კობი ბრაიანტი: უნდა გიყვარდეს ბრძოლა, დარტყმა, შენკენ მოქნეული იდაყვი!

კობი ბრაიანტი კობი ბრაიანტმა შექმნა. მან იცოდა, რა არის კალათბურთი და რა არის საჭირო ესტრაკლასის კალათბურთელობისთვის. ეს ყველაფერი კარგად გადმოსცა თავის წიგნში "მამბას მენტალიტეტი", რომლის ერთი თავი ჩვენს მკითხველს უთუოდ დააინტერესებს.

წნეხი
გარედან წნეხი არასოდეს მიგრძვნია. ვიცოდი, რაც მინდოდა, რაც შემეძლო და რამდენი უნდა მეშრომა მიზნის მისაღწევად. წნეხს კი იმიტომ ვერ ვგრძნობდი, რომ არავინ ითხოვდა ჩემგან იმაზე მეტს, ვიდრე თავად ვითხოვდი.

საინტერესო ფრაგმენტები კობი ბრაიანტის წიგნიდან Mamba Mentality: კობი ჯორდანზე, აივერსონზე და ლებრონზე

ლიდერობა
შაკილ ონილის ტრავმის გამო "ლეიკერსს" რთული დროება დაუდგა. ზედიზედ ორი მატჩის წაგების შემდეგ გადავწყვიტე მემოქმედა, გუნდი ფსიქოლოგიურად არ უნდა დავარდნილიყო. საამისოდ აუცილებელი იყო საკუთარ თავზე ამეღო ბომბარდირობა და გუნდის ემოციურ მდგომარეობაზე ზრუნვა.

სურათზე (#1) ჩატენვის მომენტია (იაო მინის წინააღმდეგ). ეს მესამე პერიოდში მოხდა, რითაც ყველას დავანახე, რა განწყობაზე ვიყავი - გუნდიც ხასიათზე მოვიდა. "ჰიუსტოთან" მოგროვილი 52-ვე ქულა ძალიან მნიშვნელოვანი იყო, რადგან შეხვედრა ორი ოვერტაიმისგან შედგებოდა, ძალიან დაძაბული იყო.

მოვიგეთ. პარტნიორებმაც დაინახეს, რომ მზად ვიყავით წაგებები დაგვევიწყებინა და კურსი გაგვესწორებინა. მას მერე 10-დან 9 შეხვედრა დავასრულეთ ჩვენს სასარგებლოდ.

თუმცა დიდ გამარჯვებებს დიდი ძალისხმევა სჭირდება. ზედიზედ ექვს მატჩში მოვაგროვე 40-ზე მეტი ქულა. მეექვსის შემდეგ მუხლები დამისივდა. ვერ ვმოძრაობდი, არადა, მომდევნო დღეს"იუტასთან" უნდა გვეთამაშა. კარგად მოვემზადე და მაინც 40 წუთი ვითამაშე, 40 ქულა ჩავაგდე. მოვიგეთ.

რა მდგომარეობაშიც უნდა იყოთ, საკუთარი თავი ბოლომდე უნდა მისცეთ გუნდსა და თამაშს. ესაა გამარჯვების ფასი. ესაა დიდების ფასი.

კობი ბრაიანტის ბოლო წუთები...

გადამწყვეტი
ხალხი დიდ ყურადღებას აქცევს უკანასკნელ წუთზე ჩაგდებულ ბურთებს. რეალურად, ეს ჩვეულებრივი ტყორცნაა. თუ დღის განმავლობაში 1000 სროლა შეასრულე, ეს ბოლო წუთზე ნატყორცნი ხომ უბრალოდ ერთი იქნება ათასიდან?!

სურათზე (#2) სამქულიანი ტყორცნაა, რომლითაც NBA-ს ფინალური სერიის მესამე მატჩი მოვიგეთ და საერთო ანგარიში გავათანაბრეთ. ამ მომენტში მთავარი იყო, ბურთი მიმეღო. ვიცოდი, დამცველები ყველაფერს გააკეთებდნენ, რომ ბურთამდე არ მივეშვით, მაგრამ ამას არაფრად ვაგდებდი.

