'კოლხეთი' 0:1 'სამტრედია': სამი ქულა ექვსად ფასობს [მიმოხილვა]

04.11. ფოთი. პარკი არენა
0:1 ფანცულაია (38. ფატიჩის პასით)

კოლხეთი (4-2-3-1): კნიგა - კერელეიშვილი, აფხაზავა, ციკოლია, კაკულია - დოროშჩენკო (72. თამ. შალიკაშვილი), ტყემალაძე - აშორტია (80. ძაძამია), პრიჩინენკო, კაბორე (84. ჭეჭელაშვილი) - იმნაძე
სათადარიგო: მიქავა, ხატიაშვილი, ლ. მახარაძე, მთივლიშვილი
მწვრთნელი: ვიქტორ დემიდოვი

სამტრედია (4-4-2): კუპატაძე - ჩაჩუა, გოგიაშვილი, გურული, ფატიჩი - კოშმანი, კერძევაძე (61. მამასახლისი), ენდელაძე, ლიპარტია (90+2. ახალაძე) - ფანცულაია (73. მაქაცარია), ტუღუში
სათადარიგოები: ო. სტურუა, თორ. შალიკაშვილი, ბურკაძე, კუჭუხიძე
მწვრთნელი: გიორგი დარასელია
გაფრთხილებები: კნიგა (19), ფატიჩი (23), კაკულია (23), ენდელაძე (60)
არბიტრი: ი. კვირიკაშვილი

ფოთის "პარკი არენაზე" გამართული მატჩი ისეთი მნიშვნელობის იყო, ჩვენში "ექვსქულიანს" რომ უწოდებენ. ამისთვის ორივე გუნდი განსაკუთრებული მონდომებით ემზადებოდა. მაგრამ მარტო მონდომება ვერაფერი ბედენაა - მასპინძლებს კლასი არ ეყოთ და უმტკივნეულესი მარცხი იწვნიეს...

უფრო სამტრედია, ვიდრე...

"სამტრედია" გამოიყურებოდა, აქტიურობდა და რეალურ საგოლე მომენტებსაც მეტოქეზე ხშირად ქმნიდა. მე-9 წუთზე სამტრედიელებმა სწრაფი შეტევა წამოიწყეს, მარჯვენა ფლანგიდან ავთანდილ ენდელაძის მიერ ჩაწოდებული ბურთი კარისკენ ჯაბა ლიპარტიამ გააგზავნა, დამატებაზე კი გიორგი ფანცულაიამ დაარტყა, მაგრამ თამაშგარე დაუფიქსირეს.

მალე მომენტი ისევ ფანცულაიას ჰქონდა, მაგრამ მურად აფხაზავამ ჩაუშალა გოლის გატანის მცდელობა. 21-ე წუთზე ფოთელთა მეკარე დენის კნიგამ ჯაბა ლიპარტიას დარტყმული მოიგერია და გუნდი გადაარჩინა.

შეხვედრა ორივე გუნდისთვის მნიშვნელოვანი იყო და ეს 23-ე წუთზე ივან ფატიჩისა და ლევან კაკულას უხეშობის დროსაც აისახა - ორივე ყვითელი ბარათით დაისაჯა.

ფოთელებს მეტოქის საჯარიმოში შესვლა უჭირდათ და ვაკო ტყემალაძემ კარის აღება შორიდან სცადა, თუმცა დავით კუპატაძემ ბურთი მოიგერია. 36-ე წუთზე კი ბექა ტუღუში ურტყამდა და მიზანს ოდნავ ააცილა.

სტუმართა მონდომებამ შედეგი მაინც გამოიღო: 38-ე წუთზე ფატიჩმა მარცხენა ფლანგიდან რეიდი დაიწყო, ცენტრისკენ გადაიწია და მცველებს შორის გააძვრინა ბურთი, გიორგი ფანცულაია კი კარგად გაიხსნა და მეკარეს შორეულ კუთხეში აუღებელი დაურტყა - 1:0.

უკან დასახევი გზა აღარ იყო...

ფოთელებს უკან დასახევი გზა არ ჰქონდათ და მეორე ტაიმში წონასწორობის აღდგენა სცადეს. კირილ დოროშჩენკოს კარგი გადაცემით კარის წინ იმედა აშორტია დარჩა, მაგრამ მცველის მოტყუების შემდეგ დარტყმას მეკარე დავით კუპატაძე გადაეფარა და გუნდი გადაარჩინა.

მალე სამტრედიელებმა მდგომარეობა გამოასწორეს და კონტრშეტევებზე მეტოქეებს კიდევ არაერთი პრობლემა შეუქმნეს. ერთ მომენტში შეტევას იგორ კოშმანი აგვირგვინებდა, მაგრამ კარიდან ბურთი მცველმა გამოიტანა და კოლხები გადაარჩინა. ასევე მოხდა მე-60 წუთზე, როცა ლიპარტიამ "გაისროლა"...

მერე ლევან კაკულიას შეეძლო, შედევრის ავტორი გამხდარიყო - ბურთი საჯარიმოსთან მიიღო, ძალიან პატარა მონაკვეთში ერთდროულად ექვს(!) მოწინააღმდეგეს გასცდა და კარის წინ დარჩა, მაგრამ... მიზანს ააცილა და ჩემპიონატის (შეიძლება) საუკეთესო გოლის გატანის შანსი ხელიდან გაუშვა...
31 ტურის შემდეგ, "სამტრედიამ" 21 ქულა დააგროვა, უშუალო კონკურენტ "კოლხეთს" 7 ქულით გაასწრო და, დიდი ალბათობით, პლეი აუტში ითამაშებს, ხოლო ფოთელებს ეროვნულ ლიგა 2-ში დაქვეითება არ ასცდებათ.

ყოველდღიური სპორტული გაზეთი "ლელო"
597
მკითხველის კომენტარები / 0 /
მსგავსი ამბები
რუბრიკის სხვა სიახლეები
;