"კოლხეთის" დირექტორი: შტელინს წასვლა სურდა, მაგრამ დავტოვეთ...

ეროვნული ლიგის XXIX ტურში "საბურთალომ" ფოთის "კოლხეთი" არასაფეხბურთო ანგარიშით, 6:3 დაამარცხა. ცხადია, ყველამ ყურადღება იმას მიაქცია, რომ ერთ შეხვედრაში 9 გოლი გავიდა და სამმა ფეხბურთელმა დუბლი შეასრულა. მაგრამ ამ შეხვედრის შემდეგ ბევრმა არ მიაქცია ყურადღება იმ ფაქტს, რომ ფოთის "კოლხეთის" მწვრთნელის გრაფაში მთავარი მწვრთნელის, ალექსანდრ შტელინის ნაცვლად მისი თანაშემწე, ნუგზარ თვარაძე იყო მითითებული.

როგორც შევიტყვეთ, უკრაინელი სპეციალისტი გუნდის დატოვებას აპირებდა. ეს კლუბის დირექტორმა თემურ ბარქაიამ გვითხრა:

"შტელინი წასვლას აპირებდა და ამის დამალვას არ ვაპირებ. ყველამ იცის, რომ გუნდში სირთულეები იყო და გადადგომაზე განცხადება დაწერა. მაგრამ საბოლოოდ, მისი განცხადება არ დავაკმაყოფილე, ველაპარაკეთ და წასვლა გადავაფიქრებინეთ. ასე რომ, შტელინი "კოლხეთში" მუშაობას აგრძელებს და გუნდს ხუთშაბათს, 19 სექტემბერს, ქუთაისის "ტორპედოსთან" მატჩისთვის მოამზადებს", - ამბობს ბარქაია.

მისი თქმით, ამ წაგებას რეაგირების გარეშე ვერ დატოვებს:

"სერიოზული მუშაობა გვჭირდება, უმაღლეს ლიგაში ადგილი რომ შევინარჩუნოთ. ასეთ დროს, "საბურთალოსთან" წაგებას რეაგირების გარეშე ვერ დავტოვებ. ზოგიერთი მოთამაშის მიმართ სანქციებს გამოვიყენებთ, რადგან შტელინის მოთხოვნით, ამ შეხვედრამდე ფეხბურთელებს ყველა პირობა შევუქმენით, სანაკრებო პაუზაზე კარგად რომ მომზადებულიყვნენ. ამ ყველაფრის შემდეგ 3:6 სამარცხვინო შედეგია და ამას გულშემატკივარს ვერაფრით ავუხსნით".

ბარქაიას ცნობით, კლუბში საკადრო ცვლილება მოხდა და მალე სხვა სიახლეებიც იქნება:

"ლაშა ჯაკობია სპორტული დირექტორი აღარ არის. მან ჩვენი კლუბისთვის ბევრი კარგი საქმე გააკეთა. მაგრამ ახლა იყო საკითხი, რომელშიც შეუთანხმებელი გადაწყვეტილება მიიღო, რომელსაც არ ვეთანხმებოდი და კლუბი დატოვა. თუმცა, ბელგიურ სააგენტოსთან, რომელსაც ის წარმოადგენს, შესაძლოა, თანაშრომლობა გავაგრძელოთ, რადგან მათი ფეხბურთელები "კოლხეთში" ახლაც თამაშობენ.

ამას გარდა, დასამალი არც ის არის, რომ გუნდში კიდევ იქნება საკადრო ცვლილებები. გადასახედი და შესაცვლელი ბევრი რამ არის, მათ შორის - შემადგენლობაში. ზაფხულში, როცა გაძლიერებას ვაპირებდით, მოხდა პირიქით - წამყვანი მოთამაშეების ნაწილმა დაგვტოვა და უმძიმეს მდგომარეობაში ჩავვარდით. სამწუხაროდ, ამ დანაკლისის შევსება გაგვიჭირდა.

ახლა გუნდში რამდენიმე ისეთი პოზიციაა, სადაც ძალიან გვიჭირს. ამიტომ, სასწრაფოდ ვაპირებთ ორი თავისუფალი აგენტის დამატებას, მნიშვნელოვანი შეხვედრების წინ რომ გავძლიერდეთ და ლიგაში ადგილი შევინარჩნოთ. ამას გარდა, ველოდებით, რომ ცენტრალური მცველი სანდრო გურეშიძეც მოედანს მალე დაუბრუნდება და დაგვეხმარება".

კოლხების დირექტორის თქმით, დარჩენილ შეხვედრებს გუნდი ლიგაში დასარჩენი პლეი ოფისთვის სამზადისს მოახმარს:

"შესაძლოა, გარედან არ ჩანს, მაგრამ ამ გუნდში დიდი შრომაა ჩადებული და ამდენი წვალების შემდეგ ეს ყველაფერი წყალში არ უნდა ჩავყაროთ. ეროვნული ლიგის დასრულებამდე 7 ტურია დარჩენილი და ცხადია, თითოეულ ქულას ჩვენთვის მნიშვნელობა გააჩნია. რასაკვირველია, დარჩენილ შეხვედრებში ჩამორჩენის დაძლევა ძალიან ძნელი იქნება. მაგრამ ლიგაში დასარჩენად ყველაფერს გავაკეთებთ და ყურების ჩამოყრას არ ვაპირებთ.

დარჩენილ ტურებს საიმისოდ გამოვიყენებთ, რომ ქულების მაქსიმუმი დავაგროვოთ, ბოლო ადგილი თავიდან ავიცილოთ და გადათამაშებაში მაინც მოვხვდეთ. რეალურად, დარჩენილი შეხვედრები სწორედ გადათამაშებისთვის კარგად მოსამზადებლად უნდა გამოვიყენოთ. ამას გარდა, შემდგომ შეხვედრებში მაქსიმალური შედეგების ჩვენება ფინანსურადაც მნიშვნელოვანია, რადგან ყოველი ქულისთვის ერთიანი ფონდიდან პრემიალური თანხა დაგვერიცხება და ეს ბიუჯეტზე აისახება".

ყოველდღიური სპორტული გაზეთი "ლელო"

2103
მკითხველის კომენტარები / 0 /
მსგავსი ამბები
რუბრიკის სხვა სიახლეები