კვიპროსული გამოცემის მტკიცებით ნიკა კაჭარავას 'ანორთოსისში' ელიან

უკვე ვწერდით, რომ ნიკა კაჭარავამ, შესაძლოა, კარიერა კვიპროსულ "ანორთოსისში" გააგრძელოს. როგორც ჩანს, ეს უკვე გადაწყვეტილი ამბავია - ასე ამტკიცებს იქაური გამოცემა kerkeda.net , რომელმაც ამის შესახებ ინფორმაცია პირველი კატეგორიის სიახლეებს შორის გაავრცელა.

"მოდის პირდაპირ კონტაქტის გასაფორმებლად", - ამ სათაურით გამოაქვეყნა გამოცემამ წერილი, რომელიც საქართველოს ნაკრების 23 წლის თავდამსხმელს მიუძღვნა.

"ფამაგუსტის "ანორთოსისი" ნიკა კაჭარავათი დაინტერესდა. საქართველოს ნაკრების თავდამსხმელის ტრანსფერის შესახებ ჩვენი გამოცემა ახალ ინფორმაციას ფლობს. კაჭარავა კვიპროსში პირდაპირ კონტრაქტის გასაფორმებლად ჩამოვა. მას კუნძულზე პარასკევს ელიან. საქართველო ლუქსემბურგს ამხანაგურ შეხვედრაში დაუპირისპირდება, კაჭარავა კი "ანორთოსისთან" კონტრაქტს ხელს ამის შემდეგ მოაწერს. ქართველ ფეხბურთელს კარიერის კუნძულზე გაგრძელება მას შემდეგ შესთავაზეს, რაც წარმატებით ითამაშა ახნას "ეთნიკოსში", ხოლო გასული სეზონი შესანიშნავად ჩაატარა პოლონეთში", - წერს გამოცემა.

შეგახსენებთ, რომ კაჭარავას, რომლის ტრანსფერიც დღემდე რუსეთის პრემიერლიგელ "როსტოვს" ეკუთვნის, კილჩეს "კორონასთან" ერთწლიანი საიჯარო შეთანხმება დაუსრულდა და გუნდის დატოვება გადაწყვიტა.

როგორც გავიგეთ, შესაძლოა, "ანორთოსისში" კიდევ ერთი ქართველი ჩაირიცხოს. ამ კლუბში გადასვლა ბექა მიქელთაძესაც შესთავაზეს. საქართველოს ახალგაზრდული ნაკრებისა და "რუსთავის" 20 წლის თავდამსხმელს თავდაპირველად რუსულ კლუბში გადასვლით აიმედებდნენ, მაგრამ უელსის ახალგაზრდულ ნაკრებთან ძალიან კარგი თამაშისა და დუბლის შესრულების შემდეგ, ფამაგუსტელები მის ტრანსფერზეც დაფიქრდნენ.

შეგახსენებთ, რომ "ანორთოსისმა" კვიპროსის პირველ დივიზიონში (უმაღლესი ლიგა) მესამე ადგილი დაიკავა და ევროპალიგის საკვალიფიკაციო ეტაპზე ითამაშებს.

ყოველდღიური სპორტული გაზეთი "ლელო"
576
მკითხველის კომენტარები / 0 /
მსგავსი ამბები
რუბრიკის სხვა სიახლეები