კახა ჩხეტიანი: 'გაგრასთან' ხუმრობა არას გვარგებს!

ქუთაისის "ტორპედო" საქართველოს დავით ყიფიანის სახელობის თასის ფინალშია. თელავის გივი ჩოხელის სახელობის სტადიონზე ქვეყნის მოქმედმა ჩემპიონმა დაძაბულ ბრძოლაში ეროვნული ლიგა 2-ის "თელავი" დაამარცხა.

აღსანიშნავია, რომ კახა ჩხეტიანის ხელმძღვანელობით გუნდმა ევროტურნირების შემდეგ 16-მატჩიანი წაუგებელი სერია "გამოაცხო", ხოლო თასის ფინალში ზედიზედ მესამედ გავიდა.

2016 წელს "ტორპედომ" თასის ფინალში მარტვილის "მერანი" 2:1 დაამარცხა, 2017 წელს საჩხერის "ჩიხურასთან" პენალტების სერიაში წააგო, ახლა კი მესამე მცდელობა ექნება "გაგრასთან", რომელმაც თბილისის "დინამო" დაამარცხა და ფინალშიც არაფრის დათმობას არ აპირებს.

კახა ჩხეტიანი მომხდარმა გაახარა, მაგრამ ეიფორიაში არ ჩავარდნილა და წარმატებას ფეხბურთელებსა და გულშემატკივრებს მიაწერს.

"ჯერ ერთი, მადლობა უფალს, რომ წარმატებით გაგვახარა, მადლობა ჩვენს ბიჭებსა და გუშემატკივრებს! ფეხბურთელების მონდომების გარეშე წარმატება ვერ მოვიდოდა. გულშემატკივართა თანადგომის გარეშე კი ვერც ერთი გუნდი ვერ მოიგებს. ისინი ყველაფერს აკეთებენ, გუნდმა წარმატებას რომ მიაღწიოს და წინ წაიწიოს. ეს უკვე ჩვენ მიერ მიღწეული მესამე ფინალია და იმედია, ეს პროგრესი გაგრძელდება", - ამბობს ჩხეტიანი.

ქუთაისელთა დამრიგებლის თქმით, ნახევარფინალში ყველაზე მეტად მოთამაშეთა მოდუნების ეშინოდა: "როდესაც დაბალი ლიგის გუნდს ხვდები, ყოველთვის არის ფსოქლოგიური საფრთხე, რომ გუნდი მოედანზე მოდუნებული გავა და თავის შესაძლებლობებს სრულად ვერ გამოავლენს.

"თელავი" ეროვნულ ლიგა 2-შია, მაგრამ შეხვედრამ გამოაჩინა, რომ მასთან მოდუნება ძალიან სარისკო იქნებოდა. გიორგი დეკანოსიძეს დიდი სამუშაო გაუწევია და ძალიან კარგი გუნდი ჩამოუყალიბებია. ეპიზოდებში მეტოქეს უპირატესობა ჰქონდა, გოლის გატანაც შეეძლო. ასე რომ, იოლად არ მოგვიგია, დიდი ნერვიულობა და ბრძოლა გადავიტანეთ. "თელავს" წარმატება მინდა ვუსურვო - მისი სახით ქართულ ფეხბურთს ძლიერი გუნდი შეემატა".

ისევე, როგორც ნახევარფინალში, ქუთაისელები ფინალშიც ეროვნული ლიგა 2-ის გუნდს, "გაგრას" შეხვდებიან. ხომ არ ხედავს ჩხეტიანი საფრთხეს, რომ მოთამაშეები ახლა მოდუნდნენ? ქუთაისელთა მთავარი მწვრთნელი ამაზეც გველაპარაკა:

"ფეხბურთში მკაცრი კანონი მოქმედებს - თუკი მოდუნდები და მეტოქეს არ დააფასებ, შეუძლებელია რომელიმე შეხვედრა მოიგო. ამის არაერთი მაგალითი გვქონია. მარტო უკეთეს ლიგაში გამოსვლა უპირატესობას რომ იძლეოდეს, მაშინ "გაგრა" ფინალში ვერ გავიდოდა. ასე რომ, 25 ნოემბერს ბათუმში მაქსიმალური კონცენტრაცია დაგვჭირდება, რომ ამ ძალიან მებრძოლ და სწრაფ გუნდთან წარმატებას მივაღწიოთ. გუნდი ფინალშია და ეროვნულ ლიგაში გადმოსასვლელად იბრძვის. ასე რომ ,"გაგრასთან" ხუმრობა არას გვარგებს".

ყოველდღიური სპორტული გაზეთი "ლელო"
415
მკითხველის კომენტარები / 0 /
მსგავსი ამბები
რუბრიკის სხვა სიახლეები