კახი კახიაშვილი: ყველა რეკორდი ისტორიის საკუთრება გახდება, მათ შორის ტალახაძისა და ჩემიც

ტაშკენტში ძალოსნობის საერთაშორისო ფედერაციის (IWF) კონგრესის კონგრესის საქართველოს ძალოსნობის ფედერაციის პრეზიდენტი კახი კახიაშვილი და ვიცე პრეზიდენტი დავით ყიფშიძეც ესწრებოდნენ.

კონგრესმა სპორტის ამ სახეობისთვის ახალი წონითი კატეგორიები დაამტკიცა, რომლებიც წლეულს 1-ლი ნოემბრიდან შევა ძალაში. როგორც ვაჟები, ისე ქალები მსოფლიოს და ევროპის ჩემპიონატებსა და პირველობებზე, ასევე, საერთაშორისო ტურნირებში მედლებისთვის 10-10 წონით კატეგორიაში იბრძოლებენ, ხოლო ოლიმპიურ თამაშებზე ორივე სქესისთვის მედლების კომპლექტი 7-7 წონაში გათამაშდება.

- კონგრესზე ძალოსნობის საერთაშორისო ფედერაციის წევრი ქვეყნების დიდმა უმრავლესობამ მოიყარა თავი, - გვითხრა სამგზის ოლიმპიურმა ჩემპიონმა. - რამდენიმე მნიშვნელოვანი საკითხი გადაწყდა.

განსაკუთრებით მწვავე გამოდგა ახალი წონითი კატეგორიების განხილვა. ნაკლები წინააღმდეგობა შეხვდა ლიცენზიების მოპოვების პრინციპებისა და სისტემის დაკანონებას, ოლიმპიურ თამაშებზე სპორტსმენთა რაოდენობის განსაზღვრას.

ტაშკენტში მიღებული დადგენილებებიდან ჩვენთვის განსაკუთრებით მტკივნეული ის იყო, რომ ამიერიდან თამაშებზე ერთ წონით კატეგორიაში ორი სპორტსმენის გამოყვანა აიკრძალა. არადა, რიოში ხომ მძიმე წონაში წარმატებისთვის ერთბაშად ორი ქართული დროშა აფრიალდა.

- წონების შეცვლა რამ გამოიწვია?

- მსოფლიოში სპორტის იმ სახეობათა შორის, რომლებიც დოპინგის მასობრივად გამოყენებაში ამხილეს, ძალოსნობაც აღმოჩნდა. ბევრი სპორტსმენი ჩავარდა დოპინგზე, ამიტომ 2024 წლის ოლიმპიური თამაშების პროგრამაში ძალოსნობის დარჩენა-არდარჩენის საკითხი დადგა.

სოკ-ის მესვეურებმა დაუფარავად განაცხადეს, ძალოსნების ხელმძღვანელები მდგომარეობის გამოსასწორებლად რადიკალურ ნაბიჯებს თუ არ გადადგამენ, დოპინგის საწინააღმდეგოდ ეფექტურ ზომებს თუ არ მიიღებენ, ეს სახეობა ოლიმპიური აღარ იქნებაო.

ფედერაციამ პირველი მნიშვნელოვანი ღონისძიება ჯერ კიდევ შარშან გაატარა, როცა რამდენიმე ქვეყანას შეჯიბრებებში მონაწილეობა ერთი წლით შეუჩერა.

კახი კახიაშვილი: ვიდრე რუსეთის დროშა არ ჩამოხსნეს, კვარცხლბეკზე ფეხი არ ავდგი

ახლა კი კონგრესზე ორი მნიშვნელოვანი რეფორმა გაატარა: ბოლო ოლიმპიურ თამაშებში ვაჟებისთვის რვა, ქალებისთვის კი შვიდ წონით კატეგორიაში თამაშდებოდა მედლები, ახლა კი გენდერული თანასწორობა აღდგა: ოლიმპიურ თამაშებზე ორივე სქესის წარმომადგენლები შვიდ-შვიდ წონაში იასპარეზებენ, თანაც თითოეულ წონაში 14-14 სპორტსმენი გამოვა.

