კოლუმბიური სასწაული "სტად დე ფრანსზე"

საფრანგეთი-კოლუმბია 2:3
გოლები: 1:0 ჟირუ (11), 2:0 ლემარი (26), 2:1 მურიელი (28), 2:2 ფალკაო (62), 2:3 კინტერო (85-პენ)

საფრანგეთი (4-2-3-1): ლორისი - სიდიბე, ვარანი, უმტიტი, დინი (76. ლ. ერნანდესი) - კანტე, მატუიდი (65. პოგბა) - მბაპე (66. უ. დემბელე), გრიზმანი (83. ტოვენი), ლემარი - ჟირუ (73. ბენ იედერი)

კოლუმბია (4-2-3-1): ოსპინა - არიასი, მინა, დ. სანჩესი, ფაბრა - აგილარი (67. ლერმა), კ. სანჩესი - ურიბე (90. ბარიოსი), ხ. როდრიგესი (83. კინტერო), მურიელი (77. ისკიერდო) - ფალკაო (68. საპატა)

დიდიე დეშამის გუნდმა 2-გოლიანი უპირატესობა გაანიავა - სამი გოლი გაუშვა და მუნდიალისთვის მზადება მარცხით დაიწყო. დეშამმა 4-4-2 სისტემაში პოლ პოგბას ადგილი ვერ გამოძებნა ("იუნაიტედის" ნახევარმცველი მხოლოდ მეორე ტაიმში გამოჩნდა).

"სტად დე ფრანსზე" საუკეთესოდ თომა ლემარი წარმოჩნდა, სტუმართა რიგებში კი ორი საგოლე პასი ხამეს როდრიგესმა მიითვალა.

დიდიე დეშამი (საფრანგეთის მწვრთნელი): "ბევრი პრობლემა შეგვექმნა, მეტოქემ აგრესიულად ითამაშა, ჩვენ ეს ვერ შევძელით. აგრესიული თამაშით კოლუმბიელებმა საფეხბურთო გაკვეთილი ჩაგვიტარეს.

ბურთის ხშირმა დაკარგვებმა მეტოქეს თამაშის შემოტრიალების შანსი მისცეს. მეორე ტაიმში ისე ვითამაშეთ, გარკვეული ხანი მოვუნდები მის ანალიზს, კარგი ბევრი არაფერია. საკუთარ ფანებთან საბოდიშო გვაქვს, შინ წაგება არასოდეს არის იოლად მოსანელებელი".

რაფაელ ვარანი (საფრანგეთი): "თამაში ძალიან კარგად დავიწყეთ, შემდეგ კი კონცენტრაცია დავკარგეთ. 90 წუთი ერთ დონეზე უნდა ითამაშო, მით უფრო, ასეთ აგრესიულ მეტოქესთან. გვქონდა ინდივიდუალური სახის შეცდომების".

ფაქტები

* ოლივიე ჟირუმ ბოლო 9 სანაკრებო მატჩში 9 გოლი გაიტანა.

* ჟირუს ანგარიშზე 70 მატჩში 30 გოლია. ის ჟიუსტ ფონტენსა და ჟან-პიერ პაპენს გაუთანაბრდა. შემდეგი ზინედინ ზიდანია (31 გოლი).

* კილიან მბაპემ ბოლო სამ სანაკრებო მატჩში თითო საგოლე პასი გააკეთა. ანტონი მარსიალის (2015) შემდეგ, ეს ვერავინ შეძლო საფრანგეთის ნაკრებში.

* ანტუან გრიზმანმა (საფრანგეთი) ნაკრებში 50-ე მატჩი ითამაშა (6 გოლი, 4 საგოლე პასი).

* საფრანგეთის ნაკრები მეოთხედ ეთამაშა კოლუმბიას და პირველად დამარცხდა (3 მოგება აქამდე).

ყოველდღიური სპორტული გაზეთი "ლელო"
1356
მკითხველის კომენტარები / 0 /
მსგავსი ამბები
რუბრიკის სხვა სიახლეები
;