კახა კაჭარავა: ქართული ფეხბურთი მხოლოდ ნაკრების გამო არ უნდა გვაინტერესებდეს

"აი, მაშინ გვეყოლება ძლიერი ეროვნული ნაკრები"...

თბილისის ბორის პაიჭაძის სახელობის "დინამო არენაზე" ლიდერთა მატჩში "დინამომ" "საბურთალო" 2:1 დაამარცხა, სხვაობა 5 ქულამდე შეამცირა და საჩემპიონო ბრძოლას ინტრიგა გაუმძაფრა.

კახა კაჭარავას გუნდმა ბოლო წამზე ლევან შენგელიას ბრწყინვალე გოლის წყალობით გაიმარჯვა.

მატჩის შემდეგ "ლელომ" თბილისის "დინამოს" მთავარ მწვრთნელთან ინტერვიუ ჩაწერა...

- რთული, მაგრამ ძალიან სასურველი გამარჯვება იყო...

- ...ისეთი, რომელმაც 3 კილოგრამი დამაკლებინა.

- ბევრი გინერვიულიათ...

- ყველა თამაშის დროს ასე ვნერვიულობ.

- ფეხბურთის ნეიტრალური გულშემატკივრისთვის "დინამოს" მოგება ნამდვილად სასურველი იყო იმ მხრივ, რომ ჩემპიონატის ფინიშისკენ ოქროსთვის ბრძოლა დაიძაბა...

- მიხარია, რომ ლიდერს მოვუგეთ და სხვაობა შევამცირეთ. ამით საჩემპიონო შანსი შევინარჩუნეთ.

- "საბურთალოსთან" ბოლო ერთ წელიწადში პირველად მოიგეთ. ახლა ეს კიდევ უფრო რთული იყო, რადგან მეორე ტაიმი "გასახდელში გაყოლილი გოლით" დაიწყეთ. ასეთ დროს მოთამაშეებს უჭირთ ხოლმე მობილიზება...

- მეც სწორედ ეს მახარებს, რომ ასეთ რთულ მეტოქესთნ და ასეთ რთულ ვითარებაში გავიმარჯვეთ. ეს ბიჭების დამსახურებაა - თამაში მათ მოიგეს! გოლი პირველი ტაიმის ბოლოს გავუშვით და გეთანხებით, ამის შემდეგ მეორე ნახევრის ჩატარება რთული იყო. მაგრამ ჩემი ფეხბურთელების სასახელოდ უნდა ვთქვა, რომ ბოლომდე იბრძოლეს და ყურები არ ჩამოყარეს. ეს ფსიქოლოგიური ბარიერი გადალახეს, მეორე ტაიმი კარგად ითამაშეს და, მე ვიტყოდი, უპირატესობაც გვქონდა. თუმცა ანგარიშის გათანაბრების შემდეგ უკან დავიხიეთ და ზედმეტად ფრთხილად ვთამაშობდით.

- ეს თქვენი დავალება არ იყო?

- დავალება ნამდვილად არ იყო, მაგრამ ბიჭების ასეთ ქმედებას თავისი ახსნა აქვს. ჩვენ ქაოსურად არ გვითამაშია, ვცდილობდით, სწორად და აზრიანად გვემოქმედა. ეს იყო თანაბარი ბრძოლა და ბიჭები ამიტომაც ფრთხილობდნენ. საბოლოოდ, უმნიშნელოვანესი 3 ქულა მოვიპოვეთ. თუკი წინა წრეში "საბურთალოს" გაუმართლა, ახლა იღბალი ჩვენს მხარეს იყო.

- თქვენ ლევან შენგელიამაც გაგიმართლათ. "დინამოში" ჩარიცხვისას ის ფორმაში არ იყო, მაგრამ პოტენციალი აშკარად ეტყობა...

- მას სათამაშო პრაქტიკა აკლდა, რადგან ტრავმირებული იყო. მაგრამ ის ოსტატობა აქვს, რაც ჩვენ აუცილებლად დაგვჭირდება. მჯერა, ლევანი ფორმას ბოლომდე აღიდგენს და უკეთ ათამაშდება.

- საერთოდ, ამ შეხვედრაში "დინამომ" არაერთგვაროვანი შთაბეჭდილება დატოვა. ეპიზოდურად გუნდი კარგად გამოიყურებოდა, მაგრამ ეპიზოდებში თამაში ჩააგდო.

- იყო შეცდომები და ეს აუცილებლად უნდა გამოვასწოროთ. ჩვენ ამას ვხედავთ და ვცდილობთ, შემდეგ შეხვედრაში ნაკლი გამოვასწოროთ. მაგრამ მთავარია, რომ მეორე ტაიმში "საბურთალომ" რეალური საგოლე მომენტი ვერ შექმნა, ეს კი მთელი გუნდის დამსახურებაა. მომენტები ჩვენ უფრო გვქონდა, მაგრამ, რატომღაც, ბოლო ფაზაში ან გადაცემას ვერ ვაკეთებდით ან არაზუსტად ვურტყამდით. ამაზეც სამუშაო გვაქვს.