- ოლიმპიური თამაშებისთვის დაბალი წონები არ ჩანს...

- კონგრესამდე სამი თვით ადრე აქტიურად გამოვეხმაურეთ საერთაშორისო ფედერაციის მოწოდებას და აღმასკომს მოსაზრებები გავუგზავნეთ. ერთ-ერთი იყო პატარა წონითი კატეგორიების შეჯიბრებიდან ამოღება, როგორც ჩვენი სახეობისთვის ანტირეკლამა.

საქმე ის არის, რომ მშობლებს, რომლებიც დაბალი წონის ძალოსანთა შეჯიბრებას უყურებენ, ჰგონიათ, რომ მათი შვილი სიმაღლეში აღარ გაიზრდება და ამის შიშით ძალოსნობაში სავარჯიშოდ ბავშვები მოკრძალებულად მოჰყავთ. არადა, სტატისტიკა საპირისპიროს ამტკიცებს: ცნობილი სპორტსმენები, მათ შორის - საქართველოში, მშობლებზე მთელი თავით მაღლები არიან.

ლაშა ტალახაძის მაგალითზე ვიტყვი - მისი ძმა, რომელსაც ძალოსნობაში არასდროს უვარჯიშია, ლაშაზე 10 სანტიმეტრით დაბალია. იმავეს თქმა შემიძლია ჩემი და გიორგი ასანიძის ოჯახის წევრებზეც. ყოველივეს მიუხედავად, კონგრესმა გაითვალისწინა ჩვენი წინადადება და დაბალი წონები ოლიმპიადაზე აღარ იქნება.

ტაშკენტში, ცხადია, ყველა ქვეყანას მისთვის მორგებული წონითი კატეგორიები უნდოდა, ამიტომაც ამ საკითხის განხილვა სამ დღეს გაიწელა, ლამის ქაოსამდე მივიდა. ბოლოს მაინც შეჯერდნენ იმ წონებზე, რომლებიც კონგრესმა ერთხმად დაამტკიცა.

ცხადია, ერთი წონის დაკლება სასურველი არ იყო, თუმცა ყველაზე მტკივნეული მაინც, როგორც გითხარით, ის არის, რომ თამაშებზე ერთ ქვეყანას წონაში ორი სპორტსმენის გამოყვანა არ შეეძლება, სხვა შეჯიბრებებზე კი ყველაფერი უწინდებურად იქნება.

- ახალი წონები რა პრობლემებს შეგვიქმნის?

- ოლიმპიურ, მსოფლიოს და ევროპის ჩემპიონ ლაშა ტალახაძისთვის ამით არაფერი შეცვლილა, რადგან ის ისედაც აბსოლუტურ წონაში გამოდიოდა. ჩვენთვის 85 კილოს გაუქმება არ იყო სასურველი, რადგან ახლა 81-სა და 96-ს შორის სხვაობა 15 კილოგრამია. ეს წონა, მაგალითად, რეზი დავითაძისთვის არც იქითაა და არც აქეთ, მაგრამ გამოსავალი მაინც უნდა მოვძებნოთ.

რაც შეეხება ქალთა წონებს, აქაც 81 და 96 კილოს ვარაუდობდნენ, მაგრამ ჩვენი წინადადებით, რასაც სხვა ქვეყნებმაც დაუჭირეს მხარი, 87 კილოზე შევთანხმდით, ეს კი გოტფრიდისთვის იდეალური ვარიანტია. ასე რომ, წესები იცვლება, მაგრამ ჩვენი ოლიმპიური მიზნები უცვლელი რჩება.

ერთიც მინდა დავძინო: როცა წონებზე ცხარედ კამათობდნენ, აღმასკომის წევრებმა რამდენჯერმე ჩემსა და გიორგი ასანიძისკენ გამოიხედეს, რითაც ზოგიერთებს აგრძნობინეს - აგერ პროფესიონალები სხედან და არ წუწუნებენ, თქვენ რაღა გალაპარაკებთო.

