[კვირის შეჯამება] ძიუდო. ფიასკო პარიზში. დავრჩით ლიპარტელიანი ვერცხლის ამარა... [VIDEO]

პარიზის "გრანდ სლემზე" პირველი დღე ქართველთათვის წარუმატებელი გამოდგა. მეორე დღეს კი გაცილებით გამოცდილი ძიუდოისტები ჭიდაობდნენ და მედლების იმედიც გვქონდა, მაგრამ... 

81 კგ
წილისყრამ დიდად არ გაუმართლა საქართველოს მოქმედ ჩემპიონ გიორგი კაციაშვილს. შეჯიბრებაში ისიც მეორე წრიდან ჩაება, მაგრამ ჯერ იქ ჰყავდა მეტოქედ არცთუ სასურველი კორეელი მუნ ჯინ ლი, ამათში მოგებული კი შემდეგ ეტაპზე, დიდი ალბათობით, იაპონელთა მსოფლიოს ვიცე-ჩემპიონ სოტარო ფუჯივარას უნდა შეხვედროდა...

ყოველ შემთხვევაში, ის ტაივანელ მასაიუკი ტერადასთან შეხვედრაში აშკარა ფავორიტი იყო და ეს სტატუსი გაამართლა კიდეც. ოღონდ, ეგ არის, რომ კაციაშვილმა კორეელთან წააგო და ბრძოლას გამოეთიშა. 

ვლადიმერ ახალკაცმაც მეორე წრიდან დაიწყო ასპარეზობა. მისი პირველი მეტოქე იყო ფრანგი იბრაჰიმ კეიტა. ამავე ჯგუფში იყვნენ ჰოლანდიელი ფრანკ დე ვიტი, პორტუგალიელთა ქართველი ანრი ეგუტიძე და თურქთა ექსქართველი, მსოფლიოს მესამე პრიზიორი ვედათ ალბაირაქიც. მეოთხედფინალში გავიდა და მედლისთვის ბრძოლას აგრძელებს ეგუტიძე.

ახალკაცმა კარგად დაიწყო - დაამარცხა კეიტა და შემდეგ წრეში უზბეკ კამოლიდინ რასულოვს დაუპირისპირდა, თუმცა, სამწუხაროდ, დამარცხდა.

90 კგ
წილისყრამ არც გიორგი პაპუნაშვილი დაინდო - პირველივე წრეში მეტოქედ ჩვენთვის კარგად ცნობილი იაპონელი სანშირო მურაო არგუნა. გაიმარჯვა ფავორიტმა იაპონელმა, რომელიც მომდევნო ეტაპზე მონღოლ ალტანბაგანა განტულგას დაუპირისპირდა და ისიც დაამარცხა.

ავთანდილ ჭრიკიშვილი ჯგუფში ჰოლანდიელთა მოქმედ მსოფლიოს ჩემპიონ ნოელ ვან'ტ ენდთან მოხვდა, თუმცა მას მხოლოდ მეოთხედფინალში თუ შეხვდებოდა, მანამდე კი ჩვენი მსოფლიოს ჩემპიონი პირველ წრეში გაბონელ პაულ კიბიკაის დაეჭიდა. აფრიკელმა ღირსეული წინააღმდეგობა ვერ გაუწია ქართველს, რომელმაც მეტოქე ეფექტურ ბზრიალში დაამარცხა.

თუმცა მეორე ეტაპზე ჭრიკიშვილი გაბონელზე ბევრად ძლიერ კონკურენტთან, ყაზახ ისლამ ბოზბაევთან დამარცხდა და ასპარეზობა დაასრულა.

ამ წონის ნახევარფინალში გავიდა ესპანეთის სახელით მოასპარეზე ნიკოლოზ შერაზადიშვილი.

100 კგ
გამართლებულს ვერც ვალერი ლიპარტელიანის წილისყრას დავარქმევთ, რადგან მასთან ჯგუფში იაპონელი კენტარო იიდა მოხვდა. შეღავათი მხოლოდ ის იყო, რომ მათი გზები მეოთხედფინალამდე არ იკვეთება. ისე კი ლიპარტელიანს მასთან მკვეთრად უარყოფითი ბალანსი აქვს - სამივე ბრძოლა წააგო.

თუმცა ჩვენებურს იოლი გასეირნება არც პირველ შეხვედრაში ელოდება (პირველ წრეში ისვენებდა), სადაც ინდოელ ავტარ სინგჰსა და კორეელ ჯაე იუნ კიმს შორის უძლიერესს უნდა შეხვედროდა. კორეელის გარდა, ჯგუფის ამ მხარეს ისეთი არავინ იყო, ლიპარტელიანი მეოთხედფინალამდე რომ შეეჩერებინა...