თუ ბურთი ხელთ გაქვთ, უნდა იცოდეთ, ვინ დგას თქვენს წინ. დეტალურად უნდა იცოდეთ მეტოქის დაცვითი სტრატეგიის შესახებ. ტყორცნის მომენტში ჩემს წინაშე რიჩარდ ჰემილტონი იდგა, კლასიკური, ძლიერი დამცველი. კარგად მყავდა შესწავლილი და კონკრეტულ მომენტში რაც მინდოდა, სწორედ ის გავაკეთებინე: ფლანგისკენ გადავედი და ელვის სისწრაფით ჰაერში ავფრინდი. ასეთ დროს ჰემილტონს ის დარჩენოდა, მხოლოდ ხელები აეწია, მთავარი იყო, შორეული ტყორცნის შემდეგ ბურთი კალათში ჩაშვებულიყო.

დააკვირდით ნახტომის სიმაღლეს: მიუხედავად იმისა, რომ სეზონი მთავრდებოდა, ენერგია არ მაკლდა, მშვენიერ ფორმაში ვიყავი. ასეთ მაღალ ნახტომში ტყორცნისას მეტოქეს შანსი არ აქვს, ყველაფერი შენს სნაიპერულ სიზუსტეზეა დამოკიდებული.

ღმერთმა ორი ხელი მოგვცა
პატარაობაში დისკომფორტს განვიცდიდი, როცა ვგრძნობდი ჩემს სუსტ მხარეს. ასეთი იყო მარცხენა ხელი. ამიტომ, ერთ დღესაც გადავწყვიტე, მეწერა მარცხენათი, კბილები გამომეხეხა მარცხენათი... დისკომფორტის შეგრძნებას ვერ ვიტანდი.

სრულყოფილი კალათბურთელი რომ იყო, ორივე ხელით თანაბრად უნდა თამაშობდე. ტყორცნისას, ბურთის ტარებისას ორივე ხელით თანაბრად, კომფორტულად უნდა მოქმედებდე.

კონტაქტს არასოდეს გავურბოდი
დარწმუნებული ვიყავი, რომ რეჯი მილერზე უკეთესი გახლდით. არ ვარ დარწმუნებული, რომ ამის მიზეზი განწყობა იყო, უბრალოდ მასზე აგრესიული ვიყავი. ფარქვეშ შევიდოდი იმდენჯერ, რამდენჯერაც შევძლებდი.

დააკვირდით ფოტოს (#3) - თუ ფარქვეშ ასე მიიწევთ, უფრო მეტად ტანს იყენებთ, ვიდრე ხელებს. ხშირად ხდება ასე - დამცველი, აგრესიულ პრესინგს თამაშობს და შემტევიც ნებდება. ასეთ სიტუაციაში არასოდეს აღმოვჩენილვარ - როცა ფარქვეშ შევდიოდი, ყველას ეშინოდა! მე არ ვიყავი ადამიანი, რომელსაც ტრავმის მიღების საფრთხე ემუქრებოდა - ასეთი საფრთხე დამცველის წინაშე იდგა.

მნიშვნელობა არ ჰქონდა, ვინ იყო მეურვე, ფარქვეშ ძალიან მწვავედ, თავდადებით შევიდოდი და დამცველებს დავაფიქრებდი - უღირთ ჩემი გამოწვევის მიღება?

სახალისო იყო
შეხედეთ როდმანს (სურათი #4), ისე მეთამაშება, თითქოს სულის ამორთმევა გადაუწყვეტავს. მან იცის, ეს ლეგალურად როგორ გააკეთოს. მის არსენალში მეტოქის შემაფერხებელი იმდენი იარაღია, ტელევიზორში ერთიც არ ჩანს. ტელეეკრანებზე ვერ ხედავთ იგი როგორ იჭერს მოწინააღმდეგეს, როგორ ჰკრავს ხელს... თუ მაინც შენიშნავთ, ტელევიზორი მაინც ვერ დაგიხატავთ რეალურ სურათს.

