კახა ცხადაძე: გული მწყდება... მაგრამ პიროვნული არაფერს ნიშნავს, მთავარია, ქვეყანამ გაიხაროს!

კახა ცხადაძის გაწვრთნილი შიმკენტის "ორდაბასი" ყაზახეთის ჩემპიონატში მეოთხე ადგილზე გავიდა.

ეს ნამდვილად გმირობის ტოლფასია. ცხადაძე და მისი სამწვრთნელო შტაბი კლუბში სეზონის მიმდინარეობისას მივიდა და დემორალიზებულ გუნდს რაღაც მაგიური ძალა მისცა. ახლა შიმკენტელები ყაზახეთის თასის ფინალის შედეგს ელიან და თუ ყველაფერი მათთვის კარგად წარიმართა, ევროთასებზეც ითამაშებენ...

თვის ბოლოს ცხადაძეს კლუბთან კონტრაქტი უმთავრდება. ქართულ საფეხბურთო თემში ითქმება ხოლმე - შესაძლოა, მომავალ სეზონში ცხადაძე თბილისის "დინამოს" მთავარ მწვრთნელად ვიხილოთო. შეგახსენებთ, რომ ცხადაძე უკვე წვრთნიდა ჩვენი ქვეყნის ყველაზე ტიტულოვან კლუბს და მასთან ერთად საქართველოს ჩემპიონატი და სუპერთასიც მოიგო.

კახა ცხადაძე: მე ნაკრებში მაშინ მივედი, როცა შესარჩევ ციკლში გუნდს უკვე აღარ ჰქონდა შანსი

გარდა ამისა, საქართველოს ნაკრების ყოფილ დამრიგებელს ეროვნული გუნდის აწმყოსა და მომავალზეც ველაპარაკეთ. ვფიქრობთ, საინტერესო ინტერვიუ გამოგვივიდა...

- თავდაპირველად, დასრულებული სეზონის შეფასებით დავიწყოთ. როგორ შეძელით, რომ თქვენი მისვლის მომენტში პრაქტიკულად დაშლილი და დემორალიზებული გუნდი მეოთხე ადგილზე გაიყვანეთ? ყაზახური პრესა ამას "ნამდვილ სასწაულს" უწოდებს და თქვენი მისამართით დითირამბებს არ იშურებს. დავამატოთ ამას ისიც, რომ კლუბს ჰქონდა ფინანსური პრობლემები...

- სხვათა შორის, დავალიანებები ჯერ ბოლომდე არც არის ანაზღაურებული. ამ საკითხზე გვქონდა საუბარი კლუბის ხელმძღვანელობასთან. მათ გვითხრეს, რომ ყველაფერი მოგვარდება. ჩვენ რომ მივედით კლუბში, "ორდაბასი" მართლაც დემორალიზებული და დაშლილი იყო.

აღარაფერს ვამბობ ფინანსურ პრობლემებზე... მწვრთნელს აქვს უფლება, თუ ორთვენახევრის განმავლობაში ვერ მიიღებს ხელფასს, ადგეს და წავიდეს, თან კომპენსაციაც მოითხოვოს. ზუსტად ასე მოიქცა ყოფილი მთავარი მწვრთნელი. ჩვენც შეგვეძლო აგვისტოში ამის გაკეთება, მაგრამ არ ვიკადრეთ, არ ავიღეთ ჩემოდნები და არ წამოვედით.

ფეხბურთელები ხედავდნენ ჩვენს დამოკიდებულებას საქმისადმი და მათაც მაგრად მოინდომეს. იყო კლუბის პრეზიდენტის პატივისცემაც... მე ამ ფეხბურთელებს ვეძახი "გმირებს". ძალიან ძნელია, როცა 8 თვის განმავლობაში ხელფასის გარეშე გიწევს თამაში... კიდევ არის დარჩენილი რამდენიმე თვის დავალიანება, მაგრამ გვითხრეს, რომ გაგვისტუმრებენ... ბოლო ხუთ შეხვედრაში 3 მოვიგეთ და 2 ფრედ ვითამაშეთ. გავედით მეოთხე ადგილზე, რაც მართლაც სასწაულ შედეგად შეფასდა. იმ ორი ფრიდან ერთი იყო "ასტანასთან".

