კვლავაც ინტრიგის მოლოდინი

ეროვნული ლიგის შარშანდელი გათამაშების საფირმო ნიშანი სატურნირო ინტრიგა იყო, პირველიდან ბოლო ტურამდე რომ გრძელდებოდა.

იმედი დავიტოვოთ, რომ დაძაბულობა არც ახალ ჩემპიონატს მოაკლდება, მით უფრო, რომ ეროვნული ლიგის ათივე გუნდმა ნაყოფიერი წინასასეზონო შეკრება გაიარა და შემადგენლობაც გააძლიერა.

ამას გარდა, შარშანდელის მსგავსად, ამჯერადაც რთული იქნება ამა თუ იმ მატჩის წინ მეტ-ნაკლებად მიახლოებული პროგნოზის გაკეთება, რომ აღარაფერი ვთქვათ, საერთოდ, სეზონის ფავორიტებსა თუ აუტსაიდერებზე. მოკლედ, წინ საინტერესო მატჩები გველოდება...

ტორპედო-დილა

02.03. ქუთაისი. რამაზ შენგელია. 18:00. LIVE I არხზე
ტორპედო-დილა
57: +32 =7 -18, 103-66
დისკვალიფიკაცია: გიორგი გურული, გიორგი ქიმაძე, ბექა ტუღუში, ბიძინა მახარობლიძე, მაქსიმე ქვილითაია (ყველა - ტორპედო)

ნიშანდობლივია, რომ საიუბილეო ჩემპიონატის პირველი მატჩი ქუთაისში უნდა გაიმართოს: მესამე წელიწადია, "ტორპედო" მართლაც რომ
ანებივრებს ტიტულებით თავის ერთგულ გულშემატკივრებს!

აი, ამჯერად კი, ახალი სეზონის სადებიუტო მატჩში "ტორპედო" ჩემპიონისა და სუპერთასის მფლობელის რანგში წარდგება საკუთარი ქომაგის წინაშე და სწორედ ქუთაისში უნდა ველოდოთ კიდეც XXX საიუბილეო ჩემპიონატის პირველ გოლ(ებ)საც.

"ტორპედომ" ნაყოფიერი უცხოური შეკრება გაიარა, შარშანდელი, საჩემპიონო შემადგენლობაც, ფაქტობრივად, 99 პროცენტით შეინარჩუნა და ამას გარდა, ახალწვეულებით შემტევი პოტენციალიც კიდევ უფრო გააძლიერა. ქუთაისური გუნდის ბოლოდროინდელი წარმატებების მთავარი სულის ჩამდგმელი, რა თქმა უნდა, კახა ჩხეტიანი გახლავთ, რომლის ხელმძღვანელობითაც შეძლო "ტორპედომ" ბოლო წელიწად-ნახევრის განმავლობაში სამივე ქართული ტიტულის მოგება!

ახალი სეზონის სასტარტო ტურს "ტორპედო" სერიოზული საკადრო პრობლემებით (განსაკუთრებით - დაცვის ხაზში) ხვდება: ერთდროულად ხუთ ფეხბურთელს დისკვალიფიკაცია წინა ჩემპიონატიდან გადმოჰყვა. აქედან გამომდინარე, ჩემპიონის შემადგენლობაში გარკვეულ გადაადგილებასაც უნდა ველოდოთ და უმთავრესი ინტრიგა კი, ცხადია, მასპინძელთა ყველაზე ცნობადი ახალწვეულის, ჯაბა ლიპარტიას თამაში უნდა იყოს.

ერთი შეხედვით, ამ წყვილში მასპინძლები უპირობო ფავორიტად უნდა მივიჩნიოთ, მაგრამ გიორგი დარასელიას დამოძღვრილმა "დილამ" ჯერ კიდევ წინა სეზონში შემოგვთავაზა რამდენიმე სიურპრიზი.

ყველაფერს თავი რომ დავანებოთ, შარშანდელი ჩემპიონატის ფინიშის სწორზე სწორედ "დილამ" შეძლო "ტორპედოს" დამარცხება, რის შემდეგაც ქუთაისელთა გუნდი ლიდერ თბილისის "დინამოს" 4 ქულით ჩამორჩა, მაგრამ ამის შემდეგ რა და როგორ მოხდა, ყველას ემახსოვრება: "ტორპედომ" დარჩენილი ოთხივე მატჩი მოიგო და 15-წლიანი პაუზის შემდეგ საქართველოს ჩემპიონიც გახდა!

