კაჭარავა რჩება, ჯერჯერობით... მაგრამ ხვალ? ცხადაძე, ქეცბაია...

გუშინ თბილისის "დინამოს" მწვრთნელ კახა კაჭარავასთან დაკავშირებით დიდი აჟიოტაჟი იყო. დილიდან ურთიერთგამომრიცხავი ინფორმაციები ვრცელდებოდა. მივყვეთ თანამიმდევრობით და ვნახოთ, რა მივიღეთ დღის ბოლოს...

დილითვე გავარდა ხმა - თასის ნახევარფინალში წაგების გამო, კახა კაჭარავამ პასუხისმგებლობა საკუთარ თავზე აიღო და თბილისის "დინამოს" მთავარი მწვრთნელის პოსტი დატოვაო. "ლელოს" ინფორმაციით, მას განცხადება დაწერილი ჰქონდა, თუმცა "დინამოს" პრეზიდენტი რომან ფიფია ცოცხალი თავით არ აკმაყოფილებდა ამ განცხადებას...

კაცმა რომ თქვას, გასაკვირი არაფერია - ორივე მხარეს აქვს მოტივი განშორებისთვის. უდიდესი ალბათობით, საქართველოს ყველაზე ტიტულოვანი კლუბი ამ სეზონში ხელცარიელი დარჩება. "დინამო" ვერ გავიდა თასის ფინალში და ეროვნულ ლიგაშიც ჩემპიონობის შანსი ძალიან მცირე აქვს.

გაურკვევლობა გაგრძელდა დღის განმავლობაში და ამას ხელი შეუწყო თავად "დინამომაც", რომელმაც, მედიით გავრცელებული ინფორმაციების მიუხედავად, ოფიციალური ინფორმაცია არ გაავრცელა - არც ისე, არც ასე. ამან კიდევ უფრო გაამყარა ეჭვი, რომ "დინამოში" "რაღაც" ხდებოდა...

ერთადერთი, ცნობილი იყო რომან ფიფიას რეაქცია "გაგრასთან" წაგებული ნახევარფინალის შემდეგ: "დინამოს" ბოლოდროინდელი ასპარეზობა და შედეგები, როგორც გულშემატკივრებს, ასევე მეც, კითხვებს მიჩენს. ახლო მომავალში გაკეთებული იქნება შესაბამისი დასკვნები. ჩემპიონატში კი ბოლომდე ვიბრძოლებთ პირველი ადგილისთვის", - თქვა ფიფიამ.

საღამოსკენ გავრცელდა ინფორმაცია, რომ "დინამოს" პრეზიდენტის სურვილია, კაჭარავამ სეზონის ბოლომდე იმუშაოს, რადგან გუნდს ეროვნულ ლიგაში ჯერ კიდევ აქვს გადასაწყვეტი სატურნირო ამოცანები და ეს სწორედ ამ მწვრთნელის ხელში უნდა მოხდეს. ხოლო იმ შემთხვევაში, თუ კაჭარავას წასვლის საკითხი საბოლოოდ გადაწყდებოდა, "დინამოს" სეზონის ბოლომდე მთავარი მწვრთნელის ასისტენტი ზაურ სვანაძე გაწვრთნიდა...
და ბოლო ამბები "დინამოს" ბანაკიდან. როგორც შევიტყვეთ, კაჭარავა, ამ ეტაპზე, მთავარ მწვრთნელად რჩება და დღეს ვარჯიშსაც ჩაატარებს. თუმცა არ არის გამორიცხული, მოკლე ხანში მაინც მოხდეს მნიშვნელოვანი ცვლილებები...

ცხადაძე, ქეცბაია...

ერთი სიტყვით, კაჭარავას წასვლა მხოლოდ დროის საკითხია და "დინამოში" უკვე ფიქრობენ ახალ მწვრთნელზე, დიდი ალბათობით, ქართველ სპეციალისტზე. როგორც ვთქვით, ერთი ვარიანტი სვანაძეა. მეორე - კახა ცხადაძე. გვაქვს ინფორმაცია, რომ "დინამოში" დაინტერესდნენ ცხადაძის ყაზახური კონტრაქტით. საქმე ისაა, რომ საქართველოს ნაკრების ექსთავკაცს "ორდაბასისთან" ხელშეკრულება ჩემპიონატის დასრულებისთანავე (ბოლო ტურიღა დარჩა) უმთავრდება.
თავის დროზე, ცხადაძეს "დინამოში" უმუშავია და ტიტულებიც მოუგია. თუ ყაზახეთში "ორდაბასიზე" უკეთესი შეთავაზება არ ექნება, შესაძლოა დათანხმდეს კიდეც საქართველოში დაბრუნებას, თუ თბილისურმა გრანდმაც რეალურად მოინდომა მასთან თანამშრომლობა.

თემურ ქეცბაია - ერთი შეხედვით, რატომაც არა?! საქართველოს ნაკრების კიდევ ერთი ყოფილი მწვრთნელი ამჟამად უმუშევარია. თუმცა, მიზეზთა გამო (ჩემპიონატის დონე, ფინანსური პირობები, ურთიერთობები ქართულ მედიასთან), ეს უფრო ნაკლებად არის მოსალოდნელი.

შესაძლებელია, განხილვის ღირსი იყოს თამაზ პერტიას კანდიდატურაც. პერტიამ წლების განმავლობაში იმუშავა ლატვიაში და დიდი გამოცდილება დააგროვა.
და ბოლოს - ჩვენი ინფორმაციით, რომან ფიფია შეხვდა რობერტო ლანდის, იტალიელ სპეციალისტს, რომელიც ვერც ფოთის "კოლხეთში" გაჩერდა დიდხანს და ვერც - "ცხინვალში". სიამოვნებით მოვაწერთ ხელს იმაზე, რომ ეს ინფორმაცია სიმართლე არ იყოს. "დინამოს" ახლა ნამდვილად არ აქვს ექსპერიმენტების დრო...

ყოველდღიური სპორტული გაზეთი "ლელო"
1531
მკითხველის კომენტარები / 2 /
cool
0
vai dinamos patrons
gulshematkivari!
1
batono roland ganixilet U19 yofili mwvrtneli kipiani, martlac rom tavisi saqmis profesionalia, mouvlis dinamos! guldasawyvetia, rom dges es bichi ar chans qartul fexburtshi. neta sad migvaweobs?! arada calsaxad gvchirdeba misnairi profesionalebi- rogorc mwvrtnwli da rogorc menejeti! gunds menejmenti schirdeba! me didi gulshematkvar yifianis!
მსგავსი ამბები
რუბრიკის სხვა სიახლეები
;