კიკე სეტიენი: სანამ კრუიფის ბარსელონა არ ვნახე, საერთოდ არ ვიცოდი, რა იყო ფეხბურთი...

სამშაბათს "ბარსელონამ" ახალი მთავარი მწვრთნელი წარადგინა. რა თქმა უნდა, პრესკონფერენციის სტანდარტულ ფრაზებს სჯობია, ამ კაცზე ორიოდ სიტყვით მოგიყვეთ - ვინ არის, რა საფეხბურთო ფილოსოფიის მიმდევარია... თუმცა ბოლომდე ვერც პრეზენტაციას ავუვლით გვერდს...

61 წლის კიკე სეტიენი ძალიან თავისებური სპეციალისტია. მას არ უყვარს, როცა მისგან განსაკუთრებულ სიმკაცრეს ითხოვენ. მას არ შეუძლია, ყვირილით აიკლოს გასახდელი და ფეხბურთელებს, რომლებიც მას არ დაემორჩილებიან, კუდით ქვა ასროლინოს...

ამის მიუხედავად, კიკე სეტიენს, მეტსახელად - "ელ მაესტრო" - არაერთი კარგი თვისება აქვს. "ბარსელონას" გულშემატკივრები, რომლებიც ბოლო დროს წუხდნენ იმის გამო, რომ ერნესტო ვალვერდეს ხელში "ბარსამ" იდენტობა დაკარგა, უსათუოდ გაიხარებენ, რადგან იოჰან კრუიფის მოწაფეს უყვარს შემტევი და სანახაობრივი ფეხბურთი, უყვარს ბურთის ფლობა...

ერთხელ, "ბეტისის" მწვრთნელობის პერიოდში, სეტიენმა თქვა: "ოღონდ, კრუიფის მიერ გაწვრთნილ გუნდში მეთამაშა და დიდი მსხვერპლის გაღებაზეც კი თანახმა ვიქნებოდი, თუნდაც ჩემი პატარა თითი მომეჭრა".

"ბეტისის" ფანები ასევე ძალიან გაუბრაზდნენ კიკეს მაშინ, როცა თქვა, რომ მისი მიზანი "ბარსელონას" მთავარ მწვრთნელად მუშაობაა. "ბეტისიდან" ის არადამაკმაყოფილებელი შედეგების გამო გაათავისუფლეს, არადა, მანამდე ყველაფერი კარგად იყო. დეკემბრის დასაწყისში სეტიენს "უოტფორდის" მწვრთნელობას უწინასწარმეტყველებდნენ, იყო სხვა შეთავაზებებიც, თუმცა მან მოითმინა და მოიგო. დღეს მას ოცნება აუსრულდა.

"ლას პალმასის" მწვრთნელის რანგში კი სეტიენმა ეს სიტყვები თქვა: "სანამ კრუიფის "ბარსელონა" არ ვნახე, საერთოდ არ ვიცოდი, რა იყო ფეხბურთი. ამის მერე ამეხილა თვალი და მივხვდი, რომ ფეხბურთის მშვენება მის კოლექტიურობაშია".

სეტიენის გაწვრთნილი გუნდები ხშირად პროცენტულად იმაზე მეტად ფლობენ ბურთს, ვიდრე პეპ გვარდიოლას ხელქვეითები. "ბარსას" ყოფილმა დამრიგებელმა ხერარდო (ტატა) მარტინომ ერთხელ თქვა - ძალიან ხშირად მაკრიტიკებდნენ იმის გამო, რომ კატალონიური გრანდი მოგებულ თამაშებშიც კი მცირე ხნით ფლობდა ბურთს. სეტიენის გუნდს ეს პრობლემა, ალბათ, არ ექნება.

კიკე სეტიენი: გუშინ ძროხებთან ერთად ვსეირნობდი, დღეს კი მსოფლიოს საუკეთესო ფეხბურთელების მწვრთნელი ვარ!..

ახლა რამდენიმე ციტატა მისი ძველი ინტერვიუებიდან:

..."საკმარისი არ არის, გაიტანო ერთი ლამაზი გოლი. ჩემმა გუნდმა სულ კარგად უნდა ითამაშოს და მთავარი - ის უნდა ფლობდეს ბურთს"...

..."ფეხბურთში მე ვაფასებ სტაბილურობას, უწყვეტობას და არა გამონათებას. ეს არის ის, რისკენაც უნდა იაროს ნებისმიერმა მწვრთნელმა"...

..."ფეხბურთელი, რომელსაც ესმის დროისა  და პოზიციის შერჩევის არსი, ყოველთვის მოუმატებს"...

სეტიენს საკმაოდ კარგი საფეხბურთო კარიერა ჰქონდა. თავის დროზე მან 70 მატჩი ჩაატარა "ატლეტიკოში". სეტიენს უხმეს მსოფლიოს 1986 წლის ჩემპიონატზე, მაგრამ ფინალურ ტურნირზე ერთი წუთიც არ უთამაშია...

ასეა თუ ისე, დღეს ეს კაცი 2022 წლის ივნისის ბოლომდე "ბარსელონას" მწვრთნელია - ასე წერია მის კონტრაქტში. წარდგენისას მან საინტერესო რამ თქვა:

"ჩემს ყველაზე ველურ ოცნებებშიც კი ვერ წარმოვიდგენდი, რომ "ბარსელონას" მწვრთნელი გავხდებოდი. გუშინ ჩემს მშობლიურ ქალაქში დავსეირნობდი, ძროხების გარემოცვაში, დღეს კი აქ ვარ... მადლობა "ბარსელონას" ხელმძღვანელობას, რომ მომცა შანსი, მსოფლიოს საუკეთესო ფეხბურთელების მწვრთნელი გავმხდარიყავი".

1561
მკითხველის კომენტარები / 0 /
მსგავსი ამბები
რუბრიკის სხვა სიახლეები
;