მართლაც, თუ პროფესიონალი ხარ, ორი წლის განმავლობაში შენი ინტერესები საერთაშორისო ფედერაციის მიერ განხორციელებულ ცვლილებებს უნდა მოარგო. უფრო იმ ქვეყნების წარმომადგენლები აქტიურობდნენ, რომლებიც წლებია, ჩვენი სახეობის განვითარებას აფერხებენ.

- ლიცენზიებთან დაკავშირებით რა სიახლეებია?

- უწინ მსოფლიოს ჩემპიონატებზე ნაკრები აგროვებდა სალიცენზიო ქულებს და ამის მიხედვით განისაზღვრებოდა, ქვეყანა რამდენი სპორტსმენით წარდგებოდა ოლიმპიადაზე.

ამიერიდან ასე აღარ იქნება, საგზურების მოპოვების სისტემა შეიცვალა - ყველა წონაში სპორტსმენი თავად იბრძოლებს ინდივიდუალური ლიცენზიის მოსაპოვებლად შეჯიბრებებიდან გამომდინარე რეიტინგის მიხედვით, როგორც ეს სპორტის ზოგიერთ სახეობაშია. 2020 წლის აპრილამდე ფედერაცია ავალდებულებს ათლეტებს, ნებისმიერი ტურნირისთვის მზად იყონ, რომ სარეიტინგო ქულები მოიპოვონ.

- წინა წლებში დამყარებულ რეკორდებს რა ბედი ეწევა?

- 2018 წლის პირველი ნოემბრიდან რეკორდების ახალი ათვლა დაიწყება, დღემდე დამყარებულები კი ისტორიის კუთვნილება გახდება, მათ შორის - გიორგი ასანიძისა და ლაშა ტალახაძის მსოფლიო თუ ოლიმპიური შედეგები, თქვენი მონა-მორჩილისაც, რომელიც 19 წლის წინათ ათენში მსოფლიოს ჩემპიონატზე დავამყარე ატაცში - 188 კილო და დღემდე ხელუხლებელი იყო. სამაგიეროდ, იქნება ახალი მიღწევები და ამ საქმეში, როგორც უწინ, ქართველი ძალოსნებიც თავის სათქმელს იტყვიან.

- დოპინგთან დაკავშირებითაც მინდა გკითხოთ...

- როგორც გითხარით, საერთაშორისო ოლიმპიურმა კომიტეტმა ძალოსნობა 2024 წლისთვის ოლიმპიურ სახეობად რომ აღიაროს, ჩვენმა ფედერაციამ აქტიური რეფორმები უნდა გაატაროს. ცხადია, მარტო წონების შეცვლა, სარეიტინგო სისტემის შემოღება და დამნაშავათათვის ერთწლიანი დისკვალიფიკაცია არ იკმარებს.

ყველაზე რთული პრობლემაა მოსაგვარებელი - დოპინგის წინააღმდეგ ბრძოლა. მრავალ ქვეყანაში უკვე 100-დან 300-მდე დოპინგსინჯია აღებული, რომ სოკ-ის მესვეურებმა ნახონ, ამ მიმართულებითაც აქტიურად ვმუშაობთ.

- უყურადღებოდ, ალბათ, ტაშკენტში ახალგაზრდების მსოფლიოს ჩემპიონატსაც ვერ დავტოვებთ...

- ჩვენი გუნდი სხვადასხვა მიზეზის გამო მხოლოდ სამი სპორტსმენით გაემგზავრა. ტაშკენტში გუნდურისა არა, მაგრამ პირადში გვქონდა მედლების პრეტენზია. აკი, რეზი დავითაძემ 85 კილოში ორი ოქროს და ერთი ვერცხლის ჯილდო მოიპოვა. ახლა 105 კილოში ირაკლი ჩხეიძეც გვეიმედება.

ყოველდღიური სპორტული გაზეთი "ლელო"
1336
მკითხველის კომენტარები / 0 /
მსგავსი ამბები
რუბრიკის სხვა სიახლეები
;