საბოლოოდ კორეელმა ინდოელს სძლია და ლიპარტელიანს სწორედ მასთან მოუწია საქმის დაჭერამ. ქართველმა კორეელსაც მოუგო და კიდევ ორ მეტოქეს - ჯერ ჩერნოგორიელ დანილო პანტიჩს, ხოლო ჯგუფის ფინალში - ლატვიელ იევგენის ბოროდავკოს. ნახევარფინალში ლიპარტელიანის მეტოქე რუსეთის სახელით მოასპარეზე სომეხი - არმენ ადამიანი გახლდათ. ქართველმა ისიც მოისტუმრა და გავიდა ფინალში, სადაც ოქროსთვის ისრაელის წარმომადგენელ პეტერ პალჩიკს შეებრძოლა.

პაექრობა დაძაბული გამოდგა. ორივე მხრიდან იყო ილეთის გაკეთების მცდელობა, მაგრამ ძირითად დროში ლიპარტელიანმა და პალჩიკმა 2-2 გაფრთხილება მიიღეს, დამატებულ დროში კი ებრაელ სპორტსმენს "შიდო" მიენიჭა ქართველი ძიუდოისტის ილეთზე - ასე განსაჯა ვიდეორეფერიმ და ლიპარტელიანი ვერცხის მედალს დასჯერდა.

ონისე სანებლიძეს პირველ წრეში პაკისტანელი შაჰ ჰუსაინ შაჰს ხვდა. აზიელი ძალიან მოძრავი და აქტიური იყო, რამაც მსაჯი ერთობ მოხიბლა და სანებლიძეს ერთმანეთის მიყოლებით დაუფიქრებლად აძლევდა გაფრთხილებებს. არადა, პაკისტანელი მას მიახლოების უფლებას არ აძლევდა და მსაჯმაც ისე მისცა ჩვენიანს მესამე გაფრთხილება, შაჰს ილეთის მცდელობაც არ ჰქონია. სამი გაფრთხილება კი ძიუდოში წაგებას ნიშნავს. მომდევნო ეტაპზე პაკისტანელი გავიდა.

+100 კგ
თამამად შეიძლება ითქვას, რომ ჩვენებიდან ყველაზე მეტად ლევან მატიაშვილს არ გაუმართლა, რადგან ჯგუფში ლეგენდარულ ფრანგ ტედი რინერსა და იაპონელ კოკორო კაგეურასთან მოხვდა!

მატიაშვილი მათ მეოთხედფინალამდე არ შეხვდებოდა, მაგრამ იქამდე ვერც მიაღწია - დამარცხდა უზბეკ ალიშერ იუსუპოვთან, ვისთვისაც, წესით, უპრობლემოდ უნდა ეჯობნა.

გელა ზაალიშვილმა პირველ წრეში აზერბაიჯანელი შაჰინ გაჰრამანოვი დაამარცხა, მეორე წრეში ბრაზილიელი მსოფლიოს ვიცე-ჩემპიონი დავიდ მოურა მიაყოლა,ხოლო ჯგუფის ფინალურ ბრძოლაში უზბეკი ბეკმუროდ ოლტიბოევიც დაამარცხა. 

ნახევარფინალში ზაალიშვილის მეტოქე ჰოლანდიელი ჰენკ გროლი გახლდათ. სამწუხაროდ, ბრძოლა მეტოქის გამარჯვებით დასრულდა, რაც იმას ნიშნავს, ქართველს ბრინჯაოს მედლისთვის მოუწევდა ბრძოლა. ამ ბრძოლაში მისი მეტოქე რუსეთის წარმომადგენელი ინალ ტასოევი იყო. სამწუხაროდ, ზაალიშვილი დამარცხდა და უმედლოდ დარჩა. 

საბოლოო ჯამში, ერთადერთი მედალი (ვერცხლი, და მერვე ამ ტურნირის ისტორიაში) ვალერი ლიპარტელიანმა მოგვიტანა. არცერთი ოქრო! - ქართველი ძიუდოისტებისთვის ასეთი შედეგი ერთმნიშვნელოვნად ფიასკოა!

გაცილებით უარესად გვქონდა საქმე ქალებში, სადაც ნახევარფინალებთანაც ვერ მივედით ახლოს... 

4956
მკითხველის კომენტარები / 2 /
დ-ვიტო
0
კარგი ბიჭია ეს ჭრიკიშვილი მარა ვეღარ ქაჩავს ვეღარ რა....
მთ
0
გაბონის ნაკრებივით ყველა გვიგებს
მსგავსი ამბები
რუბრიკის სხვა სიახლეები
;