[VIDEO] კოპა ამერიკა 2019. ტრაგედია არ მოხდა! არგენტინამ პლეი ოფში გააღწია, სანჩესს ვეღარ სცნობენ

C ჯგუფი

ურუგვაი-იაპონია 2:2
გოლები: 0:1 მიიოში (25), 1:1 სუარესი (32-პენ), 1:2 მიიოში (59), 2:2 ხიმენესი (66)
ურუგვაი (4-4-2): მუსლერა - კასერესი, ხიმენესი, გოდინი, ლაქსალტი (28. გონსალესი) - ნანდესი (60. არასკაეტა), ტორეირა, ბენტანკური, ლოდეირო (73. ვალვერდე) - კავანი, სუარესი.
იაპონია (5-3-2): კავაშიმა - იტაკურა, ტომიიასუ, უედა, ივატა (87. ტაცუტა), სუგიოკა - ნაკაჯიმა, შიბასაკი, აბე - მიიოში (83. კუბო), ოკაზაკი.

ურუგვაიმ “კოპა ამერიკის” ერთ-ერთი მთავარი სენსაცია შემოგვთავაზა და ვერ მოუგო იაპონიას, რომელიც ძირითადად ოლიმპიური ნაკრების ფეხბურთელებითაა დაკომპლექტებული. გავრისკავთ და ვიტყვით, რომ სწორედ ეს იყო მიმდინარე “კოპას” მთავარი მოულოდნელობა.

რა თქმა უნდა, ურუგვაი გვარიანად სჯაბნიდა მოწინააღმდეგეს და მეტოქეზე მეტი მომენტიც შექმნა, მაგრამ ფეხბურთში ყოველთვის ის როდი იგებს, ვისაც მეტი შანსი აქვს. მეორე მხრივ, იაპონიამ ძალიან კარგად ითამაშა და გვანახა, რომ ამომავალი მზის ქვეყანას კარგი თაობა ეზრდება.

ურუგვაი ორჯერ აგებდა, მაგრამ ჯერ ლუის სუარესმა შეაგდო პენალტით, მერე კი ხოსე მარია ხიმენესმა გაათანაბრა - “ატლეტიკოს” მცველი შეტევაში შედეგიანად ჩაერთო. ზეაქტიური იყო ედინსონ კავანი, მაგრამ “პარი სენ ჟერმენის” ფორვარდს ამ შეხვედრაში საშინელი უიღბლობა სდევდა თან - არაერთი კარგი მომენტი გაატანა ქარს.

ეკვადორი-ჩილე 1:2
გოლები: 0:1 ფუენსალიდა (8), 1:1 ე. ვალენსია (26-პენ), 1:2 ალექსის სანჩესი (51)
ეკვადორი (4-5-1): დომინგესი - ველასკო, აჩილერი, არბოლედა, რამირესი - მენა (82. პრესიადო), ორახუელა, გრუესო, მენდესი (60. ა. ვალენსია), იბარა (69. გარსესი) - ე. ვალენსია
ჩილე (4-3-3): არიასი - ისლა, მედელი, მარიპანი, ბოსეჟური - არანგისი, პულგარი, ვიდალი (90. ხარა) - ფუენსალიდა (70. დიასი), ვარგასი (86. ერნანდესი), სანჩესი
გაძევება: აჩილერი (89. ეკვადორი)

შეხვედრის მთავარი მოქმედი პირი არგენტინელი არბიტრი გახლდათ. ამ საოცრად უხეშ მატჩში ის რომ არ ჩარეულიყო, მინდვრიდან საღი ვერავინ გავიდოდა. საინტერესოა, რომ გუნდებმა 44-ჯერ დაარღვიეს თამაშის წესი.

ისევ შეაგდო (ლამაზად “აჭრა” ბურთი შორეულ კუთხეში) ალექსის სანჩესმა, ვისაც “კოპაზე” კი გააქვს, მაგრამ ვინც ტურნირს უყურებს, დაგვეთანხმება, რომ ის მაინც ვერ არის ძველი სანჩესი. 

