კერკეტი კაკალი ბრაზილია - ფრანგული 'რასინგი' ზაფხულის თასის გამარჯვებული გახდა

საქართველო XV-ბრაზილია 18:20

საქართველო XV: (15-9) მამუკაშვილი, თაფლაძე (სვანიძე 60), ჯინჯიხაძე, ქანდაურაშვილი, ტაბუცაძე, აბჟანდაძე, მარგალიტაძე (კლდიაშვილი 32); (1-8) ორაგველიძე (სალდაძე 54), ჭყოიძე (ხუროშვილი 41), დონაძე (ფსუტური 23, კაკაურიძე 77)), აქუბარდია (ტრაპაიძე 52), შალამბერიძე (ბუჯიაშვილი 41), შენგელია, საღინაძე (მამამთავრიშვილი 41), სუხაშვილი.

2 ლ: ჭყოიძე, შენგელია. 2 ს, გ: აბჟანდაძე.
სინბინი: სუხაშვილი

ბრაზილია: (15-9) დ. სანსერი (ჯანტორნო 60), ტრანკესი, ფ. სანსერი, მ. დუკი (გარსია 54), ტენორიუი, რივზი, ლ. დუკი; (1-8) აბუდი (სილვა 54), რებოლო, ვეტორატო (როშა 54), ვიერა, პაგანინი (ოლივიერა 64), დიასი (სოუზა 79), ბერგუ, აუდა.

2 ლ: დ. სანსარსი, ფ. სანსერსი. 2 ს, 2გ: რივზი.
სინბინი: დუკი

მსაჯი: თორნიკე გვირჯიშვილი

საქართველო XV-მ ზაფხულის თასის პირველი გათამაშება მარცხით დაასრულა და საბოლოოდ მეორე ადგილს დასჯერდა. ჩვენი გუნდი ბრაზილიის პროგრესირებად ეროვნულ ნაკრებთან ვერას გახდა და 18:20 დამარცხდა.

თამაშამდე საქართველო XV-ის მთავარმა მწვრთნელმა ბესიკ ხამაშურიძემ თქვა - როგორც პირველ მატჩში, ამჯერადაც ჩვენი პრობლემა შეუთამაშებლობა იქნებაო. ასეც მოხდა. ამასთან ერთად, არ დაგავიწყდეთ, რომ პირველი მატჩისგან განსხვავებით, ჩვენი გუნდის უკანა ხაზი თითქმის მთლიანად შეიცვალა. ამან საქართველო XV-ის თამაშს აშკარად დაასვა დაღი.

სრულიად საპირისპიროს თქმა შეიძლება ბრაზილიელებზე. ეს გუნდი ეროვნული ნაკრებია, რომლის მორაგბეებიც დიდი ხანია, ერთად თამაშობენ. მათ ძალიან კარგად ჰყავდათ შესწავლილი ჩვენი გუნდი და აგრესიულ, საკმაოდ მჭიდრო დაცვით ტაქტიკას მიმართეს. ამან გაამართლა. ხშირ შემთხვევაში, ჩვენი მორაგბეები შეტევის გაგრძელების მიმართულებას ვერ პოულობდნენ.

ისე გამოვიდა, რომ პირველი მატჩისგან განსხვავებით საქართველო XV-მა პირველ ტაიმში უკეთ ითამაშა, ვიდრე მეორეში. ანგარიში მე-7 წუთზე ბრაზილიელებმა გახსნეს საჯარიმოთი. თუმცა ჩვენმა გუნდმა ამაზე სამ წუთში თედო აბჟანდაძის საჯარიმოთივე უპასუხა - 3:3.

მალე ლელოც გავიტანეთ. ნაწვიმარი იყო, მოედანი და ბურთიც დამძიმდა. ამიტომ, ხელდახელ თამაში სარისკო იყო და დიდად არც ერთ გუნდს არ გამოსდიოდა. ქართველმა მორაგბეებმა მე-14 წუთზე საჯარიმოდან ბურთი აუტში გადაიტანეს.

