კონტეს თავის ტკივილი - არის თუ არა ემენალოს წასვლა იტალიელის გამარჯვება?

"ჩელსიმ" ორდღიანი სტრესი გადაიტანა. თუმცა ეს მხოლოდ ერთი შეხედვით - გადაიტანა თუ არა, ამას ახლო მომავალში ვნახავთ. ანტონიო კონტეს ჩუმი კონფლიქტი დავიდ ლუიზთან, კლუბიდან სპორტული დირექტორის, მაიკლ ემენალოს წასვლა, რაზეც "ლელო" უკვე წერდა, ექსპერტების აზრით, აუცილებლად იქონიებს გავლენას თვით მთავარი მწვრთნელის მომავალზეც...

დავიწყოთ მაიკლ ემენალოს გადადგომით. ის 10 წლის განმავლობაში მუშაობდა სპორტულ დირექტორად და უმნიშვნელოვანესი როლი ჰქონდა საკლუბო იერარქიაში. შეიძლება ითქვას, "ჩელსის" მფლობელი რომან აბრამოვიჩი მას თვალდახუჭული ენდობოდა და სთხოვა კიდეც დარჩენა, მაგრამ ნიგერიელი (14 მატჩი ქვეყნის ეროვნულ ნაკრებში, მსოფლიოს 1994 წლის ჩემპიონატის მონაწილე) ჩინოსანი თავის გადაწყვეტილებაში შეუვალი იყო - დასვენება მჭირდება, ოჯახს უნდა მივხედოო...

თუმცა "გარდიანი" ვარაუდობს, რომ ემენალოს წასვლის მოტივი სულ სხვა იყო. მას არ სურდა იმ ინტრიგებში მონაწილეობა, რომელსაც "ჩელსის" მმართველობაში მყოფი ჩინოსნები ხლართავდნენ გავლენების გასაფართოებლად. ამბობენ, რომ ამ ინტრიგებში მონაწილეობდა კონტეც, რომელიც, თავის მხრივ, დაპირისპირებულია მარინა გრანოვსკაიასთან - აბრამოვიჩის ნდობით აღჭურვილ ქალბატონთან, რომლის საფეხბურთო გავლენებიც მხოლოდ "ჩელსით" არ შემოიფარგლება...

* * *

"ჩელსი" დღეს მხოლოდ 3 ქულით ჩამორჩება შარშანდელ გრაფიკს. ბოლო ტურში "არისტოკრატებმა" "მანჩესტერ იუნაიტედს" მოუგეს და აგრძელებენ ბრძოლას ტიტულის დასაცავად, მაგრამ რჩება შეგრძნება, რომ ორი-სამი წარუმატებელი მატჩი და კონტეს ჩემოდნების ჩალაგება მოუწევს. იტალიელმა იცოდა, რომ ეს უფრო ჯოჯოხეთური სეზონი იქნებოდა, ვიდრე შარშანდელი, როცა ჩემპიონი გახდა.

საინტერესო იქნება, გადავხედოთ ბოლო სამი თვის საგაზეთო ამონარიდებს. აი, მაგალითად: "იტალიელი უკმაყოფილოა სატრანსფერო ბაზარზე კლუბის ხელმძღვანელობის ინერტულობით".
"მე მჭირდება შემადგენლობის როტაცია და საამისოდ, აუცილებელია საკმარისი რაოდენობის ფეხბურთელები", - ჩიოდა კონტე.

ზაფხულში "ჩელსიმ" ამაოდ სცადა რომელუ ლუკაკუს დაბრუნება, ასევე ალექს სანდროსა და ალექს ოქსლეიდ-ჩემბერლენის ყიდვა, რამაც კონტესა და დირექტორებს შორის ურთიერთობა დაძაბა. კლუბის სტრუქტურაში ტრანსფერებზე პასუხისმგებელნი სწორედ გრანოვსკაია და ემენალო იყვნენ.

კიდევ ერთი ამონარიდი: "დიეგო კოშტასთან განშორების შემდეგ, რაც კონტემ სატელეფონო მესიჯით გააკეთა, იტალიელს ურთიერთობა გაუფუჭდა გრანოვსკაიასთან. აგვისტოს ბოლოს გერმანული "ბილდი" წერდა "ჩელსიში" თომას ტუხელის შესაძლო დანიშვნაზე.

ეს უკანასკნელი უმუშევარი დარჩა "დორტმუნდიდან" წასვლის შემდეგ. ტუხელის დანიშვნის ამბავი ჭორიც რომ ყოფილიყო, არის ერთი გარემოება, რომელიც ამ "ჭორს" რეალურ საფუძველს უქმნიდა. თავის დროზე, პეპ გვარდიოლა ტუხელს "ბაიერნში" თავის მემკვიდრედ ხედავდა. აბრამოვიჩი კი სწორედ გვარდიოლას მიიჩნევდა "ჩელსისთვის" იდეალურ მწვრთნელად, მაგრამ ამ ეტაპზე ეს იდეა ვერ განახორციელა".

