კორონავირუსით 33 წლის ცნობილი მოჭიდავე გარდაიცვალა


კორონავირუსმა მსოფლიოს სპორტის ცნობილ სახეებსაც საბედისწეროდ შეუტია – ამ ვერაგი დაავადებით 33 წლის ასაკში გარდაიცვალა ცნობილი ბულგარელი თავისუფალი სტილით მოჭიდავე ნიკოლაი შტერევი. ბულგარელი ექიმები სოფიას სამხედრო-სამედიცინო ჰოსპიტალში თვეზე მეტ ხანს იბრძოდნენ მისი სიცოცხლის გადასარჩენად, მაგრამ ამაოდ... ამ ხნის განმავლობაში ის მართვით აპარატზე იყო შეერთებული და ექიმები სავენტილაციო აპარატით ცდილობდნენ მისი ფილტვების სრულყოფილად ამუშავებას... აღსანიშნავია, რომ მოჭიდავემ დაგვიანებით მიაკითხა ექიმებს – თავდაპირველად სახლში მკურნალობდა, საავადმყოფოში კი მას შემდეგ წავიდა, როცა სუნთქვა გაუჭირდა...

ნიკოლაი შტერევი 97 და მძიმე წონებში ჭიდაობდა, სადაც არაერთი საერთაშორისო ტურნირი მოიგო და ბულგარეთის ეროვნული ნაკრების წევრიც იყო. თუმცა მასზე უფრო ტიტულოვანი მამამისი – სემენ შტერევია, ამავე სტილის ჭიდაობაში სეულის 1988 წლის ოლიმპიადის მესამე პრიზიორი, ევროპის სამგზის გამარჯვებული და მსოფლიოს ჩემპიონი. ის რამდენიმე წლის წინ თავისუფალ ჭიდაობაში აზერბაიჯანის ვაჟთა და ქალთა გუნდებს წვრთნიდა, თუმცა ისეთი შედეგები ვერ მოიპოვა, რაც ჩვენმა მეზობლებმა დაუკვეთეს და გაათავისუფლეს. ამის შემდეგ ჩინეთშიც მუშაობდა, სადღეისოდ კი რუსეთის ქალთა ნაკრების სამწვრთნელო შტაბშია. აღსანიშნავია, რომ კორონავირუსი დაუდასტურდათ თავად სემენსა და მის მეუღლე მარიასაც, თუმცა მათ დროულად მიმართეს ექიმებს და მდგომარეობაც დამაკმაყოფილებელია.

შტერევების ოჯახს შვილის გარდაცვალება ბულგარეთის პრემიერმა ბოიკო ბორისოვმა მიუსამძიმრა.

23971
მკითხველის კომენტარები / 0 /
მსგავსი ამბები
რუბრიკის სხვა სიახლეები
;