დერეფანი მეტოქის ლელოდან ხუთ მეტრში მოვიგეთ, მოლი შევკარით, იოლად დავძარით და ლელო შერკინების კვაჭმა გიორგი ჭყოიძემ მიითვალა, რომელიც იმ დღეს გუნდის კაპიტანი იყო. აბჟანდაძემ ვერ გარდასახა - 8:3.

ამის შემდეგ ინიციატივა ბრაზილიელებმა იგდეს ხელთ. ჯერ საჯარიმოთი ანგარიშში სხვაობა ორამდე შეამცირეს, მერე, 25-ე წუთზე, ჩვენი 22-მეტრიანი ზონის მისადგომებთან დანიშნული შერკინებიდან ბურთი მარცხნივ მარტივად ჩაათამაშეს, რადგან, რატომღაც, რიცხობრივ უმრავლესობაში აღმოჩნდნენ. ლელო შუამარბმა ფელიპე სანსერმა გაიტანა. გარდასახვა მგეზავმა ჯოშ რივზმა ზუსტად დაარტყა და ბრაზილია 13:8 დაწინაურდა.

ცხადია, საქართველო XV-ს გულზე ხელი არ დაუკრეფია და მეტოქეზე ზეწოლა გააძლიერა. ტაიმის დასრულებამდე ერთი წუთით ადრე, მეტოქეს ისევ მოლით შევუტიეთ და ლელო მესამეხაზელმა გურამ შენგელიამ გაიტანა. აბჟანდაძემ ამჯერად გარდასახვა ზუსტად დაარტყა და შესვენებაზე ორქულიანი უპირატესობით წავედით -15:13.

მეორე ტაიმი დაიწყო თუ არა, საჯარიმოს დარტყმის უფლება მივიღეთ და აბჟანდაძემ ანგარიშში სხვაობა გაზარდა - 18:13. ეს 45-ე წუთზე მოხდა. დარჩენილი 35 წუთის განმავლობაში ჩვენმა გუნდმა მონაგრის გაზრდა ვერაფრით შეძლო. ბრაზილიელებმა კი, 59-ე წუთზე, ჩვენი გუნდის დაცვაში შექმნილი არეულობით ისარგებლეს და გამარჯვების ლელო მიითვალეს.

აბჟანდაძეს, ისევე როგორც პირველ მატჩში, ამჯერადაც შეეძლო გუნდი მარცხისგან ეხსნა. მან ისევ სცადა, საჯარიმო 52 მეტრიდან დაერტყა. ზუსტად დაუმიზნა, მაგრამ ძალა არ ეყო და ბურთი ზედ კარის წინ დაეშვა.

"ბრაზილიის ეროვნული ნაკრები კარგად შეთამაშებული, შეკრული გუნდია, რომელიც ხშირად თამაშობს ერთი და იმავე შემადგენლობით. ისინი რაგბის განვითარებისთვის იღვწიან და შედეგიც სახეზეა. ეს ტურნირი საქართველოს ჩემპიონატში მოთამაშე მორაგბეების განვითარებას, გამოცდილების მიღებას ემსახურებოდა და, ვფიქრობ, მიზანი მიღწეულია". - თქვა ნამატჩევს საქართველო XV-ის მთავარმა მწვრთნელმა ბესიკ ხამაშურიძემ.
რასინგი-არგენტინა XV 14:8

ტურნირის გამარჯვებული ფრანგული "რასინგი" გახდა, რომელმაც მეორე მატჩში არგენტინა XV-ს 14:8 მოუგო. ამ შეხვედრაში ქართველი შერკინების ბურჯის, გურამ გოგიჩაშვილის დებიუტი შედგა, რომელმაც პარიზელთა გუნდში პირველად ითამაშა და შეხვედრაში 41-ე წუთიდან ჩაერთო. ვასილ კაკოვინი განაცხადში არ იყო.

თ მ ფ წ ბ ქ(ს)
1. რასინგი 2 2 0 0 +44 9(1)
2. საქართველო XV 2 1 0 1 -1 5(1)
3. ბრაზილია 2 1 0 1 -36 4(0)
4. არგენტინა XV 2 0 0 2 -7 2(2)

ყოველდღიური სპორტული გაზეთი "ლელო"
784
მკითხველის კომენტარები / 0 /
მსგავსი ამბები
რუბრიკის სხვა სიახლეები
;