კიტეიშვილის ტრანსფერით ბიუჯეტის შევსება შეიძლებოდა... ერთადერთი ქართველი, ვისი ფასიც კარანტინის შემდეგ გაიზარდა!..

ავსტრიულმა abseits.at-მა ოთარ კიტეიშვილი გრაცის "შტურმის" საუკეთესო მოთამაშეთა სამეულში მეორე ადგილზე დაასახელა.

"სეზონში ყველაზე შედეგიანი კირილ დესპოდოვი იყო, რომემაც 8 გოლი გაიტანა, ხოლო კიტეიშვილმა ბექიმ ბალაისთან ერთად 6 გოლით მეორე-მესამე ადგილზეა. 24 წლის ქართველი ნახევარმცველი საგოლე გადაცემის ნომინაციაში 6 პასით მესამე ადგილზეა. 8 პასით პირველზე ტორსტენ რეჰერია, ხოლო მეორეზე, 7 პასით, კირილ დესპოდოვი. რეჰერმა შემოდგომაზე კარგად ითამაშა, მაგრამ შემდეგ მნიშვნელოვნად მოუკლო. მუდმივად კი შემადგენლობაში ორი ლეგიონერი იყო - დესპოდოვი და კიტეიშვილი", - წერს გამოცემა.

abseits.at-მა 2019/20 წლების სეზონის განიხილვისას, საქართველოს ნაკრების ნახევარმცველის პროგრესი ერთ-ერთ მთავარ მოვლენად დაასახელა: "ქართველი ლეგიონერი ოთარ კიტეიშვილი ერთ-ერთი იშვიათია იმ მოთამაშეებიდან, ვინც გუნდის მიერ სუსტად ჩატარებულ 2019/20 წლების სეზონში კარგად თამაშა. ახლა ამიტომაც არის საერთაშორისო დონეზე უფრო სასურველი მოთამაშე, ვიდრე სეზონის წინ. ქართველი ნახევარმცველი მოედნის ცენტრში ბევრს მუშაობდა და უფრო ეფექტური გახდა. ის არის ფეხბურთელი, რომლის ტრანსფერსაც შეეძლო, ზაფხულში "შტურმის" ბიუჯეტისთვის ცოტა შვება მაინც მოეტანა", - წერს გამოცემა.

 "შეიძლება, ოთარ კიტეიშვილი დარჩეს. ის ამ საკითხს ძალიან მშვიდად უდგება, რადგან კლუბთან კონტრაქტი აკავშირებს", - ეს უკვე კლუბის სპორტული დირექტორის, ანდრეას შიკერის სიტყვებია, რომელმაც კიტეიშვილის წასვლა, ფაქტობრივად, გამორიცხა.

საინტერესოა, რომ გერმანულმა სამენეჯერო სააგენტო "ტრანსფერმარკტმა" ორიოდე დღის წინ ავსტრიის ბუნდესლიგაში სეზონის დასრულების შემდეგ ფასებს გადახედა და კიტეიშვილის გრაფაში კვლავ 2 მილიონი ევრო ჩაწერა.

არადა, პანდემიის პირობებში სატრანსფერო ფასების შემცირების გამო 8 აპრილს მის გრაფაში ამ ციფრის ნაცვლად 1,5 მილიონი ევრო დაწერა. ამით კიტეიშვილი ერთადერთი ქართველი ფეხბურთელია ამ დროის მონაცემებით, ვისი შეფასებაც ცნობილმა სამენეჯერო სააგენტომ გაზარდა და ეს ბევრ რამეზე მეტყველებს.

4078
მკითხველის კომენტარები / 0 /
მსგავსი ამბები
რუბრიკის სხვა სიახლეები
;