როდმანი ერთ-ერთი ყველაზე ჭკვიანი კალათბურთელი იყო, ვის წინააღმდეგაც მითამაშია. მაიკლ ჯორდანიც არ ჩამორჩებოდა, არც ის მოერიდებოდა მაისურით დაჭერას, მეტოქის დიდ წნეხში მოქცევას. სწორედ ამ ხალხისგან, "ჩიკაგო ბულსისგან" მივიღე ცოდნა, რა არის საჭირო ჩემპიონობისთვის.

გაცნობიერება იმისა, რამდენად მნიშვნელოვანია ფიზიკური კონტაქტი, მხოლოდ საქმის ნახევარია. უნდა გსიამოვნებდეს ხელში სხვისი მაისურის შეგრძნება, ისევე როგორც შენი მაისურისა სხვის ხელში. შეიძლება გიყვარდეს სიტუაცია, როცა ვინმე გირტყამს, შენ კი ორჯერ ურტყამ. შეიყვარე ყოველი დარტყმა, შენკენ წამოსული იდაყვი... თუ შეიყვარებ - ე.ი. მზად ხარ გამარჯვებისთვის!

[VIDEO] ბრაიანტი VS ფაჩულია - მატჩი, რომელიც არასოდეს დამავიწყდება!

ბლოკებიდან თავის დაღწევის საუკეთესო საშუალებაა, შეისწავლოთ კონკრეტული კალათბურთელი, რომელიც ბლოკით ეცდება თქვენს შეჩერებას. საამისოდ კი, ვიდეოჩანაწერს უნდა უყუროთ. ყველა კალათბურთელი სხვადასხვა კუთხით, სხვადასხვა სტილით აყენებს ბლოკს და თუ გეცოდინებათ, მომდევნო მომენტში როგორ დადგება, მისგან თავის დაღწევა გაგიიოლდებათ.

როდმანსა და ჯორდანს შორის მოქცეული სულაც არ ვეცადე დენისთან ჭიდაობას, რადგან მას ამით საშუალებას მივცემდი ხელები შეებოჭა. ჯორდანისკენ გავიწიე, რათა, რაც შეიძლება მეტი სივრცე გამომეთავისუფლებინა ბლოკის დამყენებელსა და მეორე დამცველს შორის.

შაკი დომინირებდა
თუ ხართ გუნდში, რომელშიც დომინანტი ცენტრი თამაშობს, მასთან ურთიერთობის საუკეთესო საშუალებაა, შეუქმნათ პირობები ქულების მოგროვებისთვის. მე ეს გამომდიოდა, რადგან დამცველებს ჩემი ტყორცნებისა ეშინოდათ. შედეგად, ერთს მეორე ეხმარებოდა და სროლის ნაცვლად პასს თავისუფალ პოზიციაში მყოფ შაკილ ონილს ვაძლევდი.

ამ პროცესში ერთი დეტალია მნიშვნელოვანი: დამცველმა ხელები უნდა ასწიოს, ეგონოს, რომ მართლაც სტყორცნი, რის შემდეგაც პასისთვის სივრცე თავისუფლდება. ამავე დროს დარწმუნებული უნდა იყოთ, რომ პასის შემდეგ ცენტრი კომფორტულად იგრძნობს თავს, მისი ულაპარაკოდ უნდა გესმოდეთ, იცოდეთ, წამის მეასედში საით წავა და რომელი მხრიდან ურჩევნია შეტევის დასრულება.

2258
მკითხველის კომენტარები / 0 /
მსგავსი ამბები
რუბრიკის სხვა სიახლეები
;