კახა ჩხეტიანი: საქართველოს ჩემპიონატზე გადმორთვა ყოველთვის ძნელია...

ქუთაისის "ტორპედო" ეროვნულ ლიგას მოგებით რომ დაუბრუნდა, ამბავი არახალია. ევროპალიგის პლეი ოფის შემდეგ კახა ჩხეტიანის გაწვრთნილებს შინაურ ფრონტზე გადმორთვა თავიდან გაუჭირდათ.

"სამტრედიასთან" იმერულ დერბიში ქუთაისელები პირველ ტაიმს 0:2-ს აგებდნენ, მაგრამ საბოლოოდ თამაშის შემოტრიალება და გამარჯვება (5:2) მოახერხეს.

"ტორპედოს" მთავარმა მწვრთნელმა ამ დაძაბულ და საინტერესო სანახაობაზე ილაპარაკა:.

"პირველ ტაიმში მარცხი ევროთასების გამოძახილი მგონია. "ლუდოგორეცთან" შეხვედრის შემდეგ მცირე დრო იყო გასული და, ფაქტობრივად, თამაში მესამე დღეს მოგვიხდა.

ორი გოლი გავუშვით, რაც ყველა ჩვენგანის ბრალია, მათ შორის, ჩემიც - საერთოდ, ქართულ გუნდებს ევროთასებიდან გადმოწყობა გვიჭირს, გვგონია, რომ ევროპელებთან დაპირისპირებების შემდეგ აქ თამაში იოლი იქნება. მაგრამ ყველამ დავინახეთ, რომ იოლი კი არა, უფრო ძნელი იქნება, საქმეს სერიოზულად თუ არ მივუდგებით.

ბიჭებს მადლობა მინდა გადავუხადო, რადგან გონს დროულად მოეგნენ. ბოლოს ყველამ ნახა, რომ ძალიან მოინდომეს და ბევრი საგოლე მომენტი შექმეს. მოწინააღმდეგის ნახევარზე ბევრი სივრცე იყო და ამას კარგად იყენებდნენ. "სამტრედია" კარგი გუნდია, ძალიან კარგი მწვრთნელი ჰყავს და მათ წარმატება მინდა ვუსურვო. ჩვენს გულშემატკივრებს კი თანადგომისთვის დიდ მადლობას გადავუხდი", - ამბობს ჩხეტიანი.

ყოველდღიური სპორტული გაზეთი "ლელო"
740
მკითხველის კომენტარები / 0 /
მსგავსი ამბები
რუბრიკის სხვა სიახლეები
;