- "საბურთალოსთან" გუჯა რუხაიას არყოფნის გამო მარჯვენა მცველის პრობლემა შეგექმნათ. მაგრამ ამის მიუხედავად, ვერ გარისკეთ ლუქმენ გილმორის დაყენება, რომელიც "დინამოში" რანგით მესამე ლიგის კლუბ ხონის "იმერეთიდან" დაიმატეთ. ამ როლში მემარცხენე მცველმა დავით კობოურმა ითამაშა...

- გილმორი ახალი მოსულია, ახალგაზრდაა... ის მოგვეწონა და ამიტომ ავიყვანეთ. მაგრამ ეს ტრანსფერი მომავალზე გათვლით გაკეთდა. ვნახავთ, როგორი პროგრესი ექნება და ამის მიხედვით გადაწყდება, მასთან კონტრაქტს გავახანგრძლივებთ თუ დავემშვიდობებით.

- ჩემპიონატის დარჩენილ ეტაპზე ვთქვათ: როგორ ფინიშს ელით?

- მე "დინამოზე" ვილაპარაკებ. ჩვენ ყველა მატჩში საბრძოლველად და მოსაგებად გავალთ. მაგრამ 19 სექტემბერს საქართველოს თასის მატჩი გვაქვს ჩასატარებელი და ჯერ ამაზე ვფიქრობთ.

- ფაქტია, რომ "საბურთალოსთან" მოგებით ლიდერთან სხვაობა 5 ქულამდე შეამცირეთ და ერთით ნაკლები თამაში გაქვთ ჩასატარებელი...

- ჯერ გადაწყვეტილი არაფერია და არავინ იცის, ვინ გახდება ჩემპიონი და ლიგიდან ვინ გავარდება. მხოლოდ ის ვიცი, რომ ძალიან საინტერესო ფინიში გველის.

- თქვენი აზრით, ეს ინტრიგა სტადიონზე ოდნავ მეტ მაყურებელს მაინც არ მიიზიდავს?

- ჩვენ თუ გვინდა, რომ საქართველოს ნაკრებს და ფეხბურთელებს რაღაც მოვთხოვოთ, აუცილებელია, რომ ეროვნული ლიგის მატჩებზე მეტი მაყურებელი მოვიდეს. პირადად მე მიმაჩნია, რომ "დინამო"-"საბურთალოს" ეს თამაში საინტერესო იყო და ორივე გუნდი გაცილებით მეტ ქომაგს იმსახურებდა. როცა უმაყურებლოდ თამაშობ, ხალისიც არ გაქვს. როცა სტადიონზე გულშემატკივარი მოდის, სულ სხვა ელფერი აქვს. ფეხბურთი ხალხისთვისაა და თხოვნა იქნება - სცადონ მაინც მოსვლა, იქნებ, უკეთესი ჩემპიონატი გამოვიდეს.

- უკეთესი ჩემპიონატი რეალური გგონიათ?

- ყველაფერი ერთმანეთზეა დამოკიდებული. მიმაჩნია, რომ ჩვენი ფეხბურთი მხოლოდ ნაკრების თამაშების გამო არ უნდა გვაინტერესებდეს. ეროვნული გუნდი გაცილებით ძლიერი იქნება მაშინ, როცა საქართველოს ჩემპიონატი იქნება ძლიერი და ხალხი სტადიონზე ივლის.

მაშინ გვეყოლება კარგი ნაკრები და ძლიერი მოთამაშეები. ახლა ეროვნულ ლიგაში ლიდერთა შორის სხვაობა ისე შემცირდა, ჩემპიონატის დარჩენილი ნაწილი ძალიან დაიძაბება.

დიდი იმედი მაქვს, ეს ფაქტორი იმოქმედებს და უფრო მეტი გულშემატკივარი მოვა თამაშებზე. მათ გარეშე ფეხბურთი უინტერესო და მკვდარია. დიდი იმედი მაქვს, რომ ადრე თუ გვიან ვითარება გამოსწორდება და საკლუბო ფეხბურთიც ფეხზე დადგება. ფეხბურთი გენებში გვაქვს და ეს ერთა ლიგაშიც გამოჩნდა. ყაზახებს ჩვენზე ბევრად მეტი ფული აქვთ, ფეხბურთში მილიონებს აბანდებენ, მაგრამ სანაკრებო დონეზე ჩვენთან ვერაფერს გახდნენ.

ყოველდღიური სპორტული გაზეთი "ლელო"
1599
მკითხველის კომენტარები / 1 /
გიზოგ
0
ბატონო კახა, ევროთასებზე სისტემატიურად უთავმოყვრეო გამოსვლის შემდეგ, კლუბის თამაშებზე ვინ მოვა?
მსგავსი ამბები
რუბრიკის სხვა სიახლეები
;