კახა გოგიჩაიშვილი: მძიმე ჯგუფია და აქ არაერთი ქულა დაიკარგება

საქართველოს ეროვნული ნაკრების ყოფილ გარემარბ კახა გოგიჩაიშვილს, ვინც სამწვრთნელო ასპარეზზეც მოსინჯა ძალა, "ლელო" საქართველოს ნაკრების თაობაზე ესაუბრა.

რა თქმა უნდა, ჩვენი ინტერვიუ ევროპის ჩემპიონატის შესარჩევი ჯგუფის შეფასებით დაიწყო...

- მძიმე ჯგუფია. დანია, შვეიცარია და ირლანდია ძლიერი გუნდები არიან. შეიძლება, ჩვენთვის უფრო იოლი წილისყრა ყოფილიყო, მაგრამ თავისუფლად შეიძლებოდა, უფრო რთულ ჯგუფშიც მოვხვედრილიყავით. საქართველოს ნაკრების ბოლოდროინდელი პროგრესიდან გამომდინარე, მიმაჩნია, რომ ყველასთან შეიძლება თამაში. გრანდი აგვცდა და ესეც სათვალავშია ჩასაგდები. ასევე უნდა გავითვალისწინოთ ისიც, რომ ძალიან თანაბარი ჯგუფია და არაერთი ქულა დაიკარგება. ამის ვარაუდი აქედანვე შეიძლება.

- საქართველოს ნაკრების ბოლოდროინდელ თამაშს როგორ აფასებთ?

- მხოლოდ დადებითად! ერთი ამოსუნთქვით მოიგო ჯგუფი და ეს ნამდვილად არ არის იოლი საქმე. საქართველოს ნაკრებმა ეს შეძლო, რაც უდავოდ დასაფასებელია. გარდა ამისა, ყველა ვამჩნევთ პროგრესს და ეს გვახარებს. საქართველოს ნაკრების ფეხბურთელების მხრიდან ყველა შეხვედრაში შეიმჩნეოდა უდიდესი მონდომება და ესეც არ არის მეორეხარისხოვანი მომენტი.

- რა შეცვალა ვლადიმირ ვაისმა ნაკრებში?

- პირველ რიგში ის, რომ საქართველოს ნაკრები მის ხელში უფრო მეტად თავდაჯერებულია და ეს მნიშვნელოვანია. არანაკლებ მნიშვნელოვანია ისიც, რომ ჩვენ შევძელით და ვისწავლეთ მოსაგები თამაშების მოგება. ყველა ფეხბურთელი იღებს კონკრეტულ დავალებას და ასრულებს მას. ჩვენ შეიძლება ვთქვათ, რომ ეს გუნდები, რომელთაც მოვუგეთ, არ არიან გრანდები, მაგრამ ადრე რამდენჯერ გაგვჭირვებია ასეთ ნაკრებებთან და ვერც მოგვიგია. ესეც ხომ გვახსოვს? თან დღეს ყველამ ისწავლა თამაში და დონე არნახულადაა გათანაბრებული.

- რას იტყვით ერთა ლიგის ნახევარფინალში საქართველოს ნაკრების მეტოქე ბელარუსის უპირველეს გუნდზე?

- ბელარუსებს ტრადიცია რომ აქვთ, ეს ყველამ იცის. მე ვნახე მათი თამაშები ერთა ლიგაზე და შემიძლია ვთქვა, რომ ამ გუნდის საუკეთესო რგოლი არის დაცვა. პრინციპში, ჩემი თქმა რად უნდა, სტატისტიკას რომ ჩახედო, ჩანს - ერთი გოლიც კი არ გაუშვიათ ჯგუფში. რა თქმა უნდა, ამ ბარიერის გავლა შეგვიძლია. იქამდე ჯერ შორია და დიდი იმედი მაქვს, ოპტიმალური შემადგენლობით ვითამაშებთ. გარდა ამისა, ერთი უდიდესი კოზირიც გვაქვს...

- საშინაო კედლებს გულისხმობთ?

- რა თქმა უნდა! სავსე ეროვნულ სტადიონზე მოგება ბელარუსს კი არა, მსოფლიო ფეხბურთის გრანდებსაც უჭირთ.

- რომელ ფეხბურთელს გამოარჩევდით საქართველოს ნაკრებში ერთა ლიგაზე?

- ცხადია, გიორგი ჩაკვეტაძეს. მის გარშემო ახლა დიდი აჟიოტაჟია, მაგრამ მჯერა, ის ამას გაუძლებს. მე რომ "დინამოს" მთავარი მწვრთნელი ვიყავი, ის უკვე ვარჯიშობდა ჩვენთან. ძალიან თავმდაბალი და თავის საქმეზე შეყვარებული ბიჭია.

- და რა არის მთავარი ახალგაზრდა ფეხბურთელისთვის, რომ ზრდა გეგმაზომიერად გააგრძელოს?

- ის, რომ რეჟიმი დაიცვას და ვარჯიშებზე ბოლომდე დაიხარჯოს. ფეხბურთი ისეთი რამაა, არავის პატიობს არასერიოზულ დამოკიდებულებას. ბევრი დაიღუპა ამის გამო, ან ვერ ითამაშა ისეთი ფეხბურთი, როგორიც უნდა ეთამაშა. ამაში უცნაური ნამდვილად არაფერია. ფეხბურთს ეს წესი აქვს. მას ბოლომდე უნდა უერთგულო.

ყოველდღიური სპორტული გაზეთი "ლელო"
975
მკითხველის კომენტარები / 0 /
მსგავსი ამბები
რუბრიკის სხვა სიახლეები