კორეაში დვალიშვილიც დაგვეხმარება. სამბისტები სეულის გზაზე

საქართველოს სამბისტთა ნაკრები გუშინ საღამოს სეულში მიფრინავს, სადაც 7-11 ნოემბერს მსოფლიოს ჩემპიონატში მიიღებს მონაწილეობას. ნაკრების მთავარ მწვრთნელ ჯონდო მუზაშვილს იქ თითქმის იგივე შემადგენლობა მიჰყავს, რომლითაც ივნისში ტრიუმფალურად იასპარეზა მინსკში, მეორე ევროპულ თამაშებში. ვაჟთა ნაკრებში ერთადერთი ცვლილებაა - 62 კილოგრამში ქუთაისელი გენადი ჩირგაძის ნაცვლად თბილისელი თორნიკე ჭოველიძე იჭიდავებს ის თბილისში კი ცხოვრობს, მაგრამ აჭარის სახელით გამოდის, რადგან ბათუმი აფინანსებს). ქალთა ნაკრებში ცვლილება მხოლოდ ისაა, რომ 4-ის ნაცვლად ორი წარმომადგენელი გვეყოლება. ისინიც აჭარის სახელით გამოდიან, რადგან საკუთარი რაიონების ნაცვლად მათაც ავტონომიური მხარის  ხელისუფლება აფინანსებს.

ამჯერად ერთი წარმომადგენელი საბრძოლო სამბოშიც გვეყოლება - ამერიკაში მცხოვრები საკმაოდ ცნობილი ქართველი მებრძოლი მერაბ დვალიშვილი, რომელიც 68 კილოგრამში იასპარეზებს. ის ამერიკაში ცხოვრობს და შერეულ ორთაბრძოლებში გამოდის. თან - საკმაოდ წარმატებითაც, ახლა კი სამბოშიც სცადა ძალების მოსინჯვა. დვალიშვილი ამერიკიდან გადაფრინდება სეულში და იქ შეუერთდება გუნდს. საბრძოლო სამბოში ადრეც გვყოლია წარმომადგენლები, თუმცა ჩვენები ამ დისციპლინაში იშვიათად გამოდიან.

ორივე ნაკრები - ქალებიც და ვაჟებიც ფრიად ტიტულოვანია. ქალთა გუნდის ორივე წარმომადგენელი - ნინო ოძელაშვილიც (72) და მძიმეწონოსანი ელენე ქებაძეც მსოფლიოს მოქმედი ჩემპიონია. ბუნებრივია, ისინი შორეულ კორეაში ტიტულის დასაცავად მიფრინავენ, ოღონდ ეს კია, რომ ოძელაშვილს ხელის ტრავმა აწუხებს. მოგეხსენებათ, მან ხელი ჯერ კიდევ მინსკში იტკინა, მეორე ევროპული თამაშების ფინალში და სარეაბილიტაციო პერიოდი კი გაიარა, თუმცა ბოლომდე მოშუშებულიც არაა და, რაც მთავარია, ამან მოსამზადებელი პერიოდის გარკვეული ნაწილიც შეაფერხა.

ნინო ოძელაშვილი

რაც შეეხებათ ვაჟებს, მათ რიგებში უკლებლივ ყველა ტიტულოვანია, მსოფლიოს მოქმედი ჩემპიონი კი მათაც ორი ჰყავთ: ვახტანგ ჩიდრაშვილი (57) და ბესარიონ ბერულავა (82). მანდილოსნების დარად, ისინიც ტიტულის დასაცავად მიდიან სეულში. სხვადასხვა წელს მსოფლიოს ჩემპიონის ტიტულს ასევე ფლობდნენ ლევან ნახუცრიშვილი (74), პაატა ღვინიაშვილი (90) და დავით ლორიაშვილი (100). ფაქტობრივად, 9-კაციან გუნდში ნახევარზე მეტი - ხუთი კაცია მსოფლიოს ჩემპიონი. თუმცა ამათშიცაა ერთი განსაკუთრებით გამორჩეული - ჩიდრაშვილი მსოფლიოს ხუთგზის გამარჯვებულია და დიდი შანსია, თამასა მეექვსე ნიშნულამდე ასწიოს.

თუმცა ჩვენ აქ მსოფლიოს ჩემპიონატზე ვსაუბრობთ (მხედველობაში ვაჟთა ნაკრები გვყავს) და ცალკე საკითხია მეორე ევროპული თამაშები, სადაც გუნდმა ნამდვილი ფურორი მოახდინა და მისი 9-ვე წევრი მედალოსანი გახდა, მათ შორის კი ოთხმა ოქროს მედალი მოიპოვა: ჩიდრაშვილმა, ნახუცრიშვილმა, ლორიაშვილმა და ბერძენიშვილმა. რაც შეეხებათ ქალებს, ამჟამინდელი გუნდის ორივე წარმომადგენელმა ვერცხლის მედლები მოიპოვეს, თუმცა ოძელაშვილს ზემოხსენებულმა ტრავმამ დაათმობინა, ფაქტობრივად, განაღდებული ჩემპიონის ტიტული.

საქართველოს ნაკრები. სპორტული სამბო. ვაჟები

52 კგ. გივი ნადარეიშვილი (ფოთი)

57 კგ. ვახტანგ ჩიდრაშვილი (თელავი)

62 კგ. თორნიკე ჭოველიძე (აჭარა)

68 კგ. მინდია ლილუაშვილი (ზესტაფონი)

74 კგ. ლევან ნახუცრიშვილი (მცხეთა)

82 კგ. ბესარიონ ბერულავა (ზუგდიდი)

90 კგ. პაატა ღვინიაშვილი (ქარელი)

100 კგ. დავით ლორიაშვილი (მარტყოფი)

+100 კგ. ბექა ბერძენიშვილი (აჭარა)

ქალები

72 კგ. ნინო ოძელაშვილი (აჭარა)

+80 კგ. ელენე ქებაძე (აჭარა) 

საბრძოლო სამბო

68 კგ. მერაბ დვალიშვილი

394
მკითხველის კომენტარები / 0 /
მსგავსი ამბები
რუბრიკის სხვა სიახლეები
;