ჩიხურა-კოლხეთი

03.03. თბილისი. დავით პეტრიაშვილი. 15:00
ჩიხურა-კოლხეთი
10: +7 =0 -3, 21-9
დისკვალიფიკაცია: დენის დობროვოლსკი, დავით მაისაშვილი (ორივე ჩიხურა) - ბექა მახარაძე (კოლხეთი)

სამწუხაროდ, ამ გუნდებს მიმდინარე ჩემპიონატის I და II წრის საშინაო მატჩების ჩატარება სხვაგან მოუწევთ: "ჩიხურა" თბილისში "უმასპინძლებს" მეტოქეებს, ხოლო "კოლხეთი" - ზესტაფონში...

ბოლო წლების ერთ-ერთმა ყველაზე სტაბილურმა ქართულმა გუნდმა "ჩიხურამ" (2013 წლიდან მოყოლებული, ჩემპიონატი V ადგილს ქვემოთ რომ არ დაუსრულებია და მუდმივად რომ გადიოდა თასის ნახევარფინალში) ამ სეზონის დაწყების წინ შემადგენლობა გვარიანად გადაახალისა.

თუმცა უცვლელი დარჩება საჩხერელთა გუნდის მიზნები: "ჩიხურა" ახალ ჩემპიონატშიც იბრძოლებს ევროსაგზურისთვის. ისე, როგორც უცვლელად რჩება "ჩიხურას" მთავარი მწვრთნელის პოსტზე ეროვნული ლიგის ყველაზე გამოცდილი სპეციალისტი სოსო ფრუიძე, რომელსაც, გასული საუკუნის 90-იანი წლებიდან მოყოლებული, საქართველოს ჩემპიონატში, ვინ მოთვლის, რამდენ უცხოელ კოლეგასთან მოუგია სამწვრთნელო დუელი.

ახლა კი, "ჩიხურას" გამოცდილი თავკაცის ოპონენტი 56 წლის რუსი სპეციალისტი კონსტანტინ გალკინი იქნება, რომლისთვისაც ეს მატჩი სადებიუტოა საქართველოს ჩემპიონატში. ისე, "კოლხეთის" შემადგენლობა წინა სეზონთან შედარებით, ფაქტობრივად, მთლიანად შეცვლილია და ამ ეტაპზე ძნელი სათქმელია, რა მიზნები ექნება რუსი ლეგიონერებით გაძლიერებულ ფოთელთა გუნდს...

ლოკომოტივი-სამტრედია

04.03. თბილისი. მიხეილ მესხი (სათადარიგო). 13:30
ლოკომოტივი-სამტრედია
14: +6 =1 -7, 19-23

საინტერესო მატჩი უნდა გაიმართოს ვაკეში, სადაც წინა სეზონთან შედარებით, გვარიანად გადახალისებულმა "ლოკომოტივმა" ასევე სახეშეცვლილ "სამტრედიას" უნდა უმასპინძლოს.

თანაც, ნუ დაგვავიწყდება, რომ "ლოკომოტივის" მთავარ მწვრთნელ ლაშა ჭაღიაშვილს დებიუტი უნდა ჰქონდეს ეროვნულ ლიგაში...

წინა სეზონის დიდი ნაწილი "ლოკომოტივი" ლიდერთა შორის იყო, თუმცა ფინიში აშკარად ჩაუვარდა და ამის მიზეზი წამყვანი ფეხბურთელების ტრავმიანობაც იყო. მერე კი დაიწყო სერიოზული საკადრო ცვლილებები: გუნდიდან 6-7 ისეთი ფეხბურთელი წავიდა, მუდამ ძირითად შემადგენლობაში რომ ვხედავდით. ცალკე უნდა ვთქვათ მთავარ დანაკლისზეც: წინა სეზონის საუკეთესო ფეხბურთელი და საუკეთესო ბომბარდირი ირაკლი სიხარულიძე კარიერას ჩეხურ "სლოვაცკოში" აგრძელებს...

