც ვერ ისვენებს, ჟუნუიორს ცხვირწინ უტრიალებს ფეხებსო. არ უდა დაამტვრიო ახლა ამას ფეხებიო?!

სამმა ქართველმა ვითამაშეთ იმ მატჩში. თენგიზ სულაქველიძე მარცხენა მცველად იყო გამწესებული და მაგრად იომა. ჩივაძეზე უკვე გითხარით. მე კი არ გამომივიდა თამაში, იმის 50 პროცენტიც კი ვერ ვაჩვენე, რაც შემეძლო. და მაინც, ორიდან ერთი საგოლე შეტევა მე წამოვიწყე. გატანაც შემეძლო, თუმცა ვერ შევასრულე. არადა, მაშინ საუკეთესო ფორმაში ვიყავი.

...ახლაც ყურებში მიდგას ექო. მოგუგუნე, გადაჭედილი მარაკანას ექო, რომელიც არასოდეს დამავიწყდება..."

5926
მკითხველის კომენტარები / 0 /
მსგავსი ამბები
რუბრიკის სხვა სიახლეები