კლასი და პოტენციალი ეტყობა!.. ანანიძეზე ქეცბაიამ და თანაგუნდელემა ილაპარაკეს

ჯანო ანანიძემ "ანორთოსისში" პირველი მატჩი ჩაატარა და ბეწვზე გადარჩა. საქართველოს ნაკრების ნახევარმცველის დებიუტს დიდი გამოხმაურება მოჰყვა...

კვიპროსის თასის მერვედფინალურ შეხვედრაში თემურ ქეცბაიას გაწვრთნილებმა შინ ნიქოზიის "ოლიმპიაკოსი" დაამარცხეს (3:0) და ორმატჩიანი დაპირისპირების (პირველი 0:0 დასრულდა) შედეგად მეოთხედფინალში გავიდნენ.

როგორც ვწერდით, "ანორთოსისში" მხოლოდ სამმა ქართველმა ითამაშა. ქეცბაიამ გიორგი ლორია დაასვენა, თორნიკე ოქრიაშვილი ჯერაც ტრავმირებულია, ხოლო ძირითად შემადგენლობაში იყვნენ ბუბა დაუშვილი და ნიკა კაჭარავა.

 ანანიძე მოედანზე 56-ე წუთზე გამოჩნდა. მატჩის დასრულებამდე 4 წუთით ადრე ის სასწაულებრივ გადაურჩა ტრავმას - "ოლიმპიაკოსის" მოთამაშე როჟერიო სილვამ მოედნის ცენტრში რომ ვერ შეაჩერა, უკნიდან მარცხენა ფეხის კუნთში "შიპები" ჩააჭედა. ეს იმდენად აშკარა უხეშობა იყო, არბიტრმა ნიქოზიელთა პორტუგალიელი ლეგიონერი არ დაინდო და წითელი ბარათი უჩვენა.

"ანორთოსისში" ანანიძის დებიუტზე კომენტარი თემურ ქეცბაიამ გააკეთა: "ფაქტია, ჯანო თავისი იდეალური ფორმისგან შორსაა და ეს ლოგიკურიცაა, რადგან ორ თვეზე მეტია, არ უთამაშია. მაგრამ ეს გამოსწორებადია, რადგან ამ სეზონში კიდევ ბევრი თამაში გვაქვს და ყველაფერი წინაა", - თქვა ქეცბაიამ.

 "ეპიზოდის გამეორებისას კარგად ჩანს, რომ "ოლიმპიაკოსის" ფეხბურთელი თამაშობდა არა ბურთზე, არამედ, ფამაგუსტელთა ახალწვეულს სერიოზული რისკის ქვეშ აყენებდა. როჟერიომ წითელი ბარათი მიიღო არბიტრისგან და სწრაფად მივიდა ანანიძესთან, რომელსაც ამ მომენტში ბედმა გაუღიმა და არ დაშავდა", - წერს goal.com.

ჯანოზე ილაპარაკა "ოლიმპიაკოსთან" მატჩის საუკეთესო მოთამაშემ, ბერძენმა ნახევარმცველმა ნიკოს კალცასმაც: "ის შესანიშნავი მოთამაშე და, უპირველეს ყოვლისა, შესანიშნავი ადამიანია. ჩვენ გვინდა, რომ გუნდს სწრაფად შეეგუოს და გოლებით და საგოლე გადაცემებით დაგვეხმაროს. მას საუკეთესო ფორმის აღსადგენად დრო ჯერ კიდევ სჭირდება. თუმცა, მას მერე, რაც მოედანზე გამოჩნდა, თავისი ქმედებებით აჩვენა, რომ პოტენციალი და კლასი ნამდვილად აქვს", - ამბობს კალცასი.

საინტერესოა ქეცბაიას კომენტარი ლორიას უთამაშებლობაზეც: "ლორია ტრავმირებული არ არის. უბრალოდ, სეზონში ბევრი თამაშია, გუნდის ზოგიერთ წევრს კი პრაქტიკა აკლია და გადავწყვიტეთ, ლორია დაგვესვენებინა. ჩვენ თითოეული მათგანი გვჭირდება".

რაც შეეხება ოქრიაშვილს, ამაზე "სიგმალაივი" წერს: "ოქრიაშვილის არყოფნა "ომონიასთან" (იგულისხმება ჩემპიონატის მატჩი, რომელიც ქეცბაიას გუნდმა წინა უქმეებზე სტუმრად 0:2 წააგო - ავტ) "ანორთოსისთვის" მოულოდნელი და დიდი დარტყმა იყო, მიუხედავად იმისა, რომ ქეცბაიას მარცხენა ფლანგზე არაერთი ვარიანტი აქვს. ქართველი ტრავმირებული იყო. მოედანზე დასაბრუნებლად მას ჯერ კიდევ დრო სჭირდება", - წერს გამოცემა.

2300
მკითხველის კომენტარები / 0 /
მსგავსი ამბები
რუბრიკის სხვა სიახლეები
;