კვარაცხელია და წიტაიშვილი  უეფას ტოპტალანტებში

უეფამ ქართველი ფეხბურთელები კონტინენტის გამორჩეულ ახალგაზრდებს შორის დაასახელა. სულ 50 მოთამაშე შეარჩიეს და, მათ შორის, ორი ქართველია.

“ჩვენმა რეპორტიორებმა დაასახელეს 50 ახალგაზრდა ფეხბურთელი, რომელთაც ახალ სეზონში “გასროლა” შეუძლიათ. საინტერესოა, რამდენიმე წელიწადში რომელი მათგანი გაიბრწყინებს?” - წერია უეფას გვერდზე.

ამ სიაში მოხვდა კიევის “დინამოს” ქართველი შემტევი გიორგი წიტაიშვილი და ყაზანის “რუბინის” თავდამსხმელი ხვიჩა კვარაცხელია. პირველი უკრაინის 20-წლამდელთა ნაკრებში მსოფლიოს ჩემპიონი და ფინალის საუკეთესო მოთამაშე გახდა. კვარაცხელია კი რუსეთში ზაფხულის სატრანსფერო პერიოდის ერთ-ერთი ყველაზე ხმაურიანი ფიგურა აღმოჩნდა. 

ხვიჩა კვარაცხელია (18 წლის, 
საქართველო, რუბინი)

გასულ სეზონში “ლოკომოტივში” იჯარით თამაშის პერიოდში, ის 21-ე საუკუნეში დაბადებული პირველი ფეხბურთელი გახდა, რომელმაც რუსეთის პრემიერლიგაში გოლი გაიტანა. ახალი სეზონი კი ფეხბურთელმა თავისი ყოფილი კლუბის კარში გატანილი გოლით გახსნა.

გიორგი წიტაიშვილი (18 წლის, 
უკრაინა, დინამო კიევი)

ფეთქებადი “ვინგერი”. მასზე საუკეთესოდ მეტყველებს გოლი, რომელიც 20-წლამდელების 2019 წლის მსოფლიო ჩემპიონატის ფინალში სოლორეიდის შემდეგ გაიტანა.

სიაში 21-ე საუკუნეში დაბადებული ის ახალგაზრდები მოხვდნენ, რომლებიც ევროპის კონტინენტზე თამაშობენ და ამიტომაა, რომ იქ არიან აფრიკელები, სამხრეთ და ჩრდილოამერიკელებიც. 

ყველაზე მეტი წარმომადგენელი ფრანგებს, ჰოლანდიელებსა და პორტუგალიიელებს ჰყავთ - 4-4, თურქებში, დანიელებსა და ესპანელებში 3-3 ტალანტი გამოარჩიეს. ერთი მათგანი დანიელ ოლმოა, რომელიც ზაგრების “დინამოს” შემადგენლობაში გუშინ “საბურთალოს” დაუპირისპირდა.

რეალურად, საქართველოს სახელით მხოლოდ კვარაცხელია თამაშობს და სიაში 2 წარმომადგენელი ჰყავს უკრაინას - წიტაიშვილი სწორედ ამ ქვეყანას წარმოადგენს. მაგრამ სამომავლო გათვლით, იმედია, გიორგი “ჯვაროსანი” გახდება. საინტერესოა, რომ სიაში 2-2 მოთამაშეზე მეტი არ ჰყავთ ისეთ საფეხბურთო გრანდებს, როგორებიც არიან ბრაზილია, გერმანია, იტალია, ინგლისი და ტალანტების მუდმივი კონვეიერი ხორვატია.

ყოველდღიური სპორტული გაზეთი "ლელო"
408
მკითხველის კომენტარები / 0 /
მსგავსი ამბები
რუბრიკის სხვა სიახლეები
;