ზოგადად, გვაკლდა სტაბილურობა და ეს ბუნებრივიცაა. არ იყო საკმარისი რაოდენობის მაღალი კლასის ფეხბურთი. პრობლემები გვექმნებოდა მოთამაშის ტრავმებისა თუ ყვითელი ბარათების მიღების შემთხვევაში. "ქაირათს" პრაქტიკულად ჩვენ წავართვით ჩემპიონობა - ორჯერ მოვუგეთ! მეორე წაგების შემდეგ გუნდიდან ხუთი ლეგიონერი და მწვრთნელი დაითხოვეს. ჩემპიონატი ადგილობრივი კადრებით დაასრულეს. ბოლო თამაში მოვუგეთ "ატირაუს", რომელსაც ყაზახეთში ძალიან პოპულარული მწვრთნელი თავკაცობს, თან მოვუგეთ უაღრესად ლამაზი ფეხბურთით.

- ...და საკმარისია, ამ "ატირაუმ" ყაზახეთის თასი ვერ მოიგოს, რომ "ორდაბასი" ევროპალიგაზე ითამაშებს...

- კი ბატონო, ასეა. მართალია, "ქაირათმა" ლეგიონერები გაუშვა, მაგრამ გუნდში ყაზახეთის ნაკრების რვა ფეხბურთელია...

- როგორც ვიცით, კლუბთან კონტრაქტი გიმთავრდებათ...

- 30 ნოემბერია კონტრაქტის ბოლო დღე. მე და გიორგი ჩიხრაძე წამოვედით საქართველოში. არის რიგი საკითხები, რომელიც უნდა მოაგვაროს კლუბის ხელმძღვანელობამ. ამისთვის დრო საკმარისად არის. რა თქმა უნდა, არის ყაზახეთის თასის ფინალის მოლოდინიც, ეს თამაში 24 ნოემბერსაა... ასე რომ, ჯერ გადაწყვეტილი არაფერია. დაგვიკავშირდება კლუბის ხელმძღვანელობა და გაგვაცნობს თავის პოზიციას.

- თბილისის "დინამოსთვის" თავის დროზე ბევრი გააკეთეთ, როგორც ფეხბურთელმა და როგორც მწვრთნელმა. რა გასაკვირია, რომ საფეხბურთო კულუარებში "დინამოს" ხშირად უკავშირებენ კახა ცხადაძის სახელს...

- მე მხოლოდ ის შემიძლია გითხრათ, რომ თქვენი გაზეთის მეშვეობით გავეცანი ამ ინფორმაციას... რა გითხრათ, "დინამო" იყო, არის და იქნება "დინამო". ბევრი რამ დამოკიდებული იქნება იმაზე, თუ რა საშუალებები და ამბიციები ექნება კლუბის ხელმძღვანელობას. მე არავისთან მქონია საუბარი ამ თემაზე.

- რას იტყვით ყაზახეთში მოთამაშე ქართველ ფეხბურთელებზე?

- ახლა შედარებით ცოტანი არიან ყაზახეთში ქართველები. ჯაბა კანკავასა და ნიკა კვეკვესკირს ძალიან კარგი სეზონი ჰქონდათ, კანკავას - განსაკუთრებით. ნიკას ტრავმების გამო ბევრი გაუცდა. "ტობოლი" მათ გარეშე წარმოუდგენელია... გიორგი ფოფხაძის "ყიზილჟარი" სუსტი გუნდი იყო, გავარდა, მაგრამ გიორგი გუნდის ლიდერი გახლდათ... კარგი სეზონი ჰქონდა ლაშა კასრაძეს "ჟეტისუში". ეს გუნდი თავიდან აუტსაიდერად ითვლებოდა, მაგრამ ბოლოს ჩვენ გვებრძოდა მეოთხე ადგილისთვის...

- დაბოლოს, საქართველოს ნაკრების შესახებ უნდა გკითხოთ. ფაქტია, რაღაც დიდთან ვართ ახლოს...

- გეხსომებათ, როცა მე დავინიშნე ნაკრებში, პირველივე ინტერვიუში ვთქვი, რომ ეროვნული გუნდი ითამაშებდა ევროპის 2020 წლის ჩემპიონატზე. ჩვენ ყველაზე ძლიერები ვართ ამ 16 გუნდში. პიროვნულ ჭრილში მწყდება გული, რომ ვერ ავისრულე ოცნება და ეს არ ხდება ჩემთან ერთად, მაგრამ ჩემი პიროვნული არაფერს ნიშნავს, მთავარია, ქვეყანამ გაიხაროს, ყველამ ერთად გავიხაროთ...

- გჯერათ ევროპის ჩემპიონატზე გასვლის?

- კი, 100 პროცენტით ვარ დარწმუნებული!

ყოველდღიური სპორტული გაზეთი "ლელო"
3603
მკითხველის კომენტარები / 0 /
მსგავსი ამბები
რუბრიკის სხვა სიახლეები