კახა ჩხეტიანი: დუბლის შანსი უნდა გამოვიყენოთ

2 დეკემბერს, 15:15 საათზე, გორში საქართველოს დავით ყიფიანის სახელობის თასის გამარჯვებული გაირკვევა. "ჩიხურა"-"ტორპედოს" ფინალზე დასწრება თავისუფალია. გუნდები სეზონის ბოლო და უმნიშვნელოვანესი თამაშისთვის ემზადებიან.

"ლელომ" ქუთაისის "ტორპედოს" მთავარ მწვრთნელ კახა ჩხეტიანს რამდენიმე კითხვით მიმართა...

- ჩემპიონობის მოპოვების შემდეგ გუნდში ზეიმი არ დასრულდებოდა, მაგრამ თასის ფინალისთვის მზადებას ამის გამო არ გადადებდით.
- რა თქმა უნდა, გუნდში ამაღლებული განწყობაა, რადგან სეზონი ჩემპიონობით დავასრულეთ და ეს მატჩის შემდეგ დიდი ზეიმით აღვნიშნეთ. მაგრამ მალევე ყველა თასის ფინალზე გადავერთეთ.

- სწორედ ეს ჩემპიონობა და 26 ნოემბრის მატჩზე დახარჯული მორალური და ფიზიკური ენერგიის გამო გვაინტერესებს, გუნდი გადაღლილი არ არის? მზადაა, ერთ კვირაში მეორედ ითამაშოს ბოლო ძალებით?
- აბსოლუტურად გეთანხმებით, რომ ეს ძალიან ძნელი იქნება, რადგან ჩემპიონობამ უდიდესი ენერგია წაგვართვა, მაგრამ მე ჩემი ბიჭების პროფესიონალიზმის მჯერა და დარწმუნებული ვარ, გადატანილი ემოციის მიუხედავად, ეს მათ განწყობაზე არ იმოქმედებს და მოედანზე კვლავ დიდი მოტივაციით გავლენ. ისინი ფორმის პიკში არიან და ვარჯიშებით ვცდილობთ, რომ ფორმა შევინარჩუნოთ.

- მეორე მომენტია - თქვენ ჩემპიონობა და ევროსაგზური გაინაღდეთ. ახლა "ჩიხურას" ევროპალიგაზე გასასვლელად ეს ტიტული ძალიან სჭირდება. ანუ მათ ძალიან დიდი მოტივაცია გააჩნიათ.
- ვერ დაგეთანხმებით. არავინ უწყის, თასის ფინალში კიდევ როდის ითამაშებს, ამავე დროს, ჩვენ დუბლის შესრულების შანსი გაგვიჩნდა და ამით უნდა ვისარგებლოთ. არანაირი მორალური უფლება არ გაგვაჩნია და არც სურვილი, ზერელედ მოვეკიდოთ იმ შანსს, რომელიც გამოგვიჩნდა და შეუძლია წლევანდელი სეზონი კიდევ უფრო გაგვილამაზოს.

(იბეჭდება მცირე ცვლილებით)
ყოველდღიური სპორტული გაზეთი "ლელო"
2607
მკითხველის კომენტარები / 1 /
ოდალა
0
ნეტა როგორც თქვენ მისცემთ მაგ თამაშს ჩიხურას, ისე მე 10 ბიტკოინი.
მსგავსი ამბები
რუბრიკის სხვა სიახლეები
;