"ჩელსიში" არსებული სიტუაციის განხილვისას "ტელეგრაფი" წერდა: "გუნდში სიმშვიდეს ვერ უზრუნველყოფს მიში ბატშუაისა და დავიდ ლუიზის ისტერიული გამოხდომები, შესაბამისად, "კრისტალ პალასსა" და "რომასთან" (ლონდონური მატჩი) შეხვედრებში".

* * *

ოქტომბერში "ჩელსის" 3-მატჩიანი მოუგებელი სერია ჰქონდა. მაგრამ ფეხბურთელებმა დაამტკიცეს, რომ მზად არიან, მწვრთნელისთვის მოედანზე თავი დადონ. კონტეც, თავისი ემოციურობით, ბავშვური ხტუნაობით, თითქოს აჩვენებდა, რომ სამუშაოს ებღაუჭებოდა, რომ უკვე სისხლხორცეულად დაუკავშირდა ლონდონს, სადაც სექტემბერში ცოლ-შვილიც დაასახლა...

მაგრამ სინამდვილეში ასე არ არის. მან აღიარა, რომ სამშობლოს ნოსტალგია მოეძალა:

"ეჭვი არ მეპარება, მალე სახლში ვიქნები. ძალიან მოვიწყინე, ჩემი იტალია მენატრება. აუცილებლად დავბრუნდები. ზუსტად არ ვიცი, ეს როდის მოხდება, მაგრამ ვიცი, რომ ნამდვილად მოხდება. ეს არის ჩემი მიზანი".

...მერე იყო რომაული კოშმარი - 0:3 "ოლიმპიკოზე", კონტეს მონატრებულ იტალიაში. ამას დაერთო დაძაბულობა დავიდ ლუიზთან, რამაც "მანჩესტერთან" მატჩის ფასი კიდევ უფრო მაღლა ასწია. "ჩელსიმ" მოუგო პრინციპულ მეტოქეს და კონტესაც, თითქოს, სანაკრებო პაუზის დროს ამოსუნთქვის საშუალება მიეცა, თუმცა... წინ იყო ორშაბათის სიურპრიზი...

* * *

დავუბრუნდეთ ნიგერიელ ჩინოსანს. როგორც სატრანსფერო მოლაპარაკებების ერთ-ერთი მონაწილე, სწორედ ემენალო იყო კონტეს საზაფხულო ნერვიულობის მთავარი მიზეზი. ამიტომ, მისი წასვლა ბევრმა იტალიელის მცირე გამარჯვებად აღიქვა. თუმცა საქმეში ჩახედული ხალხი გვირჩევს, რომ შეფასებებში არ ვიჩქაროთ.

ESPN-ის კორესპონდენტი ლიამ ტუმი, რომელიც კარგად იცნობს "ჩელსის" სამზარეულოს, "ტვიტერზე" წერდა:

"10 წლის განმავლობაში ემენალოს ხელში ათმა მწვრთნელმა გაიარა, მაგრამ მე თავს შევიკავებდი იმისგან, რომ სპორტული დირექტორის წასვლით კონტესთვის პლუსი დამეწერა. ჩემი დაკვირვებით, მათ შორის ურთიერთობა აბსოლუტურად ნორმალური იყო".

კონტეს კომენტარი:

"მინდა მადლობა გადავუხადო მაიკლს იმ დიდი დახმარებისა და მხარდაჭერისთვის, რომელსაც მისგან ყოველთვის ვგრძნობდი "ჩელსიში" ყოფნის პირველივე დღიდან. ძალიან მომწონდა მასთან მუშაობა. ჩვენ ხომ მაისში ერთად ვიზეიმეთ ჩემპიონობა, რომელშიც ძალიან დიდი იყო მისი წვლილიც".

ემენალო "ჩელსიში" 2007 წელს, ავრაამ გრანტთან ერთად მივიდა. თავიდან მას მეტოქეებზე ინფორმაციების შეგროვება ევალებოდა. შემდეგ ეხმარებოდა კარლო ანჩელოტის. 2011 წელს დაინიშნა სპორტულ დირექტორად - სელექციისა და "ჩელსის" ახალგაზრდული სექტორის განვითარების მიმართულებით.

ემენალოს პერიოდში კლუბის აკადემიამ მანამდე არნახული ინვესტიციები მიიღო და ინგლისში საუკეთესოც გახდა. რამდენიმე დღის წინ გარეთ საუთგეიტმა ეროვნულ გუნდში მიიწვია ტემი აბრაჰამი და რუბენ ლოფტუს-ჩიკი, რომლებიც სწორედ "ჩელსის" აკადემიის აღზრდილები არიან...

