[კომენტარები ფინალის შემდეგ] იურგენ კლოპი: ასეთ დროს, 20 წუთში უკვე მთვრალი ვარ ხოლმე... მაურისიო პოჩეტინო: ფინალს მოგება უნდა და არა მხოლოდ კარგი თამაში...

მადრიდული ფინალი დასრულდა. ემოციები ჯერ კიდევ დუღს და გადადუღს. თასი აღმართულია, დამარცხებული დაღვრემილია... ანუ, ყველაფერი ჩვეულებრივადაა, როგორც ეს ფინალური ბრძოლების შემდეგ ხდება...

იქვეა მედიაც, რომელიც, ამ ყველაფრის მიუხედავად, მუშაობს, იღებს, იწერს... მწვრთნელები მატჩისშემდგომ კომენტარებს ვერ გაექცევიან. რა თქმა უნდა, საღამოს ერთ-ერთი მთავარი (თუ უმთავრესი არა) გმირი იურგენ კლოპია, რომელმაც პირველად მოიგო ჩემპიონთა ლიგა მე-3 მცდელობის შემდეგ:

"ჩვენ ძალიან რთული გზა გავიარეთ. განსაკუთრებით რთული იყო ბოლო სამი კვირა, როცა არ გვქონდა სათამაშო პრაქტიკა პრემიერლიგის დასრულების გამო... ფინალში მთავარი შედეგია!.. ბიჭებმა აჩვენს ის, რაც ასეთ დროს აუცილებელია - უკომპრომისობა!

ალისონმა რამდენიმე რთული ბურთი მოიგერია. ის არის მეკარე, რომლის წყალობითაც რთული მომენტებიც კი იოლად მოჩანს... თქვენ გინახავთ ოდესმე ისეთი გუნდი, რომელიც იბრძვის იმ ტანკივით, საწვავი რომ გაუთავდა?!.

მაგრამ ახლა არ მინდა ლაპარაკი იმაზე, თუ ვინ როგორ ითამაშა და როგორ გავიმარჯვეთ. ამ წუთას მინდა მხოლოდ ტკბობა ამ გამარჯვებით! ასეთ დროს, 20 წუთში უკვე მთვრალი ვარ ხოლმე, ახლა კი მხოლოდ წყლით გამწუწეს...

"ლივერპულის" სრულყოფისა და განვითარებისთვის ეს გამარჯვება აუცილებელი იყო. უნდა ვთქვა, რომ კლუბის მეპატრონეები არასოდეს გვამყოფებდნენ წნეხში და არ მოითხოვდნენ ჩვენგან აუცილებლად ამა თუ იმ ტიტულის მოგებას...

...ეს არის საუკეთესო საღამო ჩვენს პროფესიულ ცხოვრებაში. ძალიან ბედნიერი ვარ ამ ბიჭების, ამ გულშემატკივრების, ჩემი ოჯახისა და მეგობრების გამო. ვიცი, როგორც განიცდიდნენ ისინი ჩემ გამო... ეს გამარჯვება მათთვისაა!.. მოუთმენლად ველი ლივერპულში დაბრუნებას და ჩვენი გულშემატკივრების უდიდეს არმიასთან შეერთებას", - თქვა კლოპმა.

რა თქმა უნდა, ბევრს დასწყდა გული "ტოტენჰემის" გამო. აქ არ არის ლაპარაკი კლუბის ფანებზე, ვგულისხმობთ ნეიტრალურ ქომაგს, რომელიც გულგრილი ვერ დარჩებოდა იმ სამუშაოთი, რაც მაურისიო პოჩეტინომ ამ წლების განმავლობაში გასწია და რამაც მის მიმართ უამრავი დიდი სიმპათიებით განაწყო.

ამ 47 წლის არგენტინელი სპეციალისტის წყალობით "ტოტენჰემი" იქცა ერთ-ერთ გრანდად და თვითმყოფად, საკუთარი ხელწერის მქონე გუნდად, რომელმაც თავისი ნიშა დაიკავა ევოპულ ფეხბურთში და გამარჯვებები წინ აქვს.

"ახლა ძალიან რთულია ლაპარაკი... ძალიან გულდაწყვეტილები ვართ... მე ვამაყობ ჩემი ბიჭებით, ვამაყობ, რომ მათი მწვრთნელი ვარ... მაგრამ ფინალები უნდა მოიგო და არ არის საკმარისი მხოლოდ კარგი თამაში. ჩვენ თავიდანვე არ გაგვიმართლა. ისე გამოვიდა, რომ ფაქტობრივად, 0:1-ით დავიწყეთ თამაში. მეორე ტაიმში კარგადაც ვითამაშეთ, მაგრამ...

ადრეულმა გოლმა ძალიან იმოქმედა თამაშის მსვლელობაზე. ამას წინასწარ ვერ გათვლი... მინდა მივულოცო იურგენ კლოპს. "ლივერპულმა" ფანტასტიკური სეზონი ჩაატარა, ჩვენ კი ფინალმა გვაჩვენა, რომ სწორი გზით მივდივართ და ამ გზით უნდა ვიაროთ მომავალშიც. მოუთმენლად ველი იმ დღეს, როცა კიდევ მექნება ასეთი გამოცდა, თან რაც შეიძლება მალე", - თქვა პოჩეტინომ.

ყოველდღიური სპორტული გაზეთი "ლელო"
961
მკითხველის კომენტარები / 0 /
მსგავსი ამბები
რუბრიკის სხვა სიახლეები
;