ჩილე დამაჯერებლად გავიდა პლეი ოფში. ეკვადორსა და იაპონიას კი ბოლო ტურის ურთიერთდაპირისპირებაში მხოლოდ გამარჯვება აძლევთ ხელს.
“ძალიან რთული თამაში იყო. რამდენიმე ჩვენს ფეხბურთელს ტრავმა აქვს. ბოლომდე შევინარჩუნეთ რწმენა და ეს დაგვეხმარა”, - თქვა ჩილეს ნაკრების მთავარმა მწვრთნელმა რეინალდო რუედამ.

თ მ ფ წ ბ ქ
1. ჩილე 2 2 0 0 6:1 6
2. ურუგვაი 2 1 1 0 6:2 4
3. იაპონია 2 0 1 1 2:6 1
4. ეკვადორი 2 0 0 2 1:6 0
A ჯგუფი

პერუ-ბრაზილია 0:5
გოლები: 0:1 კაზემირო (12), 0:2 ფირმინო (19), 0:3 ევერტონი (32), 0:4 დანი ალვეში (53), 0:5 ვილიანი (90)
ბრაზილია (4-2-3-1): ალისონი - დანი ალვეში, მარკინოსი, ტიაგო სილვა, ფელიპე ლუისი (57. ალექს სანდრო) - არტური, კაზემირო (70. ალანი) - გაბრიელ ჟეზუსი, კოუტინიო (77. ვილიანი), ევერტონი - ფირმინო
პერუ (4-2-3-1): გალიესე - ადვინკულა, არაუხო, აბრამი, ტრაუკო - ტაპია, იოტუნი (46. ფლორესი) - პოლო, ფარფანი, კუევა (67. ბალონი) - გერერო (55. გონსალესი)

ბოლოს და ბოლოს, გულშემატკივარმა იხილა ბრაზილიის ნაკრებისგან ის თამაში, რომელსაც მისგან ელოდა. კარგა ხანია, ბრაზილიას ოფიციალურ შეხვედრებში ასეთი ფეხბურთი აღარ უთამაშია. ტიტეს გუნდს ხუთის გარდა კიდევ ერთი უნდა გაეტანა, მაგრამ გაბრიელ ჟეზუშმა 11-მეტრიანი ვერ შეაგდო. 

“ძალიან კარგი თამაში გამოგვივიდა. ასე უნდა გავაგრძელოთ”, - განაცხადა თამაშის დასრულების შემდეგ ბრაზილიელთა თავკაცმა. ამრიგად, ბრაზილია და პერუ პლეი ოფში გავიდნენ.

ბოლივია-ვენესუელა 1:3
გოლები: 0:1 მაჩისი (2), 0:2 მაჩისი (55), 1:2 ხუსტინიანო (82), 1:3 მარტინესი (86)
ბოლივია (4-2-3-1): ლამპე - დიეგო ბერახანო, აკინი, ხუსინო, მარვინ ბერახანო (73. ფერნანდესი) - ხუსტინიანო, საუსედო - ლეონარდო ვაკა (34. კასტრო), რამირო ვაკა, არანო - მარტინსი (78. ალვარესი)
ვენესუელა (4-1-4-1): ფარინესი - ერნანდესი, კანსელორი, დელ პინო, როსალესი - მორენო - სავარინო, ანიორი (59. სოტელდო), რინკონი, მაჩისი (73. მარტინესი) - რონდონი (86. მურილიო)

ვენესუელამ თამაშ-თამაშ, ულამაზესი გოლებით მოუგო ბოლივიას და მშვიდად გავიდა “კოპას” პლეი ოფში. კიდევ ერთი დასტური იმისა, რომ თუ გული გულობს, შეჭირვებული ქვეყნების საფეხბურთო ნაკრებებსაც შეუძლიათ წარმატებით თამაში.
ორი გოლი შეაგდო ესპანურ “კადისში” მოთამაშე დარვინ მაჩისმა, ერთიც შესვლაზე შესულა ხოსეპ მარტინესმა გაიტანა თავურით.

