კახა ჩხეტიანი: ჩემი ბრალია... რაც იყო, იყო... ეს უკვე ისტორიაა

ქუთაისის "ტორპედომ" ეროვნული ლიგის 23-ე ტურში "რუსთავთან" მნიშვნელოვანი მატჩი 0:1 დათმო და მე-5 ადგილზე ჩამოქვეითდა. სამწუხარო რეალობის გამო, დასუსტებული ქუთაისური გუნდი სულ უფრო შორდება არა მხოლოდ საჩემპიონო ბრძოლას, არამედ, ევროპალიგის ზონასაც.

გაჭირვებულს ქვა აღმართში დაეწიაო, ასე მოუვიდა "ტორპედოს" "რუსთავთან". სამეულთან სიახლოვის შესანარჩუნებად გუნდს სამი ქულა სჭირდებოდა, მაგრამ კახა ჩხეტიანის ისედაც შემადგენლობადასუსტებულ გუნდს სამი მოთამაშე ტრავმის გამო დააკლდა - თორნიკე კაპანაძე, ოთარ კობახიძე და თემურ ჩოგაძე, რაც დიდი დანაკლისი იყო და გუნდმა წააგო.

23 თამაშის შემდეგ "ტორპედო" (34 ქულა) ისევ მე-5 ადგილზე დარჩა და ამ  ადგილზე წლეულს პირველად დაქვეითდა. მომხდარის გამო, ქუთაისის "ტორპედოს" მთავარმა მწვრთნელმა კომენტარი გააკეთა და რაოდენ საოცარიც იყოს, ამ ვითარებაშიც კი ყველაფერზე პასუხისმგებლობა საკუთარ თავზე აიღო, ფეხბურთელებს არ გადასწვდა, რაც ამ დროს ტრადიციიული სცენარია. ქუთაისელთა დამრიგებლის საქციელი ყველასთვის მაგალითი უნდა იყოს.

"ერთადერთი, ვისი ბრალიც ეს მარცხია, ვარ მე! უკლებლივ ყველა ფეხბურთელს, ვინც გუნდშია, ვუხდი დიდ მადლობას ბრძოლისა და შრომისთვის. შეცდომებს გავაანალიზებთ და მომდევნო მატჩისთვის უკეთ მოვემზადებით", - თქვა ჩხეტიანმა.

მან გუნდში განვითარებულ მოვლენებზეც ილაპარაკა: "რაც იყო, იყო... ეს უკვე ისტორიაა! ახლა "ტორპედოს" ახალი გუნდი ჰყავს და ამ გუნდსაც თავისი მიზანი ექნება".

ჩხეტიანმა იმედი გამოთქვა, რომ "ტორპედო" ამბიციურობას და ლიდერებში ყოფნის ჟინს მაინც შეინარჩუნებს:

"ტორპედო" ყოველთვის მაღალი მიზნებისთვის იბრძოდა და ახლაც ასე იქნება. დღევანდელი მარცხი არ ნიშნავს, რომ რამეზე ხელი ჩავიქნიეთ. ფეხბურთელები ბევრს შრომობენ და დარწმუნებული ვარ, ქუთაისელ გულშემატკივარს არაერთ გამარჯვებას აჩუქებენ".

1432
მკითხველის კომენტარები / 0 /
მსგავსი ამბები
რუბრიკის სხვა სიახლეები
;