ბათუმი-ჰაიდელბერგი 33:16 - ევროთასზე ვლიდერობთ

* ამ სეზონში "ბათუმი" პირველი ქართული გუნდია სათამაშო სახეობებში (ფეხბურთი, კალათბურთი, რაგბი), რომელმაც გამარჯვება მოიპოვა.
* "კონტინენტის ფარზე" ბათუმი ეთამაშება A ჯგუფის გუნდებს, თუმცა B ჯგუფში ირიცხება.
* ეს არის ქართული კლუბის პირველი გამარჯვება "ჩელენჯ კაპის" შესარჩევ ტურნირში.
* "ბათუმმა" ორი განსხვავებული ტაიმი ითამაშა.

"ბათუმმა" კონტინენტის ფარის გათამაშებაში პირველი გამარჯვება მოიპოვა. ზღვისპირელებმა საკუთარ მოედანზე გერმანული "ჰაიდელბერგი" დაამარცხეს 33:16 და სატურნირო ცხრილს სათავეში მოექცნენ.

ისევე, როგორც პირველ მატჩში, სტუმრად იტალიურ "როვიგოსთან", ბათუმელებმა გერმანელებთანაც მხოლოდ ერთი ტაიმი ითამაშეს კარგად. ძნელი სათქმელია, ეს რისი ბრალია, მაგრამ ფაქტია, "ბათუმი" მატჩის მეორე ნახევარში სულ სხვა გუნდი იყო.

პირველმა ტაიმმა მეტოქის სათამაშო უპირატესობით ჩაიარა. პირველ 15 წუთში ბექა ურჯუკაშვილის მიერ გატანილი ორი საჯარიმოს შემდეგ (6:0), მასპინძლებმა ბურთიც და სათამაშო ინიციატივაც მეტოქეს დაუთმეს. გერმანელები რამდენჯერმე იყვნენ ჩვენი გუნდის ლელოს მისადგომებთან, მაგრამ საბოლოოდ მხოლოდ სამჯერ დაარტყეს საჯარიმო კარში და სამივე გაიტანეს - 6:9. ასე დასრულდა პირველი ტაიმი. 

ბათუმი
33
ჰაიდელბერგი 
16

კონტინენტის ფარი. II ტური

ბათუმი (15-9): კობახიძე, ტუჩაშვილი, გოგიტიძე (გრიგოლია 76), ურჯუკაშვილი, ჯაბნიძე (ტრაპაიძე 67), ხმალაძე, თუთბერიძე (ნინიძე 70); (1-8): კვანტიძე (ერისთავი 52), მამრიკიშვილი, გოგისვანიძე (დონაძე 52), მიქაძე (ბეჟანიძე 76), ქოიავა, თხილაიშვილი, ალიქაძე (ფუტკარაძე 55), ბუჯიაშვილი.
4ლ: თუთბერიძე, გოგიტიძე, ერისთავი, ტრაპაიძე. 2გ: ურჯუკაშვილი, კობახიძე. 3ს: ურჯუკაშვილი (2), კობახიძე.
სინბინი: ალიქაძე

ჰაიდელბერგი (15-9): კუცია, მატიურენი, ლიბიგი, შრამი, კლემინგჰაუსი, არმსთრონგი (ჰიტელი 55), ოგრეიდი (კოპი 69); (1-8): შროიდერი, ბარბერი (ფერჰერსთი 67), დიკინსონი (ფიუხზელი 41), პოპმაიერი (ფოლენკემპერი 61), როდრიგესი (ჰელსი 55), ოტო, ჰენი (ბოლი 67), ფერეირა.
ლ: ფერეირა. 3ს,გ: კუცია.

მსაჯი: ბენ ბლეინი (შოტლანდია)

 შესვენების შემდეგ პირველი მოედანზე "ჰაიდელბერგი" გამოვიდა და მეტოქეს კარგა ხანს ელოდა. ვერაფრით ვიტყვით, რა ხდებოდა ბათუმელთა გასახდელში, რაზე ლაპარაკობდნენ, მაგრამ ფაქტია, ზღვისპირელებმა მეტოქეს სულ სხვა, უფრო აგრესიული და სწრაფი რაგბი შესთავაზეს. შედეგმაც არ დააყოვნა.

ის იყო, მეორე ტაიმი დაიწყო, რომ მეტოქის მოედნის ნახევარზე საკუთარი დერეფანი მოვიგეთ და ბურთი მგეზავ ლაშა ხმალაძეს გამოუტანეს, მან თავის სტილში, ცრუ მანევრით მოკლე ფრთაზე შეუტია, 22-მეტრიან ზონამდე ირბინა, მერე ოდნავ შეყოვნდა და იქვე მიმყოლ ცხრა ნომერს, ზურაბ თუთბერიძეს გადააწოდა, რომლის შეჩერებაც გერმანელებმა ვერ შეძლეს. ურჯუკაშვილმა გარდასახა - 13:9.