ემენალო არის ევროპული მასშტაბით ფეხბურთელთა მძლავრი საარენდო სისტემის ერთ-ერთი სულისჩამდგმელი. გასულ შემოდგომაზე თავად "ჩელსიმ" 38(!) მოთამაშე გაუშვა იჯარით სხვადასხვა კლუბში. ზოგიერთი მათგანი საბოლოოდ გაიყიდა და ამით "ჩელსიმ" რაღაც იხეირა, ზოგიც იქამდე გაიზარდა, რომ "იუნაიტედთან" ამასწინანდელ მატჩში ძალიან მაღალი შეფასებაც დაიმსახურა - ლაპარაკია 21 წლის დანიელ ანდრეას კრისტენსენზე, რომელიც კონტემ თვით დავიდ ლუიზს ამჯობინა.

ეჭვი არ მეპარება, მალე სახლში ვიქნები. ძალიან მოვიწყინე, ჩემი იტალია მენატრება. აუცილებლად დავბრუნდები. ეს არის ჩემი მიზანი

ემენალოს პერიოდში "ჩელსიმ" პრემიერლიგის სამი ტიტული და ჩემპიონთა ლიგა მოიგო, რაც სრულიად საკმარისია იმისთვის, რომ სპორტულ დირექტორის მუშაობას უმაღლესი შეფასება დავუწეროთ.

თუმცა ის არასოდეს ყოფილა "სტემფორდ ბრიჯის" პუბლიკის ფავორიტი. მასზე ამბობდნენ, რომ ძლიერი გავლენა ჰქონდა აბრამოვიჩზე, მაგრამ ყველაზე მეტად ფანებს აღიზიანებდათ მისი ზოგიერთი სატრანსფერო ჩავარდნა - ვინმემ დღემდე გაიგო, რა უნდოდა "ჩელსიში" პაპი ჯილობოჯის?

მაგრამ ამის კომპენსაციად უნდა ჩაითვალოს გუნდში ისეთი ფეხბურთელების მიყვანა, დღეს რომ ამინდს ქმნიან და არა მხოლოდ "ჩელსიში" - ედენ აზარი, ტიბო კურტუა, სესარ ასპილიკუეტა, ნგოლო კანტე... თავის დროზე, რომელუ ლუკაკუც მისი მიყვანილია "სტემფორდ ბრიჯზე" და კევინ დე ბრუინიც.

* * *

"ჩელსიში" კონტეს მომავალი დიდწილად იმაზეა დამოკიდებული, თუ ვინ დაიკავებს სპორტული დირექტორის ვაკანტურ პოსტს, ვინ იმუშავებს იანვრის ტრანსფერებზე და ასე შემდეგ. ამბობენ, რომ ერთ-ერთი კანდიდატურა ანდრეა პირლოა (უკვე განაცხადა კარიერის დასრულებაზე), მაგრამ ბევრისთვის ეს ფანტასტიკის მოყვარულთა გასართობია და მეტი არაფერი.

სპორტული დირექტორი, ეს არის თანამდებობა, რომელსაც გრძელვადიანი საკლუბო სტრატეგია უკავშირდება და საამისოდ გამოცდილ ხალხს არჩევენ. ეს კი პირლოს პლუსი ნამდვილად არ არის.

კონტეს ხელშეკრულებაში წელიწად-ნახევარია დარჩენილი. ზაფხულში ის ხელფასის მომატებით დააჯილდოვეს, თუმცა კონტრაქტის გაგრძელება ჯერ არ შეუთავაზებიათ. დიდი ალბათობით, ამისთვის არც თავად კონტე მოიკლავს თავს...

"ტელეგრაფის" კორესპონდენტი მეტ ლოუ წერს, რომ ახალ სპორტულ დირექტორთან დაკავშირებული საკითხის გადაწყვეტაში აბრამოვიჩი უშუალოდაა ჩართული:

"ჩელსისთვის" ეს უჩვეულო სიტუაციაა, რადგან გავლენიანი ჩინოსანი თავისი ნებით წავიდა და კლუბს არ აღმოაჩნდა მოქმედების სათადარიგო გეგმა", - ვკითხულობთ ლოუს წერილში.

"გარდიანი" კი ამტკიცებს, რომ სპორტული დირექტორის უფლება-მოვალეობები ქალბატონმა გრანოვსკაიამ შეითავსა და თუ მართლა ასეა, ახალი კაცი შეიძლება აღარც გახდეს საჭირო - ემენალოს ფუნქციებს იგივე გრანოვსკაია და სხვა ჩინოსნები გადაინაწილებენო...

ყოველდღიური სპორტული გაზეთი "ლელო"
1398
მკითხველის კომენტარები / 0 /
მსგავსი ამბები
რუბრიკის სხვა სიახლეები
;