[VIDEO] დავფიქრდი და მივხვდი, რომ დიდი შეცდომა დავუშვი. კეპამ ბოდიში მოიხადა, მაგრამ ჯიბეს მაინც შეუთხელებენ

"ჩელსიში" წერტილი დაუსვეს შიდა საკლუბო გამოძიებას, რომელიც ლიგის თასის ფინალში მომხდარ ინციდენტს ეხებოდა. შეგახსენებთ, მეკარე კეპა არისაბალაგა არ დაემორჩილა მწვრთნელ მაურიციო სარის მოთხოვნას მის შეცვლაზე და არ დაუთმო ადგილი ვილი კაბალიეროს.

ეს იყო სცენები, რომლის მსგავსი, ალბათ, არ უნახავს ფეხბურთის ქომაგს. კეპამ ძალიან უხერხულ მდგომარეობაში ჩააყენა ისედაც ნდობადაკარგული სარი და უფრო მძიმე წნეხის ქვეშ მოაქცია. თავის მხრივ, მწვრთნელიც უზომოდ გაცხარდა და ესეც აბსოლუტურად გასაგებია.

ასე იყო თუ ისე, პრობლემა უნდა ამოწურულიყო და გარკვეულწილად ასეც მოხდა. "ჩელსიმ" კეპა ერთი კვირის ხელფასის ჩამოჭრით დააჯარიმა. გადაწყვეტილია, რომ ეს თანხა საქველმოქმედო ფონდ Chelsea Foundation-ში გადაირიცხება.

ამასობაში, კეპამ ბოდიში მოიხადა მომხდარის გამო: "ძალიან ბედნიერი ვიყავი, რომ იმ დღეს თამაშის საშუალება მქონდა. ეს იყო ჩემი პირველი ფინალი მას მერე, რაც "ჩელსიში" ვარ. ასევე, მინდა ვთქვა, რომ ვამაყობ ჩემი თანაგუნდელების თამაშით... ის, რაც მოხდა, მგონია, რომ გაუგებრობა იყო. დავფიქრდი და მივხვდი, რომ დიდი შეცდომა დავუშვი. ბოდიშს ვუხდი ყველას - მწვრთნელს, ვილის (კაბალიერო), თანაგუნდელებს, მთლიანად კლუბს... ასევე, მოვუბოდიშებ გულშემატკივრებს. ეს ჩემთვის დიდი გაკვეთილია და მზად ვარ, მივიღო ნებისმიერი სასჯელი, რომელსაც "ჩელსი" ჩათვლის საჭიროდ", - ამბობს კეპა.

ცოტათი დამშვიდებულ გულზე კომენტარი გააკეთა მაურიციო სარიმაც: "ვილაპარაკე კეპასთან ამ ინციდენტზე. მიმაჩნია, რომ ნორმალური საუბარი იყო. მას ესმის, რომ შეცდომა დაუშვა და ეს ძალიან კარგია. ბოდიშიც მოუხადა ყველას. დისციპლინარული სასჯელი კლუბზეა დამოკიდებული, ჩემი მხრიდან კი ეს საკითხი ამოწურულია. იმ საღამოს გუნდმა მთლიანობაში კარგად ითამაშა და ვწუხვარ, რომ ამ ინციდენტმა გარკვეული დაღი დაასვა ჩვენს მცდელობებს, წარმატებით დაგვესრულებინა ფინალი. ახლა ყველანი მომდევნო მატჩზე ვართ კონცენტრირებულები".

696
მკითხველის კომენტარები / 0 /
მსგავსი ამბები
რუბრიკის სხვა სიახლეები
;