სწრაფმა ლელომ ბათუმელებს "ფრთები შეასხა". გუნდი უფრო სწრაფად და უკეთ ორგანიზებულად ამოქმედდა. თითქმის ყველა ტაქტიკური დარტყმა უზადოდ იყო შესრულებული. სამწუხაროდ, ურჯუკაშვილს მიზანი გაუცუდდა - მან ორი საჯარიმო ვერ გამოიყენა ხელსაყრელი პოზიციიდან. ამის მერე დამრტყმელის ფუნქცია ფულბეკმა ბახვა კობახიძემ შეითავსა. 59-ე წუთზე მან საჯარიმო ზუსტად დაარტყა და "ბათუმი" კიდევ უფრო დააწინაურა - 16:9.

63-ე წუთზე "ბათუმის" მორიგი იერიში მარცხენა ფრთაზე განვითარდა. მასპინძლებმა აქ რაკში მეტოქე მრავლად ჩაითრიეს და საპირისპირო ფრთაზე რიცხობრივი უპირატესობა შეიქმნა. ეს უმალ შენიშნა ზურაბ თუთბერიძემ და ბურთი ხაზზე გაიტანა, რომელიც ბათუმელებმა ბოლომდე ჩაათამაშეს და ლელო შუამარბმა გიორგი გოგიტიძემ გაიტანა. გარდასახვა რთული პოზიციიდან კობახიძემ ვერ გაიტანა - 21:9.

ათ წუთში ბათუმელებმა კიდევ ერთი ლელო მიითვალეს. ხუთმეტრიანი დერეფნიდან მოლის დაყენება ვერ შევძელით, მაგრამ მორკინალებმა მოკლე დარტყმებით ჰაიდელბერგელები ლელოს მისადგომებს მიაჯაჭვეს. ბოლოს შეცვლაზე შესულმა შერკინების ბურჯმა ზურაბ ერისთავმა ბურთი რაკიდან აიტაცა და ლელოში გადადო. კობახიძემ გარდასახა - 28:9.

სტუმრებმა ხელი მხოლოდ ამის მერეღა გამოიღეს. მათი ხანგრძლივი იერიში მარცხენა ფრთაზე განვითარდა და ბათუმელთა ჩათვლის მოედანში მესამეხაზელმა სებასტიან ფერეირამ შეაღწია. ფულბეკმა მარსელ კუციამ გარდასახა - 16:28.

მატჩის ბოლო წუთზე "ბათუმი" საპრემიო ქულის მომტანი მეოთხე ლელოს გატანას შეეცადა და გამოუვიდა. მარცხენა ფრთაზე უკანახაზელების შეტევისას ბექა ურჯუკაშვილმა ბურთი მეტოქის ლელოსკენ ფეხით შეაცურა. მას მეტოქე დაეუფლა, თუმცა ლაშა ხმალაძემ იმდენად იაქტიურა, რომ ლელოში ხელიდან გააგდებინა. შეცვლაზე შესულ გარემარბ დავით ტრაპაიძეს ისღა დარჩენოდა, ბურთზე ხელი დაედო. გარდასახვიდან კობახიძემ ბურთი ძელს გაარტყა და მატჩიც დასრულდა - 33:16.

კონტინენტის ფარი. II ტური
კალვიზანო-ვიადანა 41:14
პადოვა-როვიგო 18:13
ლისაბონი-ტიმიშოარა 10:45

A ჯგუფი
ა გ თ მ ფ წ ბ ქ პ
1. ტიმიშოარა 2 2 0 0 +39 9 1
2. როვიგო 2 1 0 1 -1 6 2
3. ჰაიდელბერგი 2 1 0 1 -13 4 0
4. ვიადანა 2 0 0 2 -32 1 1

B ჯგუფი
ა გ თ მ ფ წ ბ ქ პ
1. ბათუმი 2 1 0 1 +13 7 3
2. კალვიზანო 2 1 0 1 +23 6 2
3. პადოვა 2 1 0 1 +1 5 1
4. ლისაბონი 2 1 0 1 -30 4 0

III ტური
9 დეკემბერი
ვიადანა-ბათუმი
ტიმიშოარა-კალვიზანო
ჰაიდელბერგი-პადოვა
როვიგო-ლისაბონი.

ყოველდღიური სპორტული გაზეთი "ლელო"

1239
მკითხველის კომენტარები / 0 /
მსგავსი ამბები
რუბრიკის სხვა სიახლეები
;