თ მ ფ წ ბ ქ
1. ბრაზილია 3 2 1 0 8:0 7
2. ვენესუელა 3 1 2 0 3:1 5
3. პერუ 3 1 1 1 3:6 4
4. ბოლივია 3 0 0 3 2:9 0

B ჯგუფი

ყატარი-არგენტინა 0:2 
გოლები: 0:1 მარტინესი (4), 0:2 აგუერო (82)
ყატარი (5-3-2): ალ შეები - კორეა (85. ჰამიდი), ჰიშამი, ხუხი, ალ ჰაჯრი (89. აბდულსალემი), სალმანი - ალ ჰეიდოსი, ბუდიაფი, აბდულა - ალმოეზ ალი, აფიფი
არგენტინა (4-3-3): არმანი - სარავია, ფოიტი (85. პეცელა), ოტამენდი, ტალიაფიკო - დე პაული, პარედესი, ლო სელსო (55. აკუნია) - მესი, მარტინესი, აგუერო

კიდევ კარგი, ტრაგედია არ მოხდა! არგენტინა არ ჩარჩა ჯგუფში და ლიონელ მესისაც არ ჩაუმწარდა იუბილე. არგენტინამ დაამარცხა ყატარი და ჯგუფში მეორე ადგილი დაიკავა. ეს იმას ნიშნავს, რომ “ალბისელესტე” ავტომატურად მოხვდა პლეი ოფში. 

უკვე ვიცით, რომ არგენტინა მეოთხედფინალში შეხვდება ვენესუელას, ხოლო წარმატების შემთხვევაში, თუ ბრაზილიაც მივიდა იქამდე, ნახევარფინალში ვიხილავთ ნაადრევ ფინალს - “სუპერკლასიკოს”. არგენტინა პირველი ადგილით რომ გასულიყო პლეი ოფში, დიდი დაპირისპირების პერსპექტივა ფინალში გველოდა...

...ყატართან მატჩში ანგარიში ლაუტარო მარტინესმა გახსნა, როცა მცველთა მიერ ცუდად გათამაშებული ბურთი მოიგდო. მეორე ტაიმში კი არგენტინელთა შორის საუკეთესომ, სერხიო აგუერომ იყოჩაღა - კარგად გაძვრა მცველებს შორის და ბურთი მახვილი კუთხიდან შორეულ ძელთან შეაცურა.

კოლუმბია-პარაგვაი 1:0
გოლები: 1:0 კუელიარი (31)
კოლუმბია (4-3-3): მონტერო - არიასი, კრისტიან საპატა, ლუკუმი, ბორხა - ლერმა, კუელიარი, კარდონა (85. ბარიოსი)- კუადრადო (58. ხამეს როდრიგესი), ფალკაო (66. დუვან საპატა), დიასი
პარაგვაი (4-4-1-1): ფერნანდესი - პირისი, გომესი, ალონსო, არსამენდია - დერლიზ გონსალესი (82. ოსკარ რომერო), სანჩესი, რ. როხასი (63. იტურბე), მ. როხასი (46. დომინგესი) - ალმირონი - კარდოსო

კოლუმბიამ თითქმის სათადარიგო შემადგენლობით მოუგო პარაგვაის. თამაში ძალიან დაძაბული იყო. შეხვედრის პერიპეტიებს აღარ ჩავუღრმავდებით. ფაქტია, პარაგვაიმ ძალიან გაირთულა საქმე. ახლა ამ გუნდის ბედი იაპონიასა და ეკვადორის შეხვედრაზეა დამოკიდებული.

თ მ ფ წ ბ ქ
1. კოლუმბია 3 3 0 0 4:0 9 
2. არგენტინა 3 1 1 1 3:3 4
3. პარაგვაი 3 0 2 1 3:4 2
4. ყატარი 3 0 1 2 2:5 1

საუკეთესო მესამეადგილოსანი

თ მ ფ წ ბ ქ
1. პერუ 3 1 1 1 3:6 4
2. პარაგვაი* 3 0 2 1 3:4 2
3. იაპონია 2 0 1 1 2:6 1
* - პლეი ოფში გადის ორი საუკეთესო შედეგის მქონე

ყოველდღიური სპორტული გაზეთი "ლელო"
842
მკითხველის კომენტარები / 0 /
მსგავსი ამბები
რუბრიკის სხვა სიახლეები
;