ბოლო სამი სეზონია, "სამტრედია" სეზონს პირველ სამეულში ამთავრებს. ეს კი იმას მოწმობს, რომ ამ კლუბის ხელმძღვანელებს მთავარი მწვრთნელების შერჩევაში გემოვნება ნამდვილად არ დაეწუნებათ: გია ცეცაძის ხელმძღვანელობით "სამტრედია" ჩემპიონიც გახდა და ვერცხლისპრიზიორიც, საქართველოს ჩემპიონატების ისტორიაში ყველაზე ახალგაზრდა ტრიუმფატორმა სპეციალისტმა უჩა სოსიაშვილმა კი შარშან ბრინჯაოს მედლები მოაპოვებინა იმერულ გუნდს.

თუმცა შარშანდელი შემადგენლობიდან "სამტრედიაში" ერთეულებიღა თუ დარჩნენ: გამოცდილი მეკარე ომარ მიგინეიშვილი, პლუს, აშკარად "ხარისხიანი" ლეგიონერები - მაიკლ ოლაიტანი და ინტერს გიი; აი, ახალწვეულები კი "სამტრედიაში" მრავლად არიან, თანაც, როგორც უცხოელები, ასევე - ჩვენებურები და ამ უკანასკნელთა შორის, რა თქმა უნდა, საქართველოს ნაკრების წევრები - უჩა ლობჟანიძე და ბუბა დაუშვილი უნდა გამოვარჩიოთ.

დინამო (თბ)-რუსთავი

04.03. თბილისი. დინამო არენა. 16:00. LIVE I არხზე
დინამო (თბ)-რუსთავი
0: +0 =0 -0, 0-0

საიუბილეო ჩემპიონატის I ტურის, უდავოდ, ყველაზე საინტრიგო დაპირისპირება, რომელშიც ქართული საკლუბო ფეხბურთის მართლაც რომ მარადიულმა ფავორიტმა თბილისის "დინამომ" ეროვნული ლიგის დებიუტანტ "რუსთავს" უნდა უმასპინძლოს!

...ბოლო წლებში დამკვიდრებული "ტრადიცია" არც ამჯერად დარღვეულა და "დინამო" ამჯერადაც დატოვა ფეხბურთელების დიდმა ჯგუფმა. ყველაზე საინტერესო კი ამ შემთხვევაში ის არის, რომ "დინამოდან" ერთდროულად 5 (ხუთი!) ფეხბურთელი გადავიდა... "რუსთავში"!

გუნდში, სადაც, ფაქტობრივად, მთლიანად გამოიცვალა შარშანდელი შემადგენლობაც და სამწვრთნელო შტაბიც: წინა სეზონის ეროვნული ლიგა 2-ის საუკეთესო მწვრთნელი ვარლამ კილასონია ამიერიდან "რუსთავის" დირექტორატის წევრი იქნება და ამის პარალელურად, კლუბის ახალგაზრდული ფეხბურთის განვითარებას უხელმძღვანელებს.

აი, "რუსთავის" ახალ მთავარ მწვრთნელ ვლადიმირ გაზაევს კი კვირას დებიუტი უნდა ჰქონდეს საქართველოს ჩემპიონატში, ისე, როგორც "რუსთავის" ფეხბურთელთა, ფაქტობრივად, 99-მა პროცენტმა პირველად უნდა მოირგოს ამ გუნდის მაისურა. თუმცა, გაზაევისთვის ეს არ იქნება პირველი დაპირისპირება თბილისის "დინამოსთან": 2014 წლის ზაფხულში, ჩემპიონთა ლიგის II საკვალიფიკაციო ეტაპზე, სწორედ ამ ახალგაზრდა სპეცილისტის დამოძღვრილმა ყაზახურმა "აქტობემ" ორივე მატჩი მოუგო (1:0, 3:0) საქართველოს ჩემპიონ "დინამოს", რომელსაც იმ პერიოდში ჩეხი სპეციალისტი მიხალ ბილეკი წვრთნიდა.

სხვათა შორის, ჩვენთვის ცუდად გასახსენებელი იმ დაპირისპირების კიდევ ორი მონაწილე შეიძლება ვიხილოთ კვირის მატჩში: წინა სეზონის ეროვნული ლიგის საუკეთესო მცველი ლაშა თოთაძე მაშინაც თბილისის "დინამოში" ასპარეზობდა, ხოლო "რუსთავის" ახალწვეული ტარას ცარიკაევი "აქტობეში" გამოდიოდა.

წინა სეზონის განმავლობაში "დინამოს" მთავარ მწვრთნელ კახა კაჭარავას, სულ მცირე, სამჯერ მოუხდა ახალი გუნდის "შენება".

ფაქტობრივად, ყოველი თვის შემდეგ გუნდს ესა თუ ის ლიდერი ტოვებდა და უცხოეთში მიემგზავრებოდა. ამის მიუხედავად, "დინამო" ბოლო ტურამდე კი არა, ჩემპიონატის დასკვნითი მატჩის ბოლო წამამდე ინარჩუნებდა ოქროს მედლების მოპოვების რეალურ შანსს, მაგრამ "ტორპედოს" მეკარე როინ კვასხვაძის გმირობამ საჩემპიონო ზეიმი ქუთაისში "გადაამისამართა"...

"დინამო" და "რუსთავი" ეროვნულ ლიგაში პირველად დაუპირისპირდებიან ერთმანეთს, თუმცა შარშან თასის მეოთხედფინალში შეხვდნენ ერთმანეთს და რუსთავში ჩატარებულ იმ მატჩს ერთი გმირი ჰყავდა: "დინამოს" იმჟამინდელმა მეკარე ნუკრი რევიშვილმა სამი პენალტი მოიგერია.

ბოლო წლების ერთ-ერთი საუკეთესო ქართველი მეკარე კი ამჟამად "რუსთავის" ყველაზე ცნობადი ახალწვეული გახლავთ...

საბურთალო-სიონი

05.03. თბილისი. მიხეილ მესხი. 19:00
საბურთალო-სიონი
4: +1 =2-1, 5-5

I ტურის დასკვნითი მატჩიც არანაკლებ ინტერესს იწვევს: "საბურთალოს" ახალ სეზონში ჩემპიონობის ერთ-ერთ რეალურ კანდიდატად მივიჩნევთ, ერთწლიანი პაუზის მერე უძლიერესთა შორის დაბრუნებულ "სიონს" კი ერთმანეთზე გამოცდილი მწვრთნელ-ფეხბურთელები ჰყავს.

..."საბურთალო" წინა სეზონშიც ძალიან ახლოს იყო ევროტურნირების საგზურთან, მაგრამ გიორგი ჭიაბრიშვილის გუნდს საამისოდ სულ მცირედი დააკლდა. აი, რაც შეეხება ახალი სეზონისთვის მზადებას, "საბურთალომ" ერთმანეთზე ნაყოფიერი ორი უცხოური შეკრება გაიარა და შემადგენლობაც გვარიანად გააძლიერა (თანაც, გამოცდილი ფეხბურთელებით).

ამჟამად გუნდში ისეთი კონტინგენტია შეკრებილი, ორი ლიდერის (გიორგი ხარაიშვილი, ლაშა შინდაგორიძე) წასვლა არც უნდა დაეტყოს.

აი, რაც შეეხება "სიონს", გამოცდილი სპეციალისტის, კობა ჟორჟიკაშვილის დამოძღვრილი გუნდი საქართველოში ემზადებოდა და იმის გარდა, რომ შარშანდელი ბირთვიც შენარჩუნებულია, ყველა რგოლიც საგრძნობლად გაძლიერდა ერთიმეორეზე კვალიფიციური ახალწვეულებით. ცალკე გვინდა ვთქვათ "სიონის" ორ გამოცდილ ლიდერზეც: 36 წლის ალექსანდრე კოშკაძე და 33 წლის ჯაბა დვალი უმაღლეს ლიგაში ბრუნდებიან.

ყოველდღიური სპორტული გაზეთი "ლელო"
1351
მკითხველის კომენტარები / 0 /
მსგავსი ამბები
რუბრიკის სხვა სიახლეები
;