'კოლხეთი' ფოთში დაბრუნდა, - 'პარკი არენაზე'

ხანგრძლივი პაუზის შემდეგ "კოლხეთი" ფოთში დაბრუნდა და სარაგბო სტადიონ "პარკი არენაზე" ითამაშებს - ამ ინფორმაციას კლუბის ვებგვერდი ავრცელებს და ეროვნული ლიგის საიტზეც ასეა მითითებული: 11აგვისტოს, 17:30 საათზე, კოლხები "საბურთალოს" სწორედ ფოთში უმასპინძლებენ.

"პარკი არენაზე" გასამართი ეს შეხვედრა აუტსაიდერისთვის ძალიან მნიშვნელოვანია, რადგან სატურნირო ცხრილის ბოლო საფეხურზე იმყოფება და ახლა თითოეულ ქულას ოქროს ფასი ადევს. .

გუნდის აუტსაიდერობაში დიდი როლი იმანაც ითამაშა, რომ "კოლხეთს" წელს ფოთში არ უთამაშია, მეტოქეებს ზესტაფონის დავით აბაშიძის სახელობის სტადიონზე მასპინძლობდა და ცხადია, საკუთარ მაყურებელს მოკლებული გუნდი შესაძლებლობებს სრულად ვერ ავლენდა. თუმცა ეს მხოლოდ ერთ-ერთი მიზეზია, დანარჩენზე აქ აღარ შევჩერდებით.

...მაგრამ რა ხდება ამასობაში ფოთის "ფაზისის" სტადიონზე, რომლის რეკონსტრუქციის პირველი ეტაპის დასასრული საკმაოდ გაიწელა. იყო დაპირება, რომ მოედნის საფარის დაგების შემდეგ, ინსფრასტრუქტურული სამუშაოები დასრულდებოდა და გუნდი საკუთარ არენას აგვისტოს ბოლოს დაუბრუნდებოდა. თუმცა უცნობია, ეს სანატრელი დღე სექტემბერში მაინც თუ დადგება?

ჯერ "ფაზისის" ტრიბუნებზე ინდივიდუალური სკამებია დასამონტაჟებელი, მერე კიდევ ოთახები, საშხაპეები... მოკლედ, სამუშაო ბევრია და იმედი ვიქონიოთ, სარეკონსტრუქციო სამუშაოები ოპტიმალურ კალაპოტს დაუბრუნდება.

ყოველდღიური სპორტული გაზეთი "ლელო"
1710
მკითხველის კომენტარები / 0 /
მსგავსი ამბები
რუბრიკის სხვა სიახლეები
;