კახა კალაძე: ამ გაუბედურებულ ადგილას საუკეთესო სტადიონი აშენდება! კობიაშვილი თბილისის მასშტაბით ახალ პროექტებს აანონსებს...

გლდანი მე-5 და მე-7 იკროაიონებს შორის საფეხბურთო ცენტრის მშენებლობა დაიწყო. ყოფილი რადიოქარხნის მიმდებარე ტერიტორიაზე ცერემონიას საქართველოს ფეხბურთის ფედერაციის პრეზიდენტი ლევან კობიაშვილი და თბილისის მერი კახა კალაძე დაესწრნ. მათ საძირკველში სიმბოლური კაფსულა ჩააგდეს...

გლდანის საფეხბურთო ცენტრში ხელოვნურსაფარიანი სტანდარტული (102X68) მოედანი მოეწყობა, 200 მაყურებელზე გათვლილი ტრიბუნა და ადმინისტრაციული შენობა აშენდება და 250-ლუქსიანი განათება დამონტაჟდება.

მშენებლობის დასრულება 2020 წელს იგეგმება და, რაც ყველაზე მთავარია, სპორტულ კომპლექსს საფეხბურთო სკოლები, ქალთა და მოყვარულთა გუნდები სრულიად უსასყიდლოდ გამოიყენებენ. ამით კი გუნდებსა და საფეხბურთო სკოლებს სერიოზული პრობლემა მოეხსნებათ, რადგან ყველამ ვიცით - დიდი გადასახადების გამო ბევრი გუნდი და სკოლა დაშლილა.

"ფეხბურთის ფედერაციის მიერ მთელი ქალაქის მასშტაბით წამოწყებულ ამ პროექტს  მივესალმებით. ჩვენი ჩართულობა იმაში გამოიხატრება, რომ გადავცემთ მიწას, სფფ კი იღებს ვალდებულებას, სპორტული საფეხბურთო ცენტრები განავითაროს. ჯანსაღი ცხოვრების წესი დანერგვა არის ძალიან მნიშვნელოვანი. მადლობა ლევან კობიაშვილს, რომ ამას ხელს უწყობს. დღეს გლდანში კიდევ ერთი პროექტის განხორციელებას ვიწყებთ. ვინც მე-5 და მე-7 მიკრორაიონებს შორის ცხოვრობს, კარგად იცის ეს სტადიონი, რომელიც გაუბედურებულ მდგომარეობაშია. მაგრამ 2020 წლის სექტემბრისთვის სამუშაოები დასრულებული იქნება და ერთ-ერთი საუკეთესო სტადიონი იქნება, სადაც ბავშვებსა და ახალგაზრდებს ვარჯიშის საშუალება ექნებათ", - ამბობს თბილისის მერი და საქართველოს ნაკრების ყოფილი კაპიტანი კახა კალაძე.

კიდევ რამდენ რაიონში იგეგმება მსგავსი პროექტის განხორციელება? თბილისის მერმა ამის შესახებაც ილაპარაკა: "ანალოგიური მიდგომა და დამოკიდებულება თბილისის ყველა რაიონში გვინდა, რომ იყოს. საფეხბურთო ცენტრების მოწყობა მალე ვარკეთილში დავამთავრებთ. სამუშაოები დაახლოებით ნოემბრის ბოლოსკენ დასრულდება. შემდეგი პროექტი განხორციელდება ნუცუბიძეზე - ისიც ძალიან მაგარი ცენტრი იქნება... საერთოდ, სადაც მსგავსი სივრცეები იქნება, გვსურს, სპორტისთვის მაქსიმალურად ავითვისოთ. ამით მომავალ თაობებს სრული ხელშეწყობა უნდა ჰქონდეთ, რომ იყვნენ სპორტით დაკავებულები და ვარჯიშის საშუალება მიეცეთ".

ლევან კობიაშვილი მომავალ პროექტებს აანონსებს. მისი თქმით, სტადიონების აშენებაზე სახელმწიფო სახსრები არ დაიხარჯება: "ეს იქნება სტანდარტული სტადიონი თავისი ადმინისტრაციული კორპუსით, გასახდელებით, განათებით... ესეც ძალიან მნიშვნელოვანია, რადგან არის პერიოდები, მაგალითად, ზაფხულში, როცა დღისით ისეთი სიცხეა, მხოლოდ საღამოს შეიძლება ვარჯიში. ჩვენი ინტერესია, რომ მსგავსი პროექტი დედაქალაქის ყველა უბანში განვახორციელოთ. გეცოდინებათ, რომ ვარკეთილში ანალოგიური მშენებლობა უკვე დაწყებულია და ნოემბრის ბოლოსკენ გაიხსნება. მიმაჩნია, რომ ეს ძალიან კარგი პროექტია. გლდანისა და ვარკეთილის გარდა, გარწმუნებთ, უახლოეს პერიოდში, ძალიან მალე, სხვა კარგი პროექტების შესახებაც შეიტყობთ".

ფეხბურთის ფედერაციის პრეზიდენტმა სფფ-ის პრიორიტეტი დაასახელა: "თბილისის ყველა უბანს საკუთარი სტადიონი უნდა ჰქონდეს, რომელიც, უპირველეს ყოვლისა, ბავშვთა ფეხბურთს მოემსახურება - ეს არის ჩვენი პრიორიტეტი. ამ სტადიონებით უბნებში არსებულ საფეხბურთო გუნდებსა და სკოლებს მივცემთ საშუალებას, ინფრასტრუქტურა ისე გამოიყენონ, რომ არანაირი თანხ არ გადაადონ. მათ ზრუნვა მხოლოდ ერთზე მოუწევთ - იმუშაონ სწორად, ბევრი ბავშვი მოიზიდონ".

კობიაშვილმა მშენებლობის დაფინანსებასთან დაკავშირებით მნიშვნელოვანი დეტალი გაამხილა: "რაც ყველაზე მთავარია, ამაში სახელმწიფო სახსრებს არ ვითხოვთ. ეს ყველაფერი ფეხბურთის ფედერაციის ფინანსებით აშენდება - ფიფას და უეფას დახმარებით. ძალიან მიხარია, რომ თბილისის მერი და დედაქალაქის საკრებულო ამ პროექტს გვერდში უდგანან და მხარს უჭერენ".

სფფ-ის თავკაცი დარწმუნებულია, რომ ეს პროექტები შედეგს გამოიღებს: "დამთანხმებით, ბოლო წლებში ინფრასტრუქტურა ერთ-ერთი ყველაზე სერიოზული პრობლემა იყო სპორტსა და, კერძო, ფეხბურთში. დარწმუნებული ვარ, ამ პროექტების განხორციელების შემდეგ ფეხბურთის მასობრიობაშიც ძალიან დიდი მატება გვექნება. მიმაჩნია, რომ ქართული ფეხბურთის მომავლისთვის ეს შეუფასებელი პროექტია, რომლის შედეგსაც რამდენიმე წლის შემდეგ დავინახავთ".

1202
მკითხველის კომენტარები / 0 /
მსგავსი ამბები
რუბრიკის